سامي بيتلخبط مع دينا في الكلام، ومش عارف هو بيسألها عن كده ليه..
اعتذر لها وسابها ورجع مكانها..
رانيا وصلت، وكانت فرحانة أوي، وشافت دينا في طريقها..
_ صباح الخير دينا
_ أهلا رانيا .. صباح الخير
(رانيا بتبص ناحية سامي، وابتسمت ابتسامة عريضة، فرحت إنها شافته)
_ ساااااااااامي ..
(راحت ناحيته، بتسلم عليها بلهفة)
_ صباح الخيررر
_ اهلا رانيا
_ تصدق وحشتني
_ يا سلام! ما احنا كنا مع بعض امبارح
_ رقص امبارح ده خلاك توحشني أكتر
_ تسلمي رانيا
(سامي بيحاول يهرب منها، بيشوف حد من أفراد البوفيه، وبيطلب منه فنجان قهوة، وبيقفل حواجبه، كأن عنده صداع)
_ الصداع هيفلق راسي..
_ سلامتك يا سمسم
(سامي بيفتح عينه مرة واحدة، مستغرب من كلمة سمسم)
_ سمسم! سمسم ايه يا رانيا، بلاش الأسماء دي أرجوكي
_ وفيها ايه يا عم، ما اهو كل حد بيكون له اسم مرن يتنادى بيه.
_ اسم مرن ايه؟ ده انا مراتي مش بتقول لي يا سمسم
_ وهي مراتك دي تعرف حاجة أصلا
(سامي بيبص لها بزعل)
_ لاحظي انك بتتكلمي عن مراتي يا رانيا..
(رانيا حست انه مش هيسمح له بالتجاوز في حق مراته فعلا)
_ اه .. سوري .. مقصدش
(سامي بيقعد يفتح اللاب توب قدامه، وهو بيرمي عينه ناحية دينا، وكانت في قمة الهدوء وهو بيبص ناحيتها)
نيفين بتتصل برانيا..
رانيا بتبص ع الفون وشافت الاسم، واستغربت ان نيفين تتصل بيها..
أخدت الفون ومشيت بيه بعيد عن المكاتب، علشان سامي ميعرفش ان مراته اللي بتتصل..
ولسة بتفتح الفون وهتقول ايه … انفجرت في وشها ماسورة شتايم
_ صباحو نيفين
_ صباح الزفت على دماغك ودماغ أهلك .. بئى انتي يا رانيا بتستغلي اني متخانقة مع جوزي، تروحي تلزقي له، وترقصي معاه سلو كمان.
تصدقي انتي بنت ناقصة، وواطية، وندلة، وفيكي كل العبر..
_ لحظة نيفين .. أنا مش فاهمة حاجة
_ مش فاهمة ايه يا حقيرة .. والله يا رانيا لأفضحك، وأخلي اللي ما يشتري يتفرج عليكي يا حقيرة، يا حقيرة.
بس الحق مش عليكي، الحق عليا أنا اللي معرفتش أحافظ على جوزي، وأنا عارفة إن في أشكال ضالة معاه في الشغل … والحق عليا إني مسمعتش كلام دينا، لما قالت لي خلي بالك من جوزك، علشان في حشرة بتدور حواليه
وآخرتها أشوف لك فيديو وانتي بترقصي معاه سلوو يا وطية
(رانيا بدأت تبلم، مش عارفة تنطق، وكأنها بتاخد دش ساقع، في عز الشتا، وبتسمع شتايم نيفين، وهي مشحونة)
نيفين قفلت المكالمة، ورانيا دخلت على المكتب مندفعة، ونادت على دينا..
_ ديناااا .. بعد اذنك..
(دينا استغربت من اندفاع رانيا بالشكل ده .. وراحت لها)
رانيا بدأت توبخها وتشتمها..
_ هي حصلت إنك تصوريني فيديو أنا وسامي امبارح، وتبعتيه ل نيفين؟
_ فيديو ايه؟ وأصوره فين؟
_ في فرح سماح وكرم امبارح..
_ بس انا مكنتش في الفرح امبارح.
_ مليش فيه، انتي اللي عملتي كده، لأنك قبل كده قلتي لها ان في حشرة بتلزق في جوزها في الشغل … أنا حشرة يا جرثومة؟
_ احترمي نفسك يا رانيا، أنا لا عمري ما اقول حشرة على حد.
_ بلاش شغل المثالية ده، انتي اتكشفتي على حقيقتك، لأنك كلمتيني بنفسك قبل كده اني أبطل اهتم بسامي.
(سامي خرج لهم، ووقف معاهم، وكان مندهش من طريقة مناداة رانيا على دينا)
_ في ايه يا جماعة؟ مالك يا رانيا، بتتخانقوا ليه؟
_ الأخت المثالية، بعتت فيديو لينا واحنا بنرقص امبارح بالليل لمراتك، ونيفين شتمتني في الفون دلوقتي
(سامي بيبص على دينا وهو مذهول)
_ انتي يا دينا؟ مش معقول؟
_ لا معقول يا سيدي، معقول أوي، وهي مش هتقدر تنكر كمان
(دينا بتبكي)
_ أقسم بالله ما حصل .. ورحمة بابا ما حصل
(دينا بتجري من قدامهم وهي بتعيط)
سامي بيمشي وراها، ورانيا بتحاول توقفه..
_ انت رايح فين؟
_ هشوفها
_ هو انت صعبانة عليك أس الفتن، ومش صعبانة عليك أنا اللي اتبهدلت من مراتك
_ هرجع لك
(سامي يروح ورا دينا، وبيسحب كرسي ويقعد ع المكتب عندها، ويتكلم بصوت واطي)
نيفين في شقتها، وأبوها معاها، وأمها هي كمان راحت لهم، والطفلة رؤى موجودة..
(الأم جهزت فطار، والكل بيترجى نيفين إنها تقعد تاكل معاهم..
_ مش عايزة أكل .. مش عايزة
_ يا بنتي كلي علشان تاخدي العلاج بتاعك
_ مش عايزة أكل ولا علاج يا ماما .. سيبوني في حالي أرجوكم
(الأب بينفخ من الغضب، وبيكلمها بحدة)
_ كل حياتك ماشية بالعكس .. لما كان جوزك بيقول لك الأكل له نظام، كنتي تقولي عليه بخيل، وواقف لك ع الواحدة في الأكل..
ولما ضاع منك، مش عايزة تاكلي .. ده ايه المنطق الغريب ده
_ مش وقت تبكتني فيه ده يا بابا لو سمحت..
_ حاضر يا نيفين .. أنا غلطان .. وهخرس خالص يا بنتي .. لما اشوف اخرتها معاكي
(الباب بيخبط .. بيخبط بشدة .. بلهفة .. باندفاع)
الام بتقوم تفتح، تشوف مين..
كانت مدام نهلة جارتهم، ملهوفة .. خايفة .. متوترة خالص..
_ هي مدام نيفين موجودة.
_ اه يا بنتي .. اتفضلي.
(نيفين قامت من مكانها، وراحت تشوفها)
_ خير يا مدام نهلة؟
_ الدكتورة ماجدة تعبت امبارح بعد ما اتعشت .. زي ما حصل لي بالظبط، وراحت كشفت، و الدكتور قال لها إن السبب في الأكل..
ولما حكيت لها عنك وعني، وإن القطة بتاعتكم شافتنا بناكل، وانها بتحسد..
الدكتورة ماجدة اتخضت، وقالت ان القطة بتاعتكم كانت عندهم امبارح، قبل ما انا ارجع من برة..
ولما انا فتحت لها الباب، كانت القطة جاية من عند دكتورة ماجدة..
_ يا نهار اسود .. يعني القطة حسدت الدكتورة ماجدة كمان
(نيفين نادت على أبوها)
_ الحقني يا بابا
(الأب طلع بسرعة، واستغربوا كلهم من حكاية الدكتورة ماجدة، وبدأ الزعر في العمارة، والكل خايف من حسد القطة كوكي)
ــــــــــــــــــــــــــــــــــــــــــــــــــــــــــــــ
سامي ودينا قاعدين، وهو بيشرب قهوة، وكانوا هاديين خالص..
_ أنا مصدقك يا دينا والله .. وانا بجد مش عايز أعاتبك انتي قلتي ايه وعملتي ايه .. أنا كل الفكرة اني عايز أبرر لك موضوع الرقص مع رانيا .. هي اللي فاجئتني والله، ولاقيت نفسي في وسط دايرة وبنرقص
_ حصل خير يا سامي ..
(تليفون سامي بيرن، وبيتفاجيء إنها نيفين … بيتضايق، وملامحه بتتغير، وبياخد قهوته، ويقوم من عندها، ويروح مكتبه، ورانيا من بعيد بتراقبهم، عايزة تاكلهم بعينها)
سامي بيقعد على مكتبه، وبيركن الفون جنبه، ومش بيرد عليه..
نيفين بتكتب رسالة وتبعتهاله:
(أنا آسفة يا سامي .. آسفة بجد .. أنا كنت فاكرة ان انتي اتجوزت عليا .. وعرفت دلوقتي حالا سبب مشاكلنا، وخناقتنا .. وحتى سبب رقصك مع رانيا..
القطة بتاعتنا طلعت حسودية يا سامي ..
اه والله .. القطة بتحسد، وهي اللي حسدتنا..
وحسدت مدام نهلة وولادها امبارح
وقبلهم كانت حسدت الدكتورة ماجدة.
رد ع الفون يا سامي بليزززز .. رد ع الفون
ولازم تيجي تصالحني، وانا هعمل كل اللي انت عايزه يا سامي..
هبطل أكل
وهنتظم
وهبطل كسل
وهكون نشيطة
أنا خلاص استوعبت الدرس يا سامي
استوعبت الدرس والله
ارجع بئى
سامي بيسمع نغمة تنبيه الرسايل، وبيشوف، يلاقي إنها نيفين، مرضيش يفتح الرسالة
_ أكيد دش ساقع زي اللي أخدته رانيا بسبب فيديو الرقص.. وانا مفيش دماغ أصلا
.
.
أبو نيفين، بيجمع مدام نهلة وأولادها، والدكتورة ماجدة، ومعاهم نيفين، وهيبدأ يعالجهم من حسد القطة كوكي، علشان يرجعوا يعيشوا حياتهم الطبيعية من تاني..
الدكتورة ماجدة مش مقتنعة
_ أنا مش مصدقة، هو ازاي قطة تحسد أصلا؟
_ أنا عارف الموضوع ده من زمان .. وأهو حضرتك شفتي بنفسك الضرر اللي حصل لك، وحصل لمدام نهلة وأولادها، وكمان نيفين بنتي بسبب حسد القطة..
_ والعلاج فيه حاجة مقرفة؟
_ مقرفة ازاي يعني؟
_ يعني تحط القطة جنب بؤ حد فينا مثلا
_ يعععع .. ايه القرف ده يا دكتورة .. لا مش كده طبعا
(أبو نيفين، قعدهم كلهم جنب بعض، ومعاهم الطفلين، وجاب القطة، ووقف يبص عليهم)
تأليف/ سيد داود المطعني
قصة القطة الحاسدة. الجزء السادس الأخير
.
.
.
.
