فجأة وقفت سندس وخلت الكُل يستغرب، وقفت قُصاد سامي اللي إبتسم وقال – سامحتِـ…
قطع كلامه ضربة من إيدها على وشه سكتته، عبد الرحمن حط إيده على وشه وكأن هو اللي اتضرب وهمس لحسام – شوفت الكف العُشاري دا يالا.!
إبتسم حسام بفخر ووقف جنب أخته وقصاده سامي المصدوم من ضربها ليه وجنبه واقف عبد الرحمن اللي بص في ساعته وقال – لأ إنجز يلا، ورانا مصالح وتجهيز قاعة بعد 3 شهور عِدة، طلَّق وإنجز..
كان سامي بيتنفس بسرعة وهو بيبصلها بغِل وهي واقفة قصاده ببرود ظاهري عكس دقات قلبها السريعة وكفوفها اللي ضماهم لبعض بقوة.
– أنتِ طالق يا سُندس..
اخدت سندس نفس طويل وابتسمت بسعادة وكأنها اتحررت مِش اتطلقت، مِسِك حسام كف إيدها بيطمنها وقال وهو بيبص لسامي ببرود – بالتلاتة..
جز سامي على سنانه وكمِل – أنتِ طالق يا سندس..
بصله عبد الرحمن بترقب وحماس لباقي كلامه وسامي قال آخر كلامه – أنتِ … طالق … يا سُندس.
غمض عبد الرحمن عينه وقال وهو بيمسح على صدره – آآآه، حاسس إني اتغسلت من جوة.
.
.
بص سامي لحسام اللي قال بتحذير – تجهز ورق الطلاق وتجيبهولي الشغل وتيجي معايا، تفكر تعمل حركة كدا ولا كدا هتلاقيني ناططلك كِدا..
قالها وهو بيقرب ايده من عينه بدرجة كبيرة فَـ سامي اتخض ورجع لورا، حاوط عبد الرحمن كتف سامي وقال وهو بيلف ويمشي معاه ناحية باب البيت – شوف كدا باب الشقة عايز منك اي!!
فتح عبد الرحمن واتفاجئ من هجوم أبو حسام وأم سامي على جوة وهما بيزعقوا، وموقفوش غير على جملة سامي – طلقتها خلاص…
لفتله أمه اللي قالت وهي بتقرب منه – بمزاجك!
بصت لحسام وعبد الرحمن وكملت – ولا حد عملك حاجة!
إبتسم حسام بسخرية وقال – طب كويس إن حضرتك عارفة إنه لا مؤاخذة يعني مش راجل وبيتعلم عليه..
كانت لسة هتزعق بس شدها وقال وهو بيبص بصة أخيرة لسندس – تعالي ياما، يلا نمشي..
زعقت – نمشي! نمشي دا اي؟ دانا مش هسـ…
.
.
قامت نبيلة وقفت قصادها وزعقت – أنا ساكتة من الصبح يا ست أنتِ على حركاتِك دي، لكن أنا مبحبش بيتي يتملى بالاصوات الكريهة دي! يا تخرجي بالذوق يا تطردي بالأدب.
طبطب عبد الرحمن على كتفها وقال بفخر – جدعة يا نبيلة، هو دا الكلام يا جامدة..
بالفعل خرج سامي ومعاه أمه اللي مبطلتش زعيق وغَلط في سندس واخوها، خرج ابو حسام اللي وقف قصاده وقال – مخلصتش يا حسام، مخلصتش يابني..
.
.
قالها بتريقة قبل ما يكمل وهو بيبص لسندس بنظرة مرعبة – وهجيبك برضو، عشان مبقاش راجل كبير كدا وولادي يغفلوني عشان المحترمة بتخون جوزها..
قال الأخيرة وهو بيبص لعبد الرحمن اللي رفع شفته لفوق وقال بقـ.ـرف لنفسه – ذكر حرباية بيتكلم، يا ستير!!
.
.
خرج أبو حسام وحسام حضن سندس وطبطب على ضهرها وهمس في ودنها وهو بيمسح على رأسها – مرضية.!
بعدت عنه وقالت بهزار – يعني..
.
.
رد عليها وهو بيضحك – والله اروح اجيب سامي اطلع غِلي فيه، هه..
ضحكت وهو بص لعبد الرحمن اللي كان بيكلم نفسه – عُقبال حضن كتب كتابك يا بودي أنت وسُنسُن..
فاق على صوت حسام – شكرًا يا عم عبدو، والله مَـ عارف اقولك اي.!
قرب منه عبد الرحمن وحط ايده على كتفه – متقولش ياض.! مفيش بينا كدا..
إبتسم حسام وعبد الرحمن كمِل بثقة – اعمل! أنا بحب الأفعال مش الأقوال..
ضحك حسام – واطي يعم، بس قول عايز اي.!
رد عليه بكل ثقة – جوزني سُنسُن أختك..
شهقت نبيلة وضربت على رجليها بصدمة – يلهوي!!!!!!!!!!
– جوزني سُنسُن أختك..
شهقت نبيلة وضربت على رجليها بصدمة – يلهوي!!!!!!!!!!
كانوا ساكتين كلهم بيبصوا لعبد الرحمن بصدمة وهو على وضعه بيبتسم بثقة، شدته نبيلة من دراعه وبصت لحسام وقالت وهي بتضحك بتوتر – ياني على هزاره البايخ دا…
بصت لعبد الرحمن وقالت وهي بتجز على سنانها – عيل سمج ابن سمجة من يومه.
عبد الرحمن رفع حاجبه بإستغراب وهي برقتله بعينها عشان يسكت، طبطبت نبيلة على ضهر سندس وقالت وهي باصة لحسام – روَّح أنت دلوقتي يا حسام وسُنسُن معايا هنا متخفش..
بصلها عبد الرحمن بتريقة وهو بيهمس لنفسه وبيربَّع دراعه – سُنسُن.! هه طالع منك زي السِم ياما يلا بقا هه.
سندس بصت لحسام وقالت بإحراج وهي بتبص لنبيلة – لو سمحتِ يا طنط هنزل مع حسام اجيب حاجة وأطلع.
– حاجة اي بس يابنتي! قولي لو عاوزة حاجة وانا ابعت الواد عبدو يجيبها دا هـ..
قطع عبد الرحمن كلامها لما لاحظ نظرات سندس لحسام وكأنها عايزة تقوله حاجة – مَـ خلاص يا نبيلة سيبي البنية تنزل مع أخوها الله؟
بالاهل نزلت سندس مع حسام وركبت معاه العربية وهو باصصلها مستني يعرف سبب نزولها معاه، قالت سندس وهب بتلف تبصله – كنت عايزة اتكلم يعني بخصوص نيرة..
وشه اتقلب وبص قدامه ورد عليها – متجيبيش سيرتها خالص قدامي يا سندس، أنا بجد مش طايقها.
– بس دا حقها يا حسام.
جملة قالتها خليته يركز معاها وهو بيسألها بإستغراب – حقها.! هو اي اللي حقها يا سندس! بعدين في حاجة أنا عايز أعرفها هي قالتلك اي خلاكِ تنزلي من البيت!
اتنهدت سندس وقالت – مش مهم يا حسام، المهم إن نيرة حقها تزعل، أنا في نقطة مخدتش بالي منها وهي أيام خطوبتك منها، كنت فعلًا بتخرجني معاكوا معظم الخروجات فَـ يمكن دا ضايقها..
– مش كل الخروجات يا سندس، مش كلها كنتِ بتبقى معانا فيها دا غير إن يعني..
سكت ومكملش كلامه وهي بصتله بترقب قبل ما يرجع يكمل بإحراج – مكنتش بحب اكون معاها لوحدنا، وهي مكنش عندها اخوات ولاد حتى ابوها كان بيرفض يجي كَـ محرم فكنت باخدك معانا..
– يا حبيبي أنا والله فاهمة قصدك بس هي لأ، يمكن في مرة كانت حابة تحكيلك على حاجة مثلًا واتكسفت مني، أكيد حصل كدا..
– مَـ تبرريش ليها يا سندس، نيرة غلطت وأنا مش هسامحها بسهولة كِدا..
– مقولتش سامحها بسهولة، بس عاتبها وخليك حنين معاها يا حسام وهي بجد طيبة أوي بس غيرتها مني بس عملت كِدا.
مع كل كلمة قالتها كانت بتفتكر معاملة سامي ليها، قد اي كان نفسها في راجل حنين يفهمها، راجل يحترمها ويقدرها، مش مجرد واحد ماشي ورا كلام أمه.!
هز حسام راسه بماشي وبعدين قال بعد شوية – عبد الرحمن كان بيتكلم بجد يا سندس..
هزت راسها وقالت وهي مبتسمة – أنا ملاحظة طريقته من بدري، بس أنا مش هوافق يا حسام.
بصلها بإستغراب وهي كملت – أنا مش مستعدة ادخل تجربة ذي دي تاني بقول كفاية عليا كدا، بعدين معتقدش طنط نبيلة هتوافق بمطلقة، وكان واضح جدًا من رد فعلها فوق.
ضحك حسام وهي بصتله بإستغراب قبل ما هو يبطل ضحك ويقول وهو مبتسم – أنا اكيد مش هجبرك بس هديكِ نصيحة يا سُندس، عبد الرحمن دا واقع وقعة سودا من بدري وطنط مش كدا، رد فعلها فوق كان بسبب ابنها الغبي اللي بيختار اوقات زفت زيه بس هي..
رجع يضحك تاني وهي قالت وهي بتضحك على ضحكه – في اي يعم!
وقف ضحك تاني – ما علينا، هديكِ نصيحة كمان واتمنى من كل قلبي تعملي بيها، وافقي على عبد الرحمن بعد العدة وخودي فترة زي خطوبة كدا وشوفي بعدها قرارك اي.
اخدت نفسها – إن شاء الله لما يخلص الطلاق الأول يا حسام.
مسك إيدها وابتسم – أنا معاكِ في كل وقت وأي وقت يا سُنسُن..
قال الأخيرة وهو بيهزر معاها وهي ضحكت وهي بتبتصله بشك – الدلع دا شكله وراه حاجة كبيرة..
شغَّل العربية وقال – هوديكِ سوبر ماركت تجيبي منه أي حاجة زي ما قولتي ليهم.
وداها ورجعها تاني بعدين مِشىٰ وهي طلعت ليهم تاني، كان الباب متوارب وهي كانت هتخبط برضو احترامًا للي جوة لكن إيدها اتعلقت في الهوا وهي سامعة صوت نبيلة العالي – يخربيت سنينك.! يابني أنت عايز تشلني، مَـ تجادلنيش أنا أدرى بمصلحتك..
قعدت نبيلة وقالت بزهول وسندس لسة سامعة كلامها – يلهوي.! جواز.! ومن سندس.! دانت اتهبلت باين؟!
رواية انا وهو وامه. الجزء الثامن الأخير ررر
.
.
.
.
