-اوعي تفتكري اني اتجوزتك حبا فيكي …أنا عمري ما هحبك…أنا اتجوزتك عشان الفلوس متروحش بعيد…
كان عمار بيز*عق ومنفعل وانا المسكينة كنت بنسف حلة ورق العنب اللي امي عملتهولي عشان نتعشي بيه ..
.هو مفروض كنت اغير فستان الفرح بصراحة …لكن مقدرتش اقاوم ريحة ورق العنب …أنا عايزة ابوس دماغ اللي اخترع أننا نحشي ورق العنب ونأكله…يا سلام ياريت الرجالة كلهم يتحولوا لورق عنب ونخلص واهو يبقالهم فايدة ..
-سمعتيني يا آسيا بقول ايه …قولتلك اني مبحبكبش عشان متحطيش امل اني احبك ولا حاجة …
دخلت في بوقي صابعين ورق عنب في وقت واحد وفضلت امضغهم ببرود وقولت:
-جرا ايه يا ابو الصحاب ..ما تهدي كده وتقعد ليطقلك عرق .
-ابو الصحاب!!!
قالها عمار بذهول وغضب وبعدين كمل :
-فعلا لوكال …
ضحكت وقولت بإستفزاز:
-سيبنالك البرستيج يا عمار …المهم انت متعصب ليه يعني ..اتجوزنا وخلص الموضوع ..
كتف ايديه وقال:
-انا مش متعصب أنا بقولك بس اللي فيها عشان متحطيش امل عليا …
هزيت كتفي وقولت:
-وانا مش حاطة امل ولا حاجة …انت ليه محسسني اني دايبة فيك وهمو*ت عليك ؟!
ينيلك فاكر نفسك عمرو دياب !!ده انت ابتلاء …ده انا دايما بقول اللي هتتجوزك اكيد امها داعية عليها طول رمضان …وانا اللي لبست …شكلها امي لما داعت عليا اشوف الم*رار في حياتي دعت بضمير واهو اتجوزت المر*ار ذات نفسه …
اتعصب عمار وقال:
-والله ما فيه حد مر*ار غيرك يا ام لسان طويل …أنا معرفش ازاي اتبل*يت بيكي أنا. …
اتنهدت بزهق وقولت:
-هو انت هتقعد تصيح طول الليل …مش عايزني اتعامل كأني مراتك قول كده ومتقلقش الجوازة دي من اولها باينة …جوازة مصلحة عشان الشركة اللي بين ابوك وابويا وقت ما يدونا نصيبنا فيها هنتطلق ولا تزعل …
.
.
-يعني انتي مفيش في بالك اي مشاعر كده ولا كده من ناحيتي .
شاورت علي نفسي وقالت:
-بالله عليك ده منظر يكون عنده مشاعر !يا بني انا شيلت القلب عشان أوسع معدتي يمكن تقدر تهضم العك اللي بعكه…اقعد يا راجل بلاش دلع …كل ورق العنب ده طعمه دمار …
بص عمار لحلة ورق العنب ولقاها قربت تخلص وقال بصدمة :
– انتي نسفتي حلة ورق العنب كله …
بصيت للحلة بخضة وقولت:
-يخربيت الزولم يا اخي لسه فيها صفين اهم …اقعد يا راجل ومتقلقش فيه حلة تاني واعرف ان معدتك المسكينة ملهاش ذنب في مشا*كلك الاجتماعية والمالية…
هز كتفه وقال:
-تصدقي عندك حق…
وبعدين قعد جمبي ووفضل يأكل …
ض*ربته علي كتفه وقولت:
-براحة شوية علي ورق العنب …
.
.
….
والحمدلله بعدها اتفقنا وقررنا نصبر لحد ما ناخد الفلوس …
….
-حرام والله أنك تنوميني علي الأرض ..
قالهالي عمار وهو متضايق …
شديت الغطا عليا وقولت :
-يعني راجل جنتل زيك هيخلي مراته تنام علي الأرض …متوقعاش منك بصراحة …
.
.
-لا طبعا بس ممكن انام جمبك …
ضحكت وقولت:
-لا ده في احلامك يا حلو …ونام دلوقتي بدل ما اجيب كرشك مش كفاية اكلت حلة ورق العنب التانية لوحدك ..
ضحك عمار وقال:
-انتي صحيح مف*ترية …
وبعدها نمنا ….
.
.
…
تاني يوم …
حسيت بجرس الباب بيرن جامد في ودني…صحيت من النوم وانا مش فايقة اصلا ومشيت ناحية الباب …مكنتش فاكرة اصلا أنا فين للدرجة اني خبطت في الحيطة …فوقت نفسي ولقيت الباب اخيرا …
فتحت الباب وشعري منكوش زي العف*ريتة عشان فجأة الاقي اهلي واهل عمار قدامي وابتدوا يصر*خوا بر*عب لما شافوا شعري المنكوش …فأنا صر*خت زيهم !!
يتبع
#جوازة_الندامة
#سولييه_نصار
.
.
قصة جوازة الندامة. الجزء الثاني
.
.
.
.
