بعد نص الليل، الناس كلها نايمة.
أم ديمة وأبوها سهرانين في الصالة جنبها، علشان عندها أرق، خايفين يسيبوها لوحدها تعمل حاجة في نفسها..
البيت كله على أعصابه المشدودة، مفيش حد عارف يتنفس حلاوة الحياة بعد اللي حصل..
المجرم عادل لسة هربان، والندل أكرم خلاص قطع علاقته بيها، ونسي تضحيتها وكل حاجة حلوة كانت بينهم..
لميس ورهف ورضوى مش بيخرجوا من يومها، ومفيش حد عارف مين فيهم المجرمة اللي ساعدت عادل على العملة السودة اللي عملها دي..
مي في بيتها لسة صاحية، وعملت حساب جديد ع الفيسبوك، علشان تبعت منه صورة الخاينة دي لصاحبتها ديمة..
أيوة فعلا .. هي شافتها واقفة مع عادل بعيد عن الكوافير يوم الفرح، وقبل ما العروسة تاخد دورها جوة.
كانوا بيتكلموا، شكلهم كان مفضوح..
ليه واقفين بعيد؟ ايه العلاقة بينهم؟
ده اللي خلى مي بكل ذكاء تصورهم، كأن قلبها حاسس إن في مصيبة زي دي هتحصل .. بس الخوف يمنعها تتكلم..
عملت حساب ع الفيس باسم “الخاينة”..
وبعتت رسالة ل “ديمة” اللي من يومها وهي بتضيع وقتها كله ع الفيس، علشان تخرج م الحالة اللي هي فيها، علشان تعيش في العالم الافتراضي اللي مفيش فيه حد بيشوف وش التاني، ولا بيركز في شكله، ولا بيهتم بهيئته..
مي بعتت الرسالة وهي متأكدة إن صاحبتها هتشوفها..
كتبت فيها إن أعز صاحباتك أهي، كانت واقفة مع ابن عمك اللي عمل فيكي البلوى دي .. أتمنى إنك تتصرفي بكل عقل..
ديمة لاحظت الرسالة في طلبات المراسلة بعد ساعة بالظبط، فتحتها .. ركزت في الصورة ..
كانت هتتجنن..
ثارت ثورتها..
بدأت تصرخ ..
تجري في البيت زي المجنونة..
_ شفتي يا ماما .. الكلبة أهي يا ماما .. المجرمة أهي يا ماما .. بعد العشرة دي تخونني ..
آآآآآآآآآآآآآآآآآآآآآآآآآآآآآآآآآء ..
صراخ طويل .. مش مصدقة اللي شافته بعينها..
أمها وأبوها بيجروا ناحيتها يسألوها حصل ايه ..
ديمة حست إن أهلها نفسهم خطر عليها .. خافت منهم .. جريت قدامهم..
جريت زي المجنونة ناحية الشباك المفتوح ..
نطت من الشباك .. من الدور التاسع .. والتليفون في إيدها..
نطت وهي بتصرررررررررررررررخ .. آآآآآآآآآء..
اللي بيحصل ده مستحيل .. ديمة انتحرت ..
الأم بتصرخ .. والأب بتصرخ وبيجروا ناحية باب الشقة..
مش متخيلين اللي حصل قدام عينيهم..
_ بنتي .. ديماااااااااااااا .. بنتي .. بنتي انتحرت .. إلحقوني يا نااااااااااااس .. بنتي انتحرررررررررررررررت.
الأم بتصوت .. والأب بيصرخ..
سكان كلهم صحيوا على صوت الصراخ..
الكل نزل الشارع .. الشارع زحمة موت ..
الناس والعربيات .. وأصوات صراخ الأب والأم..
ايه اللي بيحصل ده؟
حاجة غريبة أوي!
فين الجثة؟ جثة ديمة فين؟
مفيش جثة .. مفيش دم في الشارع، ديمة ملهاش أثر..
الناس هتتجنن .. مفيش حد مقتنع إنها انتحرت .. ديمة ملهاش وجود.
_ اهدا يا عم الحاج .. انت متأكد إنها انتحرت..
الراجل هيتجنن .. عقله هيطير.
_ اه والله يا ناس .. بنتي نطت من الشباك قدامي، وكانت ماسكة التليفون في إيديها..
_ ممكن تكون اتعلقت في بلكونة حد..
_ مستحيل يا ناااااااس .. مفيش بلكونات للدور الأرضي ع الناصية دي …
الناس كلها بتدور عليها، حاجة غريبة فعلا .. الجيران معتقدين إن أبو ديمة اتجنن .. الأسرة كلها صعبانة عليهم..
بنت فقدت جمالها فجأة .. عروسة فقدت عريسها .. ضاعت فرحتها .. أب وأم مكسورين علشان بنتهم..
أكيد اتجننوا .. ملهاش غير كده .. أكيد اتجننوا … يعني ايه واحدة تنط من التاسع وملهاش أثر .. فين جثتها؟ فين الدم؟ فين التليفون اللي كان في إيديها..
الناس كلها بتدور ..
_ ديمة .. يا ديمة .. انتي فين ديمة؟
ديمة ملهاش أثر .. ملهاش وجود ..
الخبر انتشر، والناس كلها عرفت اللي حصل .. أكرم ونسيم والشرطة، ورهف ولميس ورضوى، ومي، مفيش حد عنده تفسير للي حصل ..
الأب والأم بيحكوا للناس اللي حصل، بنتنا شافت صورة واحدة في التليفون، وصرخت وقالت الخاينة أهي .. أكيد حد بعت لها صورة صاحبتها اللي خانتها، واتفقت مع عادل ابن عمها علشان يرشوا عليها مية النار..
الأم بتفوق على فترات، وترجع يغمى عليها، والأب مش قادر يتلم على أعصابه..
عيون الناس بتكذبهم..
ازاي تنط من التاسع وملهاش وجود..
أكرم راجع من شغله، قعد على كافيه، مش مستوعب اللي بيحصل ده..
بس ايه الكائن الغريب ده، معندوش أي احساس بالذنب، بيقول نصيبها كده، خسارة كانت بنت جدعة..
شرب قهوته، ورجع شقته، اللي المفروض كانت هتبقى شقة الزوجية..
الشقة ضلمة سواد..
فتح الباب، بيدوس زرار النور، انفجر في وشه..
اتخض ..
_ أووووف .. مش وقت قفلة كهربا خالص..
طلع موبايله من جيبه، وفتح كشاف النور .. وبيدخل الشقة..
نور الشقة اشتغل عادي..
ايه ده؟ مفيش قفلة كهربا ولا حاجة..
حاجة غريبة..
دخل على أوضة نومه .. فتح النور .. بدأ يقلع هدومه..
بيفتح الدولاب .. لقى ديمة واقفة في الدولاب .. بنفس الوش اللي اتحرق بمية النار..
أكرم بيصرخ .. رجع لورا بسرعة..
_ ديمة؟ ديمة انتي فين..
_ أنا مش ديمة ..
.
.
_ مش ديمة ازاي؟ انتي بتعملي ايه هنا؟
_ أنا مش ديمة .. أنا لاقيس..
_ لاقيس؟ لاقيس مين؟
_ أنا لاقيس بنت إبليس؟
بيغمض عينه .. مش فاهم حاجة .. بيبص عليها! اختفت من قدامه .. بيدور حواليه عليها مش شايفها..
_ ديمة .. ديمة .. انتي فين ياديمة؟
الصوت ظهرله من فوق الدولاب.
_ انت غبي يا أكرم؟ بقول لك أنا لاقيس مش ديمة..
بيبص فوق الدولاب .. جمسه اترعش ..
دي طلعت فوق الدولاب ازاي؟ وبتعمل ايه؟
دي لسة كانت جوة الدولاب من شوية..
بيبص عليها وهو سرحان..
فجأة…
بقت ع السرير وراه .. صرخت بصوت عالي، صراخ عالي..
_ أكرررررررررررررررررررم..
اتفزع .. لف بضهره ناحيتها .. وجسمه بيفرز عرق .. عرق كتير.. بيحاول يستعيذ بالله من الشيطان .. لكن مش عارف يسيطر على أعصابه.
_ أعو .. أعو … أعوعو .. عوذ عوذ .. أعا .. عوذوو .. ذو..
_ ايه؟ مش عارف تنطقها؟ ولا خايف؟ أنا عارفة انك جبان ومش هتقدر تكملها..
لاقيس بتصرخ في وشه .. صرخة قوية..
_ يا جبان ..
أكرم فقد اتزانه ووقع ع الأرض، وبقى يراقبها..
_ هسيبك تتلم على أعصابك .. خمس دقايق وهرجع لك .. إياك تتحرك من مكانك
في شقة أم ديمة وأبوها ..
لاقيس واقفة قدامهم، بتتفرج على أم ديمة اللي بتبكي وبتضحك عليها..
بتضحك عليها ليه دي؟
اتمشت شوية في الشقة، وراحت فتحت أوضة ديمة، اتجولت فيها شوية، وبصت عليها بنظرة بانودرامية.
وجريت لحد الشباك اللي نطت منه ديمة، ونطت هي كمان.
أوضة نوم لميس في بيت أهلها .. لميس نايمة في سابع نومة..
لاقيس فتحت النور .. لمست وش لميس بإيديها .. بدأت تصحيها بصرخة قوية..
_ لميس..
لميس قامت من النوم مفزوعة .. شافت وش لاقيس المحروق .. نفس وش ديمة.. اتخضت
_ ديمة!
لاقيس ضربتها على وشها .. أغمى عليها ونامت تاني..
لاقيس راحت أوضة نوم رضوى ورهف .. وعملت معاهم نفس اللي حصل مع لميس..
هي بتعمل كده ليه؟
بتعمل كده ليه؟
بتختار أصحاب ديمة كلهم ليه؟
أكرم بسرعة رهيبة .. بيجمع كل هدومه .. وبيشيل الشنطة..
وماسك الفون في يده..
اتصل بأخوه .. يقول له أنا جاي أبات في البيت .. إياك تنام..
إياك تنام .. جاي أنام في البيت النهاردة..
خرج أكرم بسرعة قبل ما لاقيس ترجع..
لاقيس رجعت البيت .. دخلت أوضة النوم .. ولاحظت إن الدولاب مفتوح ومتبهدل ..
بدأت تضحك بصوت عالي..
هاهاهاهاهاهاها .. هاهاهاهاهاهاهاهاهاهاهاها
_ هرب الجبان.. بس هتروح مني فين .. ده أنا لاقيس بنت إبليس .. وانت شغلتي من النهاردة يا أكرم..
هتروح بيت أهلك هتلاقينا هناك يا مغفل..
قصة العروسة المشو هه. الجزء الخامس
.
.
.
.
.
.
