سامي في الشغل..
كل واحد من زمايله على ديسك صغير وقدامه اللاب توب بتاعه، وكلهم جنب وقصاد بعض في شكل دائري (راوند).
رانيا معاها ساندويتشات ورايحة بيهم ناحية سامي..
_ خد يا سامي أفطر..
_ ميرسي يا رانيا .. مليش نفسي.
_ ما اهو انت لازم تفطر يا سامي .. انت شارب تلاتة قهوة بدون فطار.
_ معلش يا رانيا .. وحياتك تبعدي الأكل ده عني.
(رانيا بترسم على وشها ملامح الزعل كأنها مقموصة)
_ أخص عليك .. كده تزعلني .. عموما الحق عليا اني مشغولة عليك وخايفة على صحتك
(رانيا بترفع الأكل .. وبتتحرك ببطء شديد علشان تسيب له فرصة يوقفها، ويحاول يرضيها)
_ استني يا رانيا
_ عايز ايه؟
_ هاخد ساندويتش واحد علشان متزعليش
_ تؤتؤ .. انت هتفطر بالساندويتشات دي كلها، علشان تعرف تركز .. وانا هروح أعمل لك الشاي بنفسي..
_ لالا .. انتي كلمي البوفيه يبعت لنا اتنين شاي..
_ اسمع الكلام يا سامي .. أنا هروح أعمل لك الشاي بنفسي على رواقة .. على ما تفطر
(رانيا بتبتسم له، وهي بتهيأله الساندويتشات قدامه … وسامي بيبتسم لها)
_ تسلم ايدك يا رنوش
_ بالهنا
(رانيا بتسيب سامي وبتمشي)
………………………………….
دينا زميلتهم في المكتب، بتتابعهم من بعيد، وبتبص لرانيا نظرات غضب.. ومش عاجبها الموقف..
نادت على رانيا اللي رايحة البوفيه تعمل شاي..
_ لحظة رانيا..
_ خمسة وراجعة لك يا دينا..
(دينا بتتقدم عليها توقفها من أيدها)
_ عايزة ايه يا دينا..
_ اللي انتي بتعمليه ده مش حلو في حقك، ولا حلو في حق سامي..
_ اللي هو ايه ده يا ست دينا.
_ ساندويتشات مخصوص من بين كل الزملاء … ورايحة البوفيه تعملي له الشاي
_ سامي زميلنا يا دينا، وكل الزملاء عارفين اننا اقرب أصدقاء لبعض
_ كل ده حلو يا رانيا .. بس لما تكون علاقته بمراته كويسة … لكن لما يكون متخانق مع مراته .. مينفعش تزودي اهتمامك بيه .
_ بالعكس يا دينا .. ده احنا كلنا المفروض نهتم بيه الفترة دي، علشان نعوضه عن النقص اللي في حياته..
_ تعوضيه عن النقص اللي في حياته يا رانيا، ولا تحسسيه بالنقص اللي في حياته..
_ مش فاهمة .. انتي عايزة تقولي ايه يا دينا م الآخر كده..
_ عايزة أقولك أن اهتمامك بيه في فترة خذلان مراته ليه، هتخليه يكره نيفين أكتر، ويشوفك بعين تانية يا رانيا .. وأكيد كده فهمتي قصدي..
(رانيا بتبص لدينا من فوق لتحت، وبتسيبها وتمشي)
………………………………………………..
القطة كوكي قاعدة لوحدها في البيت .. بتماوي، جعانة، وبتدور على حاجة تاكلها لكن مفيش فايدة..
بدأت تدور على مكان تخرج منه وتسيب البيت، لكن مفيش فايدة للهروب..
راحت عند باسكيت الزبالة، بدأت تنكش، وتفتش، علشان تلاقي حاجة، لكن مفيش فايدة..
(القطة بتجري ناحية الباب، وهي بتتلوى من الجوع، وقوتها بدأت تضعف، واستسلمت للجوع، وأعصابها اترخت، وقعدت جنب الباب..
…………………………………………….
في بيت أهل نيفين .
كانت تعبانة، وبطنها بتوجعها أوي، والألم ليزيد عليها .
وواحدة ست بتضرب لها حقنة مسكنة.. والأم بتدمع..
والطفلة رؤى بتبص عليهم ساكتة.
_ هي ماما بطنها بتوجعها كتير أوي كده ليه
_ هتخف يا بنتي وهتبقى كويسة
_ أنا عايزاه تخف بسرعة علشان نرجع عند بابا، علشان كوكي وحشتني أوي
_ مين كوكي دي
_ القطة بتاعتي يا جدو
_ اللي حسدت ماما
_متقولش على كوكي حاجة وحشة يا جدو .. علشان مخاصمكش
(أم نيفين، حاسة بأسى زي أي أم، علشان بنتها اللي تعبانة)
وبتسأل الأب
_ هو حسد القطط ده بيتعالج ازاي؟
_ عادي خالص, هنجيب القطة اللي حسدتها، ونخليها تأكل قدامها عادي، وتأكلها معاها، علشان تعالج الحرمان اللي حسست بيها القطة آخر مرة
(الطفلة رؤى افتكرت جوع قطتها، وبدأت تعيط)
_ كوكي جعانة .. زمانها بتعيط دلوقتي .. يلا نروح لها البيت يا ماما
_ هو انتي قلقانة على كوكي يا رؤى ومش قلقانة عليا
(الجد بيحاول يهديها)
_ هنروح عند الدكتور بماما، وبعد كده تعدي على شقتكم، نجيب كوكي معانا.
( الكل بيستعد للخروج)
……………………………………………….
في العيادة..
الدكتور بيكشف على نيفين، وبيستغرب إنها كويسة، ومفيش سبب واضح للآلام اللي عندها دي.
_ ازاي معندهاش حاجة يا دكتور ، أومال الآلام دي كلها ايه
_ مش شرط تكون الآلام أسبابها عضوية، ده في مشاكل صحية كتير بتكون أسبابها نفسية
_ يعني نعرضها على طبيب نفسي
(نيفين بتبص على أبوها)
_ طبيب نفسي ايه يابابا .. هو انت شايفني بشد في شعري
(الدكتور بيبص لها)
_ انتوا فاهمين الطب النفسي غلط يا جماعة
_, لا غلط ولا صح يا راشد .. اكتب لي أي حاجة تمنع الترجيع ده، وتسكن آلام التقلصات كمان، وبالمرة اكتب لي على فاتح شهية، علشان بجد من امبارح مليش نفس آكل حاجة
(الدكتور بيكتب لها اللي عايزاه)
………………………….
في العربية.
الأب بيحكي مع نيفين بكل ثقة
_ أنا جربت الطريقة دي قبل كده لما كنت بشتغل في العريش ورفح زمان
_ يعني في أمل يا بابا
_ طبعا يا نيفين .. بس من شروط العلاج، انك تكوني متأكده إن اللي بيحصلك ده كله بسبب حسد القطة
_ ده أنا متأكدة أوي أنها هي يا بابا، ده انا حتى فقدت شهيتي عن الأكل .. فقدت الشهية يا بابا..
_ كده هيكون العلاج سهل … دلوقتي نطلع شققتك نجيب القطة انا ورؤى، وبعد كده نطلع على بيت ننفذ العلاج
……………………………………………………
سامي رجع من الشغل بدري..
بيفتح باب الشقة, القطة بتحس بيه … بتقوم من مكانها …
بمجرد ما يتفتح الباب .. بتخرج جري من الشقة بدون ما ياخد باله..
(سامي كان مستعجل .. دخل أخد حاجة وخرج بسرعة وهو بيتكلم في الفون)
_ قلت لك اسبقيني على هناك يا رانيا .. وانا مسافة السكة، هسيب الفايل ده في المكتب وهحصلك على هناك.. يلا باي يا رانيا .. باي..
(سامي بيخرج بسرعة وبيقفل الباب وراه)
…………………………………………………
في بيت أهل نيفين..
دينا (زميلة رانيا وسامي) قاعدة مع أم نيفين وبتشرب قهوة
_ فهميها يا طنط إنها لازم تاخد بالها من بيتها وجوزها … في ناس متربصة بسامي .. ما صدقوا أنه يتخانق مع مراته علشان يرموا شباكهم عليه
_ ناس مين دول يا بنتي
_ بدون ذكر أسماء يا طنط … بس أنا بجد خايفة على نيفين وخايفة على سامي وخايفة على رؤى
_ أنا متأكدة أن قلبك عليهم يا بنتي .. بس يا ريت تستنيها وتعقليها بنفسك
_ ما انتي عارفة يا طنط إنها مش بتديني فرصة أكلمها ولا أقنعها بحاجة..
………………………………………..
في شقة سامي..
رؤى وأبو نيفين بيدوروا على القطة ومش لاقيينها
_ كوكي … يا كوكي … انتي فين يا كوكي ..
(رؤى بتعيط .. وجدها بيفقد الأمل، وبياخدها وبينزل بيها تحت، عند نيفين اللي منتظرة في العربية وبينطلقوا كلهم، بيرجعوا البيت..
……………………………………..
رؤى بتعيط في البيت، وبتقول لأمها أنها السبب في ضياع كوكي..
ونيفين بتعيط لأن الأمل في العلاج ضاع
والام متحسرة..
وأبو نيفين بيحاول يعمل لها رقية على علبة مية، ومسك وبخور يمكن تتعالج..
(أم نيفين بدأت تحكي لها عن دينا ووصيتها أنها تاخد بالها من جوزها علشان في واحدة هتلطشه منها..
(نيفين بتتصل ب دينا علشان تعرف مين الست اللي هتلطش منها سامي)
وهي بتتصل … والتليفون بيرن .. .
نيفين بتدووخ وبتوقع مكانها .. وبيغمى عليها..
تأليف/ سيد داود المطعني
قصة القطة الحاسدة. الجزء الثالث
.
.
.
.
