قصة القطة الحاسدة. الجزء السادس الأخير

أبو نيفين ماسك القطة، بيلمس على جسمها، والستات التلاتة قاعدين قدامه.. نيفين، والدكتورة ماجدة، ومدام نهلة..

ومعاهم الطفلين الصغيرين..

_ انتوا التلاتة حسدتكم القطة، في وجبات عشا، علشان شافتهم بتاكلوا، وخصوصا إن الأكل ريحته كانت فايحة، وريحة الأكل دي بتشد الإنسان زي الحيوان للأكل

(نيفين بتتكلم)

_ بصراحة مطعم ترميلة اللي جنبنا ده بيعمل أكل هايل، ومترمل ترميلة رهيبة..

(مدام نهلة بتبص عليها)

_ وانا كمان كنت جايبة التلات وجبات ليا ولولادي من هناك، وبصراحة ريحته فظيعة فعلا

(الدكتور ماجدة)

_ أنا عمري ما أكلت من هناك، بس المرة دي كنت راجعة من الجامعة متأخر أوي، وطلبتهم وانا داخلة العمارة، وبعد دقايق كانوا عندي، والقطة دخلت من الباب لما كان الديليفري واقف، وبدأت تماوي، وأنا رميت لها أكل بصراحة، معرفش حسدتني ازاي

(مدام نهلة بترد عليها)

_ وانا كمان خليتها تاكل مع كارو، القط بتاعنا

(أبو نيفين بيتحرك وهو بيهز دماغه)

_ حتى ان كنتي رميتي لها حتة م اللي معاكي، ممكن هي تكون طمعانة في أكتر..

وانتي يا مدام نهلة، مينفعش تاكل أكل ليه ريحة ومذاق، وتقدمي للقطة أكل تاني خالص، جاف ومفيهوش مميزات الأكل اللي هو شامم ريحته

(الأب بيبص على نيفين)

_ وانتي يا نيفين، حتى لو القطة أكلت قبلك .. وطلبت منك أكل م اللي معاكي، لازم تقدميها لها اللي عايزاه، لأن دي أقل واجبات الرحمة للحيوان

_ أنا حرمت يا بابا … القطة دي كانت هتخرب بيتي

أنا بسببها كنت هموت، وجوزي هددني بالطلاق، واهو انتي شفت عمل ايه بعد كده بنفسك

ــــــــــــــــــــــــــــــــ

الكل بيسمع صوت دوشة في الشارع، وفي العمارة، مع أصوات أكتر من عربية إسعاف

_ هو في ايه؟

_ ربنا يستر .. ربنا يستر

(الأب بيجري يفتح الباب، والستات التلاتة بيجروا ع الفراندا، يشوفوا في ايه)

زحمة كتيرة، وعربيات اسعاف واقفة في الشارع، والمسعفين خارجين بأكتر من ناقلة مرضى، ومعاهم حالات بيركبوها الإسعاف..

والجيران بينزلوا جري على السلالم، علشان الأسانسيرات مشغولة بالمسعفين.

_ خير اللهم اجعله خير، في ايه يا شباب.

_ في تلات حالات تسمم في الشقة اللي في السابع بسبب وجبة غدا

_ يا ساتر يارب .. يا ساتر يارب

(الأب بيدخل يحكي لهم)

_ حالات تسمم في الشقة اللي فوق

(نيفين منفعلة على القطة)

_ كل بسبب القطة الحاسدة دي، أكيد راحت لهم، زي ما راحت لمدام نهلة، والدكتورة ماجدة

_ لا حول ولا قوة الا بالله .. قطة صغيرة تعمل كل البلاوي دي

(مدام نهلة حست بالقلق على ولادها)

_ أنا هستأذن أروح أطمن على الولاد .. احسن يتخضوا من صوت الاسعاف، ونخلي العلاج بعد العصر

_ اتفضلي يا حبيبتي ولا يهمك

(الدكتورة ماجدة بتستاذن، وبتمشي زيها)

ـــــــــــــــــــــــــــــــــــــــ

نيفين بتتصل بسامي، وبيرد عليها..

_ أخيرا رديت عليا يا سامي

_ عايزة ايه؟

_ أنا آسفة أوي يا حبيبي .. آسفة على كل حاجة..

_ انتي بتتأسفي بجد؟

_ سامي احنا محسودين .. القطة حسدتنا يا سامي .. أنا لازم أطرد القطة الحاسدة دي من بيتنا.

_ انت بتخرفي يا نيفين، قطة ايه اللي حسدتنا .. أنا مشكلتي مش مع القطة .. مشكلتي مع تصرفاتك.

_ والله هتغير يا سامي .. هنظم أكلي، وهبطل كسل، وهرجع زي الأول..

_ مش بالكلام يا نيفين .. مش بالكلام

_ النهاردة العصر بابا هيعالجني أنا ومدام نهلة والدكتورة ماجدة، من حسد القطة، وبعدها هتشوف التغيير بنفسك

_ هي القطة حسدتهم كمان

_ اه طبعا .. دي لسة حاسدة الجيران اللي فوق

_ هو انتوا في بيتنا ولا ايه؟

_ أيوة .. ما انا قلت لك كده في المسج

_ مسج ايه؟ الأخير ده؟

_ ايه ده؟ هو انت مشفتهاش؟

_ لالالا شفتها .. أنا هرجع البيت بعد العصر ونشوف

_ مستنياك يا حبيبي.

_ حبيبك! ربنا يستر

ـــــــــــــــــــــــــــــــــــــــــــــــ

سامي في مكتبه، ورانيا رايحة ناحيته، وهي متضايقة

_ هو انت قلت إيه للزفتة دينا الصبح؟

_ عيب يا رانيا، دي زميلتنا

_ دي فتانة، وهي اللي بعتت الفيديو لمراتك، وخلتها تشتمني، لأنها عايزاك تطلق نيفين.

_ أقولك حاجة يا رانيا؟؟

_ قول.

_ أنا لو شفت دينا بتعمل فتنة، مش هصدق عيني، لأنها ملاك، عارفة يعني ايه ملاك؟

(رانيا بتتنرفذ)

_ طبعا .. ما انت بتهتم باللي يطنشك … وتطنش اللي يهتم بيك..

_ ايه الكلام ده يا رانيا؟

_ أنا اللي عاملة اللي مستحيل علشان خاطرك، بتعتبرني غلطانة وشيطانة، وهي اللي مش بترد عليك السلام هتموت عليها، وبتنصرها عليا.

(سامي بيقوم مفزوع من مكانه)

_ مستحيل ايه؟ وسلام مين؟ وهموت على مين؟ هو انتي نسيتي اني متجوز يا رانيا ولا ايه؟

_ جواز ايه ده اللي يخليك متشوفش بيتك من امبارح، والله انت خسارة فيها المفجوعة دي

_ قلت لك مليون مرة يا رانيا، مش هسمح لك تغلطي في مراتي ..

(سامي بيسيب لها المكان ويمشي)

ــــــــــــــــــــــــــــــــــــــــ

في الشارع

دينا منتظرة مواصلات بعد الشغل..

سامي بيوقف بعربيته، وينزل، يعرض عليها تركب معاه يوصلها، ودينا رافضة، وبتحاول تخليه يمشي..

_ اركبي يا بنتي هوصل لك

_ معلش يا أستاذ سامي، سيبني على راحتي أرجوك

_ وحياة نيفين عندك لتركبي..

_ نيفين بالنسبة لي ولا حاجة، كانت صاحبتي وخلصنا

_ اللي هو ازاي ده؟

_ اهو كده وخلاص

(سامي أصر انها تركب يوصلها، واستجابت له تحت الضغوط)

في الطريق عرف منها كل حاجة عن النصيحة اللي راحت تنصحها لها..

_ أنا رحت نصحتها تاخد بالها من بيتها، ومنك، علشان تقدر تحافظ عليك

_ بجد؟

_ اه والله يا سامي .. ما كان لي هدف غير انها تهتم بيك..

_ وقالت لك ايه؟

_ اتهمتني اتهام حقير

_ اتهام ايه

_ اني أنا الست اللي عايزة توقعك في شباكها

_ دي أكيد مجنونة رسمي..

_ ياريت على كده وبس ..

_ حصل ايه تاني؟

_ رانيا بتتهمني إني أنا اللي بعتت لها فيديو رقصكم في حفلة امبارح

_ أنا عرفت مين اللي بعته، بس مرضيتش أقول لها

_ مين؟

_ الأستاذ رمضان عبدالستار

_ الأستاذ رمضان؟ مش معقول! ده انسان محترم

_ هو علشان محترم عمل كده، علشان يبعت لها رسالة إن جوزك خلاص بيضيع..

_ هو انت بتحب نيفين؟؟

_ أنا كنت بحبها جدا .. بس تصرفاتها الأخيرة تعبتني، وقرفتني.. نفسي تتغير علشان أعرف أستقر في بيتي والله، مش عايز أهد الأسرة على دماغ طفلة صغيرة زي رؤى

_ شوف انت عايزها تكون ازاي؟ واقعد معاها، وحط النقط ع الحروف، وقول لها يا تكوني كده، يا اما نفترق

_ نفسي تكون زيك يا دينا، في كل صفاتك وتصرفاتك

(دينا بتتلخبط، بترتبك، وبتطلب انها تنزل من العربية)

_ أنا آسف يا دينا .. مقصدش حاجة والله

(أقنعها تكمل الطريق معاه، لحد ما وصلت ونزلت)

_ سلام يا أستاذ سامي..

(سامي بص شاور لها عادي بالتحية، لحد ما بعدت، وهو بيراقبها بعينه، وقال بصوت واطي)

_ سلام يا دينا .. سلام يا بابا

ـــــــــــــــــــــــــــــــــــــــــ

في أول الشارع بتاع سامي، كانت عربيات الشرطة والتموين، والصحة، ورئاسة الحي، واقفين عند مطعم (ترميلة) والناس واقفة بتتفرج..

والموظفين خارجين بقطع اللحم النيء، وبيحملوه في العربيات..

والشرطة بتقبض على صاحب المطعم، والطباخين، وبيركبوا عربيات الشرطة)

سامي بيوقف عندهم يسأل:

_ حصل ايه يا جماعة، هو ايه التجمع ده

_ الحكومة اكتشفت ان مطعم ترميلة اشترى صفقة لحمة فاسدة، وبيقدمها في وجبات للناس..

_ يا نهار اسود .. دول فاتحين ليهم خمس سنين، الحكومة اكتشفت اللحمة الفاسدة النهاردة

_ شحنة اللحمة الفاسدة دي ليها يومين .. والصحة اكتشفتها بعد ما أكتر من عشرين حالة راحت المستشفى من المنطقة هنا بسبب تسمم في وجبات المطعم ده..

(سامي بيسرح مع نفسه)

_ يا نهار اسود .. يعني نيفين كانت تسمم

(سامي بيركب عربيته وبيجري على البيت)

ـــــــــــــــــــــــــــــــــــــــ

في شقة سامي..

كان الأب ونيفين، منتظرين الجيران علشان يعالجهم بالقطة من الحسد..

نيفين بتجري على سامي وبتحضنه..

_ سامي .. وحشتني أوي

_ انتي كويسة يا نيفين .. حصلت لك مشاكل صحية؟

_ انا ماشية حلو على العلاج، ودلوقتي بابا هيعالجنا من حسد القطة

_ حسد ايه وقطة ايه؟ انتوا مش دريانين باللي حصل ولا ايه؟

_ حصل ايه؟

_ مطعم ترميلة اتشمع بالشمع الاحمر، والشرطة قبضت على أصحابه، والاستاف بتاعه كله

_ ليه كده؟

_ اتضح انه بيقدم وجبات لحوم فاسدة، وفي أكتر من عشرين حالة حصل لها تسمم في المستشفى، يعني أكيد في عشرين غيرهم كانت آلامهم خفيفة، أو راحوا عيادات خارجية، زي نيفين مثلا.

(نيفين مندهشة)

_ يعني مش القطة اللي حسدتني وحسدت نهلة وماجدة

_ لو كانوا أكلوا وجبات من مطعم ترميلة، يبقى تسمم

_ اه، أكلوا من هناك

_ يبقى تسمم

(نيفين فرحانة، وبتحضن سامي)

_ انا مش مصدقة نفسي، الحمد لله، التسمم ليه علاج، لكن لو حسد معرفش كان هيحصل ايه؟ كنت هتضيع مني يا سامي

(سامي قعد معاها، وقدام باباها، وقال لها إن القطة عمرها ما كانت سبب مشاكلهم، ولا الحسد ولا الكلام ده)

_ لازم تركزي لحياتك شوية يا نيفين .. علشان لما القلب يميل لواحدة كاملة الأوصاف بعد كده، متيكونش فيه ملامة

_ واحدة كاملة الأوصاف؟ قصدك مين؟

_ مقصدش حد بعينه، بس أنا إنسان، مش ملاك .. وان صبرت سنة مش هصبر سنتين..

_ انت بتهددني يا سامي؟

_ شفتي كده، أهو انتي عايزة تتخانقي على كلام عابر بقوله واحنا نحط النقط على الحروف.

(الأب بيتدخل)

_ جوزك بيتكلم صح يا نيفين .. حافظي على بيتك يا بنتي .. مش بس الفجع في الأكل اللي كنتي فيه، اهتمي بكل تفاصيل بيتك .. بدل ما تيجي واحدة تهتم بتفاصيل جوزك وتخطفه منك..

(نيفين بتبص على سامي بمنتهى الثقة)

_ سامي راجل، ومش من السهل إن واحد تخطفه..

_ سامي كائن حي، وإنسان ضعيف يا نيفين .. وأكيد مش هيستحمل حياة زي اللي كنا عايشينها الفترة اللي فاتت دي

(نيفين بتعيد حساباتها مع نفسها، وبترضخ للنصايح)

_ حاضر هنفذ كل اللي اتفقتوا عليه .. بس تقول لي، ازاي تسمح لنفسك ترقص مع رانيا، ما دمنا بنتعاتب.

_ مش هقول لك اني اتحطيت في الموقف ده غصب عني .. وبعترف اني غلطت .. وان مكنتيش رجعتي البيت، كان الغلط هيتطور للجواز منها أو من غيرها..

(الأب بيقطع الحوار)

_ ملوش لزوم الكلام الكتير ..

(بيبص على نيفين)

_ نورتي بيتك يا بنتي .. وياريت تحافظي عليه، علشانك وعلشان جوزك وبنتك

_ حاضر يا بابا .. معلش تعبتك معايا

_ حاضر بجد .. ولا حاضر فض كلام..

_ هحاول والله يا بابا .. هحاول.

_ خلتونا نظلم القطة في مشاكلكم ومشاكل جيرانكم

_ احنا كده يا عمي .. بنعمل كل المصايب، ونلفق التهمة لأضعف الكائنات..

والدليل ان اتهمنا قطة ضعيفة بخراب بيتنا، واللي كان السبب فيه اهمالنا .. واتهمناها بمرض الجيران، مع ان السبب فيه هو غياب ضمير أصحاب مطعم الترميلة..

يا ريت نحط إيدينا على الأسباب الحقيقية للمشكلة، قبل ما نتهم بعض، أو نتهم غيرنا..

(وانتهى الأمر بالتصالح .. وظهور براءة القطة)

القصة خلصت..

تأليف سيد داود المطعني

Post Views: 16

اترك تعليقاً إلغاء الرد