.
.
.
.
.
كسرتني، وسابتني وخرجت، بكيت بشدة، قومت صليت وبكيت في سجدتي، ضغطي انخفض دوخت واغمى عليا، صحيت لاقيت نفسي على السرير، ايدي فيها محلول، دكتورة قاعدة جمبي..
.
.
-أخيرا القمر فاق !
ابتسمت وقومت قعدت، واتكلمت معايا كتير، عشان آكل واهتم بصحتي، سابتني ومشيت.
بعد أسبوع.
.
.
جات طنط منار تسلم على ماما وقالتلها :
-ابني بيدور على عروسة وانا شايفه ان بنتك الله أكبر أخلاق والتزام وأدب واحترام.
.
.
.
.
ردت ماما :
-يا أهلا يا مرحب.
.
.
واتحدد المعاد، جت الرؤية الشرعية، ماشفنيش قبل كدا، وانا ماشوفتهوش ولا أعرفه. خرجت من اوضتي وانا كلي توتر وخوف، سمعت من أختي بتقول إنه وسيم أوي، قعدت ادامه بلبسي الفضفاض العادي، مش حاطة ميكب، قابلته وانا على طبيعتي، طول القاعدة متكلمناش في أي حاجة، بصلي مَرة واحدة وبس، ومشي بعد نص ساعة، بعد يومين اتصل ببابا وقاله نصًا “أنا محستش بقبول معاها” !
ضحكت ماما
-أكيد كان عاوز واحدة جمال وحلاة.
ضحك بابا وقال
-ومين قالك ان الجمال بالشكل، الجمال جمال القلب والروح، لعلمك هو خسر كتير لأن مش هيلاقي زي احترام وأدب بنتي دي، وأكيد ربنا شايلها الأحسن.
عيوني دمعت من كلام بابا ، أول مرة حد يجبر بخاطري بالشكل دا ، بابا قام وقَبل راسي وقالي” متزعليش.. ”
بعد كام سنة اتخرجت من كلية” أصول دين ” بتقدير امتياز ، كنت فرحانة بنفسي جدًا ، وبابا باركلي وعزم العيلة وعمل وليمة ، حقيقي كان فرحان بيا أكتر من فرحتي بنفسي ، بابا حس بيا ، الوحيد اللي اداني الاهتمام.
.
اشتغلت محفظة قرآن في دار تحفيظ، الحمدلله كان عندي اسلوب ممتاز في التحفيظ والاطفال حبوني وكرمت منهم كتير ، واتكرمت أنا مرتين ^^
المدير بتاعها شاب في مقتبل العمر ، مليش أي تخالط معاه ، غير ان بدخل مكتبه آخد مُرتبي وامضي حضور وانصراف ، قرر يطلع الجمعية رحلة وطلب عدد من المُدرسين والمُدرسات، وعمل اجتماع وكنت فيه واتكلم عن المكان و و و الخ.
.
روحت البيت استأذنت والدي فوافق وقالي خلي بالك من نفسك.. فرحت جدًا، وجهزت كل حاجة من أكل ولعب ودف ، واتجمعنا في مكان معين ، وكل فصل ليه اتوبيس خاص بيه ، قعدت ورا خالص وجمعت البنات حواليا وغنيت بالدف اغاني طيور الجنة ، الاطفال انبهروا بصوتي وكل أما أسكت يلحوا عليا أغني ، فرهدوني والله ^^
اليوم دا كان من تاني أحلى أيام حياتي بعد التخرج ، لعب وتنطيط وجري ومسابقات، أيوة كنت بلعب زي الأطفال كنت بستغل غياب المدرسين عن مكان البنات وأقوم العب، حقيقي كنت مبسوطة بفرحة الأطفال، واني مخلتش ولا طفلة مابتلعبش ^^
.
آخر اليوم جمعنا الأطفال ونظمناهم ، ولسه هركب، نده عليا المدير:
-آنسة “نور” لحظة من فضلك.
-خير.
-عاوز رقم والدك عشان هكلمه على مشروع.
بقول مع نفسي*أصلا انت ما تعرفش والدي ولا عمرك شوفته ، وبابا ماعملش مشاريع مع حد* اديته الرقم وطلعت……….. ينبع
