.
.
.
.
فات كام يوم وعادل بيسال ويدور ومفيش حد ظهر يسال عن الطفل … فرحت وقولت خلاص يبقي ده عوض ربنا لنا..وفعلا كتبناه باسمنا وعملنا له شهاده ميلاد وسميته(يس)
كنت كل يوم بسجد شكر لله علي يس الي رجع الفرحه في بيتنا من تاني وعوضنا عن ابننا سيف..
ومرت الايام والسنين ويس بيكبر ومالي علينا الدنيا ومكمل فرحتنا وقدر بخفة روحه يملك قلب الجميع وبقت العيله كلها بتحبه وفرحانه بيه.. خصوصا عادل كان متعلق بيه جدا بطريقه فوق الوصف
وفي يوم جرس الباب رن ولما فتحت لقيت قدامي هاله صاحبتي .. اخدتها في حضني وانا مش مصدقه نفسي وقولت لها اخيرا رجعتي ليا؟ وكان معاها بنوته جميله سالتها مين دي؟ قالت لي دي سلوي الصغيره بنتي.. فرحت جدا انها من شده حبها ليا سمت بنتها علي اسمي..
ولما عادل رجع من شغله وشافها لقيته مكشر وبيقول لها انتي ايه الي رجعك تاني؟
ردت عليه هاله وقالت له ياه للدرجه دي هانت عليك عشرتنا يا عادل؟…قال لها لا ابدا بس انا استغربت .. قالت له انا اطلقت الخاين طلقني بعد ما اخد غرضه مني ورماني وساب بنته .. رد عادل وقال معلش كل شئ نصيب.. قالت له لا .. والله لاندمه علي كل الي عمله واعرفه ازاي ياخدني لحم ويرميني عضم ويرمي بنته.. قال لها مادام سابك سيبيه .. الجواز مش بالعافيه.. قالت له كله كان بالاتفاق وهو الي غدر بيا ..
.
.
معرفش ليه كلامهم مع بعض كان مش مريحني وحسيت فيه بنبره مش عجباني
ضحكت وقولت لهم في ايه يا جماعه انتم عاملين زي العيال ليه؟..
سمعت سلوي الصغيره بتعيط وبتقول لمامتها يلا نروح انا تعبانه.. عادل اخدها في حضنه وقال لها متعيطيش يا سلوي .. مالك يا حبيبتي؟.. قالت له مفيش يا عمو انا بس عايزه اروح..
.
.
وقتها انا اتصدمت .. عادل عرف منين اسم البنت الصغيره؟ .. ولما حضنها كان شكله عارفها قبل كده كانها متعوده علي حضنه.. ولمحت نظرته مليانه شر لهاله وده خلاني اتا كد ان في حاجه غلط
قعدت اقول لنفسي اعقلي ياسلوي يعني هيكون في ايه بينهم؟ انتي عارفه بتفكري في ايه؟..انتي عارفه دول مين؟ .. دول اكتر اتنين حبيتيهم في حياتك .. جوزك وانتيمتك.. اعقلي بلاش هبل.. دي من كتر حبها لكي مسميه بنتها علي اسمك .. اعقلي
.
.
