عندك فرح النهارده في “نجع المخاوي” جهز عدتك عشان في حد من صحاب الفرح هيعدي ياخذك بليل …
النجع …؟؟
لا لا ..!!؟
يا فندم ابعت حد غيري انا عمري مروحت النجع ده وبسمع عنه قصص غريبة …!!
قصص ايه وزفت ايه مفيش حد موجود غيرك في المكتب كل الناس في شغل وبليل تكون جاهز بلاش الدلع ده ..؟؟
افففففف حاضر يا فندم ..
شايل الكاميرا وداخل الفرح ..!
الناس قاعده في الفرح بتبص لبعض والقلق والخوف باين علي وشوشهم ونصهم مكتئب ومكشر والنص التاني بيصطنع الضحكة والابتسامة …
العريس قاعد جنب عروسته في الكوشه بيبصلها وبيضحك بس من جواه مرعوب وهيموت من الخوف ….
عروسته ماسكه أيده ومش عاوزه تسيبها وبتقوله لو روحت مني انا هموت وراك ..
باصلها وضحك وقالها مش قولنا يا حبيبتي مش هنتكلم في الموضوع ده تاني
وطبطب عليها وطمنها وقالها كل شئ مقدر ومكتوب
واحنا ناس متعلمين وعارفين ربنا ومش هنصدق الخرافات دي …؟
اصحاب العريس بيسلموا عليه وبيباركوله بس من جواهم بيودعوه ..!!!!
منهم اللي بيحضنة جامد وكأنه مش هيشوفه تاني ….؟؟
ومنهم اللي بيدمع وهوه بيسلم عليه وبيقوله بلاش يا صاحبي …..؟؟
ومنهم اللي بيقوله انا مبخافش خدني ابات معاك اول ليلة اكون جنبك في اليوم ده …!!!
يبات معاه اول ليله ..؟؟ هوه في ايه ..؟؟
ومنهم اللي افتكر الل حصل لاخوه او خاله او عمه او صاحبه يوم فرحهم وخاف ومجاش الفرح خالص …؟؟
ام العريس قاعدة بتعيط طول الفرح ومقامتش من مكانها وكل اللي بتعمله انها بتراقب ابنها من بعيد
وكأن ده أخر يوم هتشوفه فيه …!!
جيه ميعاد رقصة السلو “أخر رقصة” في الفرح وتقريبا هيا الرقصة الوحيده ..!!
ماسك الكاميرا بتاعتي وبصور مهو ده شغلي اللي خلاني ادخل النجع الغريب ده…!!
.
.
البنات والشباب واقفين حوالين العريس وعروسته وهما بيرقصوا “اخر رقصة” وعيونهم كلها حزن وخوف حتي لو فيه منهم اللي بيضحك بس انا اقدر اميز الضحكة اللي بجد من التمثيل ..
العروسه حاضنه عريسها جامد ومش عاوزه تسيب رقبته
وكل الرقصة متخلص تشاور تاني لل DJ عشان يعيد الرقصة وكأنها مش عاوزه تطلع شقتها …
ايه الفرح العجيب ده ..؟؟
انا صورت مئات الأفراح لكن الفرح ده اغرب وأعجب فرح انا صورته ..!!
البلد كلها غريبه ..؟؟
الناس مكشره وفي منهم بيعيط ومحدش قام رقص ولا رقصة ده فرح ولا مايتم ولا ايه ده ..؟
مهوا انا لازم اعرف في ايه ..؟؟
وليه القريه دي حزينة اوي كده في الفرح ده ..؟؟
الرقصة خلصت ..!!
.
.
قفلت الكاميرا ولميت عدتي ووقفت أتابع وأشوف ايه أخرة اليوم الغريب ده ..؟
الناس كلها بتسلم علي العريس قبل ميطلع شقته وانا براقب من بعيد ..
بس ده مش سلام ..؟؟
ده وداع
.
.
ابن خال العريس نادي عليا واداني بقيت حسابي والغريب انه مسألنيش علي ميعاد الصور ولا سأل علي الفيديو هياخدهم امتي وكأنه مش عاوزهم اصلا ..!!
قبل ميمشي قولتله انا نفسي أسألك سؤال وفضولي هيموتني ولازم تجاوبني ..؟؟
.
.
قالي انت كده كده هتبات معايا الليله عشان مفيش مواصله توديك المركز دلوقتي
وانا عارف انت هتسأل علي ايه وهجاوبك لما نروح البيت …؟؟
عارف انا هسال علي ايه ..؟؟
وهبات هنا امممم ماشي منا لازم اعرف في ايه ….
.
.
الفرح شطب والعريس خد عروستة وطلعوا شقتهم …!!
وأهل العريس وأهل والعروسه وكل راجل وكل ست وكل طفل في النجع مناموش الليلة دي ولا انا طبعا ..
وكأنهم منتظرين شئ ما ..؟؟
روحت معاه البيت وتقريبا اتصاحبنا علي بعض وقعدنا
وقولتله احكيلي بقا يا عم في ايه وليه الناس دي خايفه كده
وليه بيعاملوا العريس وكأنهم مش هيشوفوه تاني …!!!؟؟؟
قالي هحكيلك
الحكاية ابتدت من زمان جدا…
في بيت في اخر النجع في مكان متطرف وسط الجبل وده كان اقدم بيت اتبني في النجع
ويقال ان اول من سكن فيه كان ساحر وبيخاوي جن وبسبب الراجل ده سميت بلدنا “نجع المخاوي”
وبعد ممات الراجل ده محدش سكن في البيت تاني ولا حد سكن جنبه
عشان كانوا بيشوفوا ويسمعوا فيه حاجات غريبه لحد من سبع سنين سكنه راجل عجوز
ومراته من أقارب المخاوي
وكان يقال انهم تصرفاتهم غريبه او مختلين عقليا وبعض الناس بيقول انهم كانوا شغالين في السحر المؤذي زيهم زي المخاوي اللي سكن البيت اول واحد…!!
مكانوش بيختلطوا بحد كتير يدوب كانوا ينزلوا يشتروا احتياجاتهم من نجعنا ويرجعوا علي طول
وكان عندهم بنت وحيده وكانت جميله جدا بس فضلت لحد سن الأربعين بدون زواج
بسبب ان كل شباب النجع خايفه تتجوزها خوفا من انها تكون ساحره زي ابوها وأمها وتأذيهم ..!!
وكانوا مسمينها بنت المخاوي ..؟؟
ابوها وأمها ماتوا في يوم واحد بس محدش من قريتنا راح عندهم ولا حضر دفنه ولا عزا ويقال ان أهلهم جم خدوهم ودفنوهم في بلدهم ..
والبنت بعدها فضلت عايشه في البيت لوحدها ..
في يوم القرية صحيت من النوم علي خبر غريب جدا …؟؟
ان ابن عمدة النجع عاوز يتجوز البنت دي …!!!
طبعا محدش صدق ..!!
بس الخبر كان حقيقي
ورغم محاولات اهله انه ميتجوزهاش الا انه صمم علي انه يتجوزها..؟؟
اتهموها انها عملاله سحر عشان يتجوزها ..!!
لكن ورغم كل محاولات اهله انه يبعد عنها الا ان أبن العمده اتجوزها فعلا..؟؟
ويوم فرحه عليها وبعد مطلع معاها بيتها ..؟؟
دخل العمده واهله وأهل النجع كله وخدوه منها بالقوة وولعوا في البيت وهيا جواه …!!!!
يقال ان صراخها وهيا بتتحرق جوه البيت سمعه كل النجع من شدته ..!!!
الشاب ده فضل بعدها سنتين تعبان نفسيا وبعدين بقا كويس وقرر انه يتجوز …!!
وتاني يوم فرحة الصبح سمعوا صراخ مراته …؟؟
دخلوا عليها لاقوها بتعيط ومفزوعه وبتقول ان جوزها حاجه خفيه سحبته من جنبها علي السرير وبعدين اختفي ….؟؟؟
وفضلوا يدوروا عليه كتير لحد ملاقوه في البيت المهجور بتاع بنت المخاوي ..؟؟
بس كان ميت ومحرووووق …!!!!
ومن يومها واي عريس يتجوز في النجع يحصل فيه نفس الموضوع تاني يوم جوازه الصبح ….!!
يلاقوه محروق في بيت المخاوي ..!!
واغلب شباب النجع مبقتش تتجوز جوه النجع واللي مبيقدرش يخرج بره البلد
ويضطر يتجوز فيها في الأغلب بيحصله نفس الحكايه وبنلاقية محروق في البيت المهجور ده …!!!!؟؟
ويقال ان روحها هيا اللي بتخطف العرسان يوم فرحهم وتحرقهم انتقاما من اهل النجع عشان اللي عملوه فيها يوم فرحها …
هيا دي حكاية نجعنا اللي مش لاقينلها حل لحد اليوم …
ولسه بقوله طب ….
سمعنا صراخ ..؟؟
والبلد كلها بتجري ناحية بيت العريس الجديد ……؟؟؟
معقوله تكون عملتها وخطفت العريس ..؟؟
هيا مين اللي عملتها ياعم ..؟؟
بنت المخاوي ..؟؟
يتبع
#نجع_المخاوي
#محمود_زغلول
قصة نجع المخاوي. الجزء الثاني
.
.
.
.
