لبس العيد
.
.
.
.
انا مخطوبه من شهر وكنت بكلم خطيبي لاقيته بيقولي مش عايزه تجيبي لبس للعيد فقولتله.
اه بس في بنطالون جديد لسه مالبستوش هشتري شيميز او بلوزة عليه
واشتري شوز فقالي طب شوفي هتنزلي امتي وننزل نجيب فقولتله
انا كنت هنزل بكرة عشان بكرة الواقفه. فقالي طيب انا هعدي عليكي الساعه 4
نشتري فقولت لماما ووقالتلي ماشي انزلي كتر خيرة والله.
بصي هو كده انتوا هتفطروا برة حاولي تختاري مطعم رخيص عشان ماتكلفيهوش
كفايه انه هيجبلك لبس المهم. عدي عليا الساعه 4.
زي ماتفقنا ونزلنا المهم قالي بتجيبي اللبس منين قولتله
علي مكان بشتري منه دايما. بيني وبينه بالعربية. تلت ساعه.
لاقيته بيقولي تعالي نتمشاها المكان مش بعيد قولتله الجو حر.
هنمشي كتير اووي مانركب اي حاجه قالي. يابنتي المشي حلو في الصيام
مش كنتي عايزه تخسي اهه فرصه. مشينا لحد والله ماكنت مش قادرة امشي فعلا
المشوار كان طويل اووي مشي وحر لحد ماوصلنا عجبتني بلوزة
وخدت رايه قالي حلوة فانا قولت للبنت خلاص تمام هاخدها جينا نحاسب
راح عامل نفسه. انه افتكر حاجه وراح مطلع التليفون واتصل بحد.
فضل اكتر من ربع ساعه برة المحل بيتكلم في التليفون.
فقمت دافعه طبعا عشان كان منظري زفت وانا واقفه
البلوزه تمنها رخيص ب ١٨٠ جنيه. يعني مش حوار.
المهم جيت اشتري الشوز نفس اللي عمله في المحل بتاع اللبس عمله تاني الحمد لله
اني كان معايا فلوس. طبعا اضايقت من الموقف جدا
بس سكت وكان باين عليا اوووي كان باقي علي الفطار نص ساعه.
فبقوله هنروح فين قالي هوصلك وافطر معاكم وبعدين ابقي اروح
اتصدمت طبعا لان امي مش عامله حسابها اصلا.
وكانت بتنضف البيت. وبتفرش الشقه عشان. تنضيف العيد
وماعملتش اكل قولتله مانفطر اي حاحه نروح اي محل
قالي لا عشان ماتتاخريش. تعالي اروحك
.
.
ونفس القصه خلانا مشيناها بردوا. اتخنقت اووي بجد وماما ماكنتش عارفه تتصرف
لانها مش عامله حسابها والبيت مكركب. المهم نزلت اشترت من محل جنبنا سمك فيليه
وتبلته بسرعه وعملت رز وسلطه وجهزت الفطار وصلنا انا وهو بعد المغرب بنص.
ساعه فعلا ماكنتش قادرة امشي. بقوله واحنا ماشين المغرب اذن نجيب ميا
عطشانه كانت الناس في الشارع وزعت علينا تمر وسوييا.
يقولي مانتي شربتي تمر ماتشربيش ميا عشان تعرفي تفطري دخلنا
وماما ياحبيبتي كانت محضرة الفطار وانا علي اخري اقسم بالله من التعب وكتر المشي.
قعد اكل وانا فعلا ماكنتش قادرة اكل ولا اتحرك بعد ماروح بيتهم اتصل بيا
ويقولي هي دي اصول ان امك عارفه اننا هنفطر وتعمل سمك هو في حد
بيعمل سمك علي الفطار.ده حتي ماجبتش جمبري وعامله. سمك
بس انا اتنرفزت عليه وروحت قيلاله ماتحمد ربنا اننا طفحناك
اصلا هو اكل وبحلقه ده ايه القرف ده وقفلت السكه في وشه
ومن وقتها فعلا مش طيقاه وبفكر اسيبه.
انا معايا حق ولا لا. لان امي بتقولي ماشي الدنيا
وماتقفيش علي كل حاحه كده لان ذي تاني خطوبه ليا
.
.
