مشكلة عضو
.
.
.
.
أنا عمري ٤٧ عام متجوز وعندي ولدين وبنت .
كنت شغال بالسياحة من عشر سنين بكسب كويس جدا وعملت فلوس
كويسة من السياحة وبعدين اتلعب في دماغي ان فلوس السياحة حرام.
فهجرت المجال كله برغم اني كنت بكسب كويس جدا وبرغم اني صرفت
فلوس كتير على التعليم بالخارج والداخل لاستخراج ترخيص وتصريح أرشاد
سياحي لكن بالنهاية رميت كل ده وتركت المجال كله عشان مبقاش بعمل حاجة حرام.
هنا كانت نقطة التحول بحياتي وبسببها دنيتي باظت
سيبت الشئ اللي بفهم فيه ودخلت في تخبيط الدنيا بأشياء لا أفهم بها .
خدت القرشين واشتريت ٤ شقق في ٢٠١٥ عشان أأجرهم وأكل منهم
عيش فقابلت أشكال واصناف أصعب من كلمة بشر منهم اللي مش عاوز
يدفع الإيجار أو يتأخر بالدفع واللي يأجر الشقة للغير من الباطن واللي يخرج
سارق المفارش والبطاطين واللي عامل فاتورة كهرباء كبيرة وتامينه مش
مغطي أستهلاكه ومش عاوز يدفع. ده غير خناقات وزهق ومحاضر شرطة
وقلة قيمة فقرفت وقلت مش هأجر تاني .
حاولت بعدها أوجد حل لموضوع الرزق بعيد عن التعامل مع البشر
فدخلت في مصيبة أعظم وهي اني بدءت تداول بالبورصة واشتريت أسهم وسندات
وكل شوية بقيت اخسر واتجنن فاروح ابيع حاجة من اللي عندي عشان
تعوض الخسارة الأولى على أمل اني اعوض فأخسر أكتر. ابيع تاني واقول
اعوض اخسر أكتر واكتر وبقي عندي مرض اسمه التداول بالبورصة.
لدرجة ان كان عندي عربية بعتها و٣ شقق وأرض وذهب بعتهم كلهم
وخسرت كل فلوسهم في البورصة .
حياتي أصبحت جحيم وبؤس من كثرة الخسارة .
حاولت ارجع تاني اشتغل بالسياحة قالوا سنك كبير مش هينفع.
حاولت اسافر مفيش فرصة أو اشتغل بالتدريس عشان معايا لغات
يقولوا لغتك حلوة وكويسة ولكن لازم تخصص تربوي.
زهقت وحاليا بمشاكل مع زوجتي ونكد بسبب الفلوس اللي راحت.
حتى الشقة اللي فضلت من الأربعة شقق مبقتش عارف أأجرها
ولا بصرف عليها عشان أسكنها كويس. اللي الجاي على اد اللي
رايح مفيش فائض وأحيانا تتأجر وكتير لا .
اعصابي باظت ومش عارف اتعامل مع الناس وبقيت كئيب ودايما
سايب البيت والعيال بسبب المشاكل والفلوس. خايف ابيع الشقة الأخيرة
اللي حيلتي بخسارة وتضيع فلوسها زي اللي قبلها وخصوصا عندي بنت علي وش جواز.
أنا بتكلم لغتين اجنبية كويس جدا ومتعلم ومعايا شهادات من جامعات بمصر وروسيا،
رياضي مش بدخن ولا بتعاطي مخدرات ولا لية في صدقات ولا ستتات وملتزم بديني،
ولكن مصيبتي السودة كانت مجال البورصة وخسارة شقى السنين فيها ده غير الوقت.
تنصحوني اعمل ايه انا نفسيتي مدمرة بقت صعبة جدا ومش قادر اقاوم كسرة النفس
والأحباط اللي جوايا من تراكمات العشر سنين اللي فاتوا ولا عارف أبدء منين ولاه أزاي.
بالله عليكم انا محتاج دعمكم بنصيحة أو توجيه نفسي معنوي لاني تعبان جدا
من جوايا مش قادر افكر ومش قادر اتكلم مع حد يشمت فيا
وبعيد حاليا عن بيتي وعيالي مش قادر ارجع .
.
.
