رواية جوازة على ورق 4 & 5

 زن:
….. أنا آسفة والله … ماتقلقش دي خدعة حتى بُص دي قطرة والله مش دم …
ثم ناولته زجاجة صغيرة وهي تقول بأسف:
…… اهي الازازة عشان تتأكد بنفسك… سائل أحمر مش دم والله

مد إيهاب يداه وأخذ منها الزجاجة الصغيرة ليتفحصها ثم رمقها بعصبية :
…..وليه تخدعيني أصلا. .. أنا كان ممكن اموت فيها
تنهدت وقالت :
…… كان لازم أعمل كدا عشان ابوّظ الجوازة دي … أنا أصلا مش عايزة أتجوز … نفسي أكمل تعليمي الأول بس بابا الله يسامحه هو اللي أجبرني على الجواز.. زي ما عمل مع أخواتي بالظبط …عشان كدا بقالي

سنين بمثل إني ملبوسة وآخر ما زهقت فكرت أتجوز واتطلق عشان اخليه ييأس مني تماماً
رد عليها بغضب :
……ومالقتيش غيري عشان تنفذي فيه خططك
قالت وهي منكسة الرأس :

…….. آسفة
رمقها بحزن قائلا :
….خطة فاشلة بصراحة ….ما هو ممكن يجبرك تتجوزي تاني بعد ما تتطلقي
ضحكت بسخرية قائلة :

….. أنت ماتعرفش أبويا يا إيهاب …. الطلاق بالنسبة له مصيبة كبيرة… هيخاف يجوزني تاني عشان مبقاش مطلقة مرتين …..
ضحك ثم قال متعجباً:
…… بجد آخر حاجة كنت اتوقعها إنك تبقي مغصوبة على الجواز زيي
رمقته بدهشة :

….معقول أنت كمان مغصوب على الجواز طب ازاي … ده أنت راجل و ما شاء الله عندك 30 سنة يعني مش صغير
…. أنا فعلا راجل وأكبر منك ف السن بكتير بس للأسف ماعنديش نص شجاعتك واصرارك ….. عشان كدا استسلمت لقرارات امي من زمان جدا … حتى الإنسانة اللي قلبي اختارها ماعرفتش اعمل عشانها أي حاجة
أشفقت رغد على حاله كثيراً … لم تكن تعلم بوجود رجال بهذه النوعية … فالرجال في خيالها مثل أبيها وزوج أختها…. متمردين وقلوبهم قاسية ومتحجرة… اما هذا النوع الجديد من نوعه لم تعرف عنه شيئا من

قبل … لذلك قالت له برفق :
….. خلاص احنا من النهاردة لازم نساعد بعض عشان أنا اتطلق وأخلص من ظلم أبويا وأنت تتجوز حبيبتك
……………………………..
…… روحتِ فين يا رغد .. مقولتيش هنعمل إيه الخطوة الجاية

عادت من شرودها على كلماته الأخيرة … تنهدت بحيرة وقالت :
….كنت بفكر ف حالنا … ثم أكملت بحماس:
……هنستحمل الشهر ده وبعدها كل واحد يروح لحاله زي ما اتفقنا
حدجها بنظرة حزن :

…..والله أنا مش صعبان عليا غير امك الغلبانة دي
…… هي طول عمرها كدا تصعب على أي حد … بس حقيقي أنا ممتنة جدا لمعاملتك ليها الطيبة ….بجد شكراً
….. دي أقل حاجة يا بنتي … سبحان الله فرق كبير جداً بينها وبين امي …بس تعرفي إن أبويا كان طيب جدا … ربنا يرحمه ويغفر له
رددت بأسف :

…. ربنا يرحمه يارب
تحرك من مكانه تجاه باب الشقة وهو يقول :
….. أنا هروح اطمن على أكرم ورنا بصراحة ضميري مأنّبني أوي. .. اتخضوا جامد
ابتسمت لطيبة قلبه المفرطة وقالت :

… وأنا هصلي القيام وأقرأ الورد بتاعي
رمقها بإبتسامة حنونة و ذهب ف الحال …
الوضع غير مستقر بالمرة في شقة أكرم. . فرنا متوترة للغاية … لا تستطيع النوم نهائياً تتلفت حولها كل ثانية من شدة الأرق والخوف بينما أكرم فكان القلق ينهش قلبه بلا رحمة… فحالة زوجته غير مطمئنة وبالتالي جميعهم في خطر ….تنهد بحزن ونظر صامتاً للفراغ الذي أمامه

ثم سمع طرقات مميزة على باب شقته أخرجته على الفور من تفكيره … هرول مسرعاً لكي يفتح فهو يعلم جيداً صاحب هذه الطرقات المميزة :
….. إيهاب. … أنت كويس … عملت فيك حاجة أنت كمان
أشفق إيهاب على حاله كثيراً … لذلك قال له:
….. متقلقش يا أكرم أنا هحكيلك كل حاجة بالتفصيل بس اوعدني إن الكلام ده يفضل سر بينا

قال أكرم بنفاذ صبر:
….. سر إيه. ..
….. طب إيه هنتكلم كدا على الباب
أفسح له الطريق ودخلا الاثنان إلى غرفة الضيوف …. ليبدأ أكرم محفزا :

…… أتكلم يا إيهاب أنا خلاص مش قادر استحمل
تلعثم إيهاب قائلا :
…. بصراحة كدا كل اللي بيحصل ده تمثيل بالاتفاق بيني وبين رغد
جحظت عينا أكرم قائلا بصدمة :

…. تمثيل …طب ازاي .. وكلام الشيخ حسن
تنهد إيهاب :
…… برضه متفق معاه…
….. معقول حسن يوافق على الهبل ده

….. هو وافق عشان يساعدنا وبعدين أنا ورغد زواجنا باطل لأنه مش بإراداتها.. وموافقتها بند أساسي لصحة الزواج
وضع أكرم كفاً على كف … وهو يقول :
….. يعني كل ده مقلب…الدم اللي بينزل من عينيها والخيال … طب ازاي قدرتوا تعملوا كدا
رمقه إيهاب مندهشاً :

….. الدم ده عبارة عن سائل أحمر بتحطه قبلها ب كام ثانية وبعدين العين بتبدأ تنزف لوحدها …. بس إيه الخيال ده
…… الخيال اللي رنا شافته ف المطبخ ورا رغد … خيال كبير على هيئة وحش .. دي رنا من ساعتها نفسيتها مدمرة
استغرب إيهاب قائلا :
….. أنا ماعرفش حاجة عن الخيال ده .. وعمري ما لمحته عندي أصلا

ف بيت سعيد تجلس آمال حزينة كعادتها … خرج سعيد من غرفته وهو يستعد للخروج قائلا:
….. أنا رايح مشوار وجاي بسرعة اعملي حسابك عشان أول لما اجي هنروح لرغد
قالت له بفرحة :
….. حاضر يا أخويا ده أنا هلبس من دلوقتي

وبالفعل نزل سعيد وبدأت آمال في الإستعداد وقلبها يرقص من فرط سعادتها … فهي اشتاقت لابنتها كثيراً …. ولكن زيارة مفاجئة قطعت عليها فرحتها … وهي زيارة نادية زوجة سعد … استقبلتها آمال مُرحبة :
…. أهلاً يا نادية …
….. أنا جاية اطمن عليكِ .. عاملة إيه دلوقتي …
ردت آمال :

…. الحمد لله بخير
….. مش محتاجة أي حاجة اعملهالك. .. انظف لك الشقة … اطبخ لك
تعجبت آمال من هذه الطبية المفرطة … أيعقل أن تجيد التمثيل بهذه البراعة.. لذلك قالت لها بإندفاع :
…. عايزة ترشي لي من الماية بتاعتك …لا يا حبيبتي شكرا

رمقتها نادية مستفسرة :
….. ماية إيه
…. ماية الأعمال اللي بترشيها ليل ونهار قدام باب شقتك. … اللي مخلية سعد زي الخاتم ف صباعك…. ثم أكملت بحزن :
…. أنا خايفة بس لنكون أنا وبناتي اتأذينا بسببها

ضحكت نادية بطريقة هيسيترية قائلة :
….. طبعا جوزك هو اللي مفهمك الكلام ده
صمتت آمال تماماً … فأكملت نادية :
….. طبعا لازم يفهمك كدا ما هو مايعرفش يعني إيه مودة ورحمة … أنا أوقات كتير بحس أنه مش اخو سعد نهائي ولا كأنهم من بطن واحدة .. أنا برش ماية عشان الحر وبعدين أنا هاذيكِ أنتِ وبناتك ليه … ده أنا

دايماً بشفق عليكم وعلى حالكم …. الأذى الحقيقي قدامكم وحواليكم من زمان وهو سعيد جوزك
تنهدت آمال بحيرة …. فهي لا تعلم مدى صدقها … وأيضا لم ترى منها إلا الخير …هل يمكن أن تكون نادية أفعى متلونة بمائة وجه ….
فاقت على رنين هاتف نادية الذي علا صوته…نظرت نادية بتوتر على اسم المتصل ثم قامت على الفور من مكانها قائلة :
…. أنا همشي بقا يا آمال وهبقى اعدي عليكِ وقت تاني

خرجت نادية على الفور وهرولت سريعاً إلى شقتها ثم ضغطت على ز الإجابة قائلة بلهفة:
…. أيوة يا رغد… عاملة إيه
ليأتيها الرد :
….. الحمد لله يا طنط نادية … عايزة اطمنك إني نفذت الإتفاق بالظبط

وقف سعيد ف الشمس الحارقة بضع دقائق إلى أن أتى إليه الشخص المنتظر … سلم عليه قائلا :
….إيه التأخير ده
رد عليه وهو يلهث بشدة:
…. الطريق زحمة يا عم سعيد …

ثم مد يده إليه وأعطاه علبة صغيرة قائلا بهمس :
…. الأمانة اهي
قال له سعيد بلهفة :

…. متأكد إن مفعولها كويس
….. عيب عليك يا عم سعيد ..بس ماتكترش عن حبيتين ف اليوم
أبتهج سعيد وكاد يموت من فرط الفرحة … فهذه العلبة هي ملاذه الوحيد لأكتمال هذا الزواج …. فهي تحتوي على حبوب مهلوسة تذهب العقل تماماً…. ولكي تِكمل هذه الزيجة يجب الذهاب بعقل إيهاب بعيداً عن الواقع حيث يُصبح مجنوناً متزوجاً من غريبة أطوار وبهذا يتساوى البلاء بينهم ويُجبروا على تحمل بعضهم البعض دون ذرة كبر أو استعلاء من أم ايهاب الخبيثة ……

استعدت رغد جيداً لزيارة أختيها رانيا ورحاب …. فلقد أخبراها بحضورهن اليوم ….أستيقظ إيهاب قائلا :
…. صباح الخير …
قالت له بأسف :
….صباح النور … شكلي كدا صحيتك بدوشتي … أصل أخواتي جايين يزوروني

قال لها نافياً:
.. . لا خالص أنا كدا كدا كنت هصحى. . طيب هنعمل ايه قدامهم … همنثل برضه
….. لا خالص … أنا هحكي لهم كل حاجة …متقلقش أنا بثق فيهم جدا
أبتسم لها قائلا :

…. طب تمام … أنا هغير هدومي واروح لأكرم اشوف حالة رنا وصلت لايه
رمقته بدهشة :
…. هي لسا تعبانة برضه … معقول قلبها ضعيف للدرجة دي
قال لها بحزن :

…. الموضوع أكبر من المقلب بتاعنا .. أكرم قالي امبارح بليل ع حاجة غريبة ماعرفتش أقولك عليها لأنك كنتي نايمة لما رجعت
….. حاجة إيه
….. رنا وهي عندنا شافت خيال على شكل وحش …. ومن ساعتها وهي حالتها صعبة جدا
قالت له بذهول:

…. خيال…. أنا عمري ما شفت خيالات نهائي
رفع كتفيه متنهدا :
….مش عارف … بس هي حالتها صعبة جدا… أنا داخل أغير هدومي
وبالفعل بدّل إيهاب ملابسه وخرج من غرفته ليجد فطاراً رائعاً في انتظاره … نظر إليه منبهراً وقال:

…. الله إيه الجمال ده
قالت له بخجل:
….. أكيد مش هتنزل على لحم بطنك …
ابتسم لها وجلس يأكل ف الحال فهو بالفعل جائع للغاية … ألتهم لقمة ثم قال لها :

…. صح قبل ما أنسى. .. حضري أوراقك عشان أقدم لك ف الجامعة المفتوحة…. باب التقديم فتح
تتطايرت السعادة من عينيها قائلة :
….. بجد يا إيهاب
قال لها بحب :

….. أيوة طبعا هي الحاجات دي فيها هزار
قالت له بحماس:
…. ربنا يخليك يارب… وأنا كمان مستعدة اكلم حبيبتك وافهمها طبيعة العلاقة بينا وماتقلقش خالص أنا هعرف اقنعها
ابتلع ريقه بامتعاض…. لمَ شعر بغصة لمجرد ذكرها حبيبته…. ألم يكن هذا حلمه وأمله الوحيد في الحياة …إذاً ما الجديد الذي طرأ على قلبه … أيعقل أن تكون هذه الفتاة ذات الثمانية عشر احتلت قلبه

واسحتوذت على مكان حبيبته الأولى بجدارة……
اجتمع الجميع ف شقة أكرم. .. الأم بولديها أكرم وإيهاب. .. فحالة رنا تدهورت بشكل ملحوظ للغاية …. فهي تصرخ طوال الوقت دون أسباب واضحة …زيادة على ذلك فهي لا تشعر بوجودهم نهائياً ….. لا تتعرف عليهم كأنها نسيت ملامحهم تماماً … وما أن رأتها أم إيهاب حتى زمجرت قائلة :
…. معقول كل ده يحصلها عشان قعدت مع رغد شوية اومال لو كانت باتت بقا كان حصلها إيه

نظرا إيهاب وأكرم لبعضهم نظرة ذات معنى ثم صمتا تماماً …نظرت لإيهاب وأكملت حديثها قائلة :
…. البنت دي لازم تمشي من البيت … مش بعيد كلنا نتحول زي رنا
قال لها متحدياً :
…. لا مش هتمشي غير بعد الشهر ما يخلص

صرخت بوجهه قائلة :
….. لا هتمشي. .. ما هو يا أنا يا هي يا إيهاب ولما نشوف بقا هتختار مين
قالت هذه الجملة وتركتهم ونزلت سريعاً … فقال أكرم :
…. هتعمل إيه دلوقتي

نظر إليه إيهاب بحزن :
….. مش عارف بس صدقني رغد ملهاش دعوة خالص بحكاية رنا دي
…. أنت متأكد إن الحكاية إتفاق بس. ..مش عارف ليه حاسس ببوادر قصة حب
تلعثم إيهاب قائلا :

….. حب إيه بس ما أنت عارف إني بحب اصلا. …
وقبل أن يرد عليه سمعا صوت ارتطام قوي قادم من غرفة رنا …. هرولا الاثنان سريعا إلي الداخل ليجدا رنا واقعة ف الأرض ومغشيا عليها ….
في هذا التوقيت كانتا كلا من رانيا ورحاب وصلتا عند اختهم الصغرى رغد … تلاقوا بالأحضان والقبلات وبعدها بدأت رغد بروي جميع الأحداث التي حدثت معها … استغربتا كثيرا من هول ما سمعتا. .. ثم قالت رحاب مندهشة:

….. معقول يا رغد كل ده يطلع منك أنتِ
….. اومال كنت عايزاني أعمل إيه ارضا بالأمر الواقع واضيّع مستقبلي كله
تنهدت رانيا بيأس قائلة :
… شاطرة يا رغد كملي اللي بدأتيه واوعي تعملي زيي

طبطبت رحاب عليها قائلة بحنان:
….. ما أنا قلت لك من زمان أطلقي يا رانيا وأنتِ اللي رافضة
…. ماقدرش يا رحاب … أنتِ مش حاسة بيا لأنك الحمد لله حظك كويس وجوزك وأهله كويسين …. ماحدش بيحس بحد غير لما يجرب بنفسه
رمقتها رغد بحزن :

…… لا يا رانيا أنتِ غلط … طول عمرك ضعيفة زي ماما …ماينفعش تيجي على كرامتك بالشكل ده … الطلاق مش نهاية العالم
صمتت رانيا تاركة العنان لدموعها الساخنة لكي تنساب بغزارة على خديها …. حاولت رحاب تغيير مجرى الحديث تخفيفاً على أختها فوجهت نظراتها لرغد قائلة :
….. بس ازاي عملتي كل ده لوحدك يا سوسة

ضحكت رغد قائلة :
…. بصراحة أنا مش لوحدي … كل ده تنفيذ وتخطيط طنط نادية… ياريت امنا كانت بقوتها واصرارها ماكنش ده بقا حالنا
قالت رانيا بخوف :
…. ده لو بابا عرف الدنيا هتتقلب …

ردت رغد عليها بلا مبالاة :
…. وهيعرف منين إذا كان ماما نفسها ماتعرفش حاجة
رنّ هاتف رانيا ليعلن عن وصول مكالمة ثقيلة على قلبها …. ردت بخوف:
…. الو. … حاضر حاضر جاية اهو

ثم قامت ف الحال قائلة بذعر:
…… أنا لازم امشي بسرعة … جوزي هيبهدلني …. هبقى اجيلك تاني يا رغد … يلا سلام
هرولت مسرعة للخارج بينما لحقتها رحاب قائلة …
…… استني يا بنتي أنا جاية معاكِ…أنا مش عارفة أنتِ بتترعبي منه كدا ليه

سبقتها رانيا سريعاً للخارج بينما وقفت رحاب تودع أختها عند باب الشقة وهي تقول :
….. صح ماما وبابا جايين كمان شوية … ظبطي اداءك بقا عايزين تمثيل مُحترف
ضحكت رغد قائلة بحماس :
…. ماتقلقيش عليا … أنا اصلا ممثلة محترفة

ودعا بعض ببراءة وعفوية ولم يعلما أن هناك من كان يتنصت بدقة على حديثهما. .. أغلقت أم إيهاب بابها بحرص. .. حتى لا يشعرا بها وهي تتمتم بغيظ:
….. بقا بتمثلي علينا يا بنت سعيد … طب والله لأدفعك التمن غالي … أنا بقا هعرف أبوكِ وافضحك قدامه
دخل إيهاب شقته حزيناً للغاية … اقتربت رغد منه مستفسرة :
…. ايه يا إيهاب رنا عاملة إيه
قال بحزن :

….. رنا طلعت ملبوسة بجد يا رغد
شهقت رغد قائلة :
… إيه اللي بتقوله ده …. أنت بتصدق ف الحاجات دي برضه
قال لها مفسراً :

….. الشيخ حسن لسا نازل حالا من عندها وبصراحة أنا بثق فيه جدا ده حافظ لكتاب الله
…… طب ازاي حصلها كدا
….. مش عارف بس هو بيقول إن ف جن محاوطها …..
….. طب هتتصرفوا ازاي

….. هيبدأ يعالجها بالقرآن وربنا يسهل بقا
….. طيب أنا داخلة أصلي العصر وبعدها هحضر الغدا على طول
قال لها :
…. طب استني هدخل اتوضا ونصلي جماعة

ابتسمت له ف الحال وأومأت برأسها. .. كم تمنت أن تصلي خلف رجل منها … فأبوها لا يركعها نهائياً ….. ولكن يا للحظ فأول صلاة لها خلف رجل تكون خلفه هو بالذات … خلف زوج افتراضي ….
وبعد بضع ساعات وصلا كلا من آمال وسعيد عند ابنتهم التي تصنعت المرض أمامهم مثل كل مرة… تأثرت آمال لحالة ابنتها التي لم تتغير …. بينما سعيد لم يتحرك قلبه البتة… فهو مشغول بمكيدته السحرية ….. وفور دلوفه قال لزوجته :
…. اعملي ليا أنا وايهاب كوبايتين شاي يا آمال دماغي صدعت من الطريق

أومأت امال برأسها وذهبت سريعاً لتحضر الشاي … بينما كان سعيد يجلس بجانب إيهاب ويتحدث معه :
….. إيه أخبار رغد معاك
صمت إيهاب قليلا ثم قال :
….. لسا زي ما هي يا عم سعيد

…… يعني مفيش أمل
تمنى إيهاب في هذه اللحظة أن يفصح له عما يعتليه قلبه من مشاعر جديدة ولكنه تراجع فهو يشعر بأنها لا تبادله نفس مشاعره فلماذا إذاً يفسد عليها راحة قلبها …. لذلك قال له نافياً:
….. لا مفيش يا عم سعيد…. وزي ما اتفقنا الطلاق هيتم خلال شهر
دخلت عليهم آمال بصينية الشاي … ووضعتها على الطاولة أمامهم ثم همّت قائلة :

…. أنا هدخل لرغد
وفور دخولها تنحنح سعيد لإيهاب قائلا برجاء:
….. معلش يا إيهاب ممكن تجيب لي كوباية ماية
قام إيهاب على الفور وهو يقول :

….. من عنيا يا عم سعيد
وفور خروجه فتح سعيد العلبة ف الحال وبدأ بإفراغ محتوياتها على كوب الشاي الساخن ولكن لسوء الحظ يداه فلتت وداب ف الشاي أكثر من ست حبيات ….
خبأ العلبة في جيب بنطاله سريعاً بعد أن شعر بقدوم إيهاب الذي وضع كوب الماء على الطاولة قائلا :
….. اتفضل يا عم سعيد

أبتسم له بتوتر وقلق … فالرجل قال له حبتين فقط ماذا يفعل الآن ….. ثم همس لنفسه :
… عادي بقا اعمله إيه نصيبه كدا واهو لقب أرملة برضه أحسن من مطلقة
أمسك إيهاب كوب الشاي وقربه من شفتيه بهدوء …. كل هذا وسعيد متابعاً في صمت وقبل أن يرتشف منه رنّ جرس الباب … لذلك وضع الكوب وهمّ بفتحه .. لتظهر امه أمامه وهي تشتعل ناراً ….ابعدته من أمامها ثم اندفعت إلى سعيد ف الحال … جلست أمامه قائلة بشماتة :

….. عندي ليك خبر يا أستاذ سعيد إنما إيه هيعجبك أوي
توتر سعيد لمجيئها المفاجئ … فخطته كادت أن تتم بنجاح …. قال لها بصوت أجش :
….. خير يا أم إيهاب إن شاء الله
قالت له وهي تمسك بكوب الشاي الذي أمامها وترشف منه بضع رشفات متتالية :

….. خير طبعا يا أخويا. … أشرب بس الشاي واحكيلك
???
……………………………………

  قالت له وهي تمسك بكوب الشاي الذي أمامها وترشف منه بضع رشفات متتالية :
….. خير طبعا يا أخويا. … أشرب بس الشاي واحكيلك …….
جحظت عينا سعيد وهي تتابعا رشفات أم إيهاب المتتالية…. لا يستطيع أن يمنعها ولا أن ينطق ببنت شفة….ظل يتابعها في صمت مطبق حتى أنهت كوبها تماما ولم يتبقى سوى التفل في كعر الكوب ثم وضعته أمامه على الطاولة وهي تقول بطريقة كيدية :

….. كدا اقدر احكي بمزاج بعد ما ظبطت دماغي بكوباية الشاي دي
أبتسم لها سعيد بسخرية … وهو يحدث نفسه:
….. يلا على البركة … أنتِ اللي جبتيه لنفسك … داهية تاخدك بقا ونخلص منك
ثم قامت من مكانها ووقفت أمامهم بكل ثقة قائلة بعلو صوتها وهي تشيح بيديها بطريقة عصبية :

….. الست هانم بنتك المؤدبة المتريية قال إيه طلعت بتمثل …. بتغفلك وبتغفلنا كلنا بحكاية الجن والعفاريت ….
قام سعيد من مكانه وهو يزمجر قائلا:
….. أنتِ بتقولي إيه
تدخل إيهاب سريعا لتهدئة الموقف :

….. إيه اللي بتقوليه دي يا امي … رغد تعبانة فعلا والشيخ حسن أكد لنا كلنا
مصمصت شفتيها بسخرية قائلة بخبث واستهزاء :
…… أسكت مش أنا قابلته وهو نازل من عند أكرم ووقعته ف الكلام وبصراحة الراجل ماخدش ف أيدي غلّوة. ..غلبان واهبل زي صاحبه
ثم حدجته بنظرة غضب ووعيد وأكملت :

….. وبعدين أخرس أنت خالص دلوقتي وحسابك معايا بعدين
وقف سعيد مستمعاً لحديثهم المريب بقهر وغيظ شديدين …. وقبل أن يتحدث كانتا رغد وآمال منضمتان إليهم …. نظر إلى ابنته الصامتة أمامه وقال بنظرة شر :
…….. الكلام ده صح
رغد صامتة تماماً … قلبها يرتجف بشدة ويكاد ينخلع من كثرة الخوف. …

احمرت عينا سعيد بشدة ….ثم كرر كلامه ثانية ولكن بصوت أعلى وافزع :
….. بقولك ردي عليا … الكلام ده صح
تبكي آمال كعادتها …. تنظر إليها رغد بشفقة ثم تقف أمام والدها وتقول له بثقة وتحدي :
….. أيوة صح … أنا بقالي سنتين بمثل عليك

يرفع سعيد يداه في محاولة منه لضربها ولكن إيهاب يأتي سريعا ويقف حائل بينه وبينها ليحمي رغد من تلك الصفعة الطائشة ثم يقول له محذرا :
….. ماينفعش تضرب مراتي يا عم سعيد
قال له بسخرية :
…. بقت مراتك دلوقتي … طب إيه رأيك بقا إني هطلقكم …

رد عليه بهدوء تام :
…. طول ما هي على ذمتي تبقى مسئولة مني واستحالة تتهان بأي شكل
رمقه سعيد بعصبية ثم قال بغضب:
…… مش هتفضل على ذمتك كتير أنا هطلقها منك واجوزها لراجل حقيقي يعرف يشكُمها زي جوز رانيا مش دلدول زيك .. ده أنت ممكن تضيعها بهبلك ده

رغد تبكي بحرقة شديدة ثم تخرج عن صمتها وتفاجئ الجميع بكلماتها الجريئة وهي تقول لأبيها بصوت مبحوح :
….. بابا …. أنا بكرهك أوي ….أوي
جحظت عينا سعيد وتطايرت منها الدهشة ..لا يصدق ما سمع للتو ثم نظر إلى ابنته بذهول تام دون أن يتفوه بأي كلمة …. ليخرجه من هذه الحالة صوت قوي هز أركان الغرفة … وهو صوت ارتطام جسد أم إيهاب الممتلئ بأرض الغرفة الصلبة ……

اندفع الجميع إليها ف الحال … حملها كلا من إيهاب وسعيد وقاما بوضعها على الأريكة دون أن يشعر أحد بالعلبة التي وقعت من جيب سعيد بعشوائية على الأرض…. .
كانت تتنفس بصعوبة بالغة … صدرها يعلو ويهبط باضطراب …. لا تستطيع التحدث إطلاقا… تلوح بيديها يمنة ويسرة ثم تنظر لإبنها نظرة استنجاد وتغيب بعدها عن الوعي تماما …….
تقف رانيا في المطبخ وهي منهكة تماما … فمنذ أن عادت من بيت أختها وهي تخدم في منزل أم زوجها بلا رحمة … دخلت عليها أخت زوجها قائلة بتهكم :
….. خلصتي العشا يا رانيا ولا لسا

مسحت عرق جبينها بكفها ثم قالت بإرهاق:
….. خلاص قربت اهو
ردت عليها مستنكرة :
….. كان لازم يعني تروحي عند أختك النهاردة ما أنتِ عارفة إن خطيبي جاي يتعشى عندنا

…… معلش والله نسيت خالص … بس ثواني والأكل هيكون جاهز
لوت شفتيها بإمتعاض:
…. نسيتي. … طيب ياختي
وفي غضون ساعة كان العشاء مرصوصا بدقة على المائدة … أنهت رانيا ما وراءها من تنظيف المطبخ وغسل الأواني ثم صعدت إلى شقتها لكي ترتاح قليلا بعد مشقة هذا اليوم الطويل …بدلت ملابسها ثم

مددت جسدها على السرير وهي تتألم من فرط الوجع … وقبل أن تغلق عينيها رنّ هاتفها …. نظرت إلى اسم أخت زوجها الذي يظهر على الشاشة وهي تتأفف وترد عليها …لتسمع صوتها وهي تقول :
…. نسيتي تعملي العصير يا رانيا يلا بسرعة انزلي اعمليه
تنهدت رانيا قائلة :
….. طيب ما ينفعش تعمليه أنتِ … أنا بجد تعبانة أوي

نهرتها قائلة :
….. واسيب خطيبي يعني يقعد لوحده … ولا اتصل ب أخويا واقوله يجي يقعد معاه هو لغاية لما اعمل أنا العصير
قالت رانيا بفزع:
….. لا خلاص متتصليش أنا نازلة حالا اهو

وبالفعل نزلت رانيا وصنعت لهم العصير على عجل ثم قدمته لهم وصعدت ف الحال .. ليقول خطيب أخت الزوج بأسف :
…… حرام عليكم والله تشغلوا البنت القمر دي خدامة عندكم
….. نعم يا أخويا. .. مين دي اللي قمر
أمسك كوب العصير ورشف منه ثم قال:

….. أيوة هي قمر … والله أنا لو متجوز واحدة زيها لأعيشها ملكة واجيبلها خدامين كمان
رمقته بعصبية وصمتت تماما فهي تعلم جيدا أخلاق خطيبها السيئة ولكن للأسف هي تعشقه حد الجنون لذلك لا تتحمل بعدها عنه نهائيا … ولا تتحمل أيضا مغازلته لغيرها …وبالتحديد مغازلته لرانيا زوجة أخيها …فهما سيتزوجان معهم ف نفس البيت… أي أنها ستكون أمامه بشكل مستمر ودائم …اشتعلت عيناها بنار الشر والغيرة ثم همست محدثة نفسها :
….. أنا لازم اخلص من رانيا دي بأي طريقة

وصلت عربة الإسعاف تحت منزل إيهاب سريعا و حملت أم إيهاب ف أحشائها ثم تحركت إلى المشفى في الحال …
وقف كلا من سعيد وآمال وحدهما تحت المنزل بعد أن ذهب الجميع مع عربة الإسعاف…. قالت آمال :
….. مش كان أصول برضه نروح معاهم عشان نطمن عليها
رمقها بغضب وهو يشاور لعربة أجرة :

….. واحنا مالنا احنا … هي كانت من بقية عيلتنا ….
ثم أكمل بعد أن ركبا كلا منهما العربة :
…… ماشي يا رغد يا أنا يا أنتِ
هرول كلا من إيهاب وأكرم ورغد إلى الطبيب الذي خرج من غرفة الكشف … قال إيهاب بتأثر واضح :

….. خير يا دكتور… امي مالها
عدل الطبيب من وضع عويناته قائلا بتردد :
….. هي والدتك بتاخد أدوية إيه بالظبط
رد عليه أكرم مسرعا :

…. بتاخد أدوية السكر والضغط بس يا دكتور
تلعثم الطبيب قليلا ثم قال لهم بأسف:
….. للأسف هي جالها هبوط حاد ف الدورة الدموية واضطراب ف عضلة القلب نتيجة جرعة مخدرات زيادة
شهق كلا منهم من هول الصدمة … ليندفع أكرم قائلا :

….. حضرتك بتقول إيه …. انت أكيد غلطان
تنهد الطبيب بحزن وقال وهو يناوله بعض الأوراق :
….. دي التحاليل والإشاعات عشان تتأكد بنفسك
أخذها منه وهو يتصفحها كالمجنون كأنه طبيب ويستطيع فهم ما بها بسهولة … بينما جلس إيهاب على أقرب مقعد وهو يحبس دمعة حزن دفينة بداخله……

ظلت أم إيهاب يومين كاملين ف الرعاية المركزة …. كما ظلت رغد مع إيهاب كتفا بكتف …. فهي حقا تشعر بحزنه وتتوجع لوجعه…. قالت له برفق وهي تجلس بجانبه :
….. متقلقش يا إيهاب هتبقى كويسة إن شاء الله

نظر لها بعين دامعة :
…. خايف أكون أنا السبب يا رغد
شعرت رغد أيضا بتأنيب الضمير … فهي السبب الرئيسي بهذا الدمار ….. لولا تمثيليتها الخادعة ما كان ليحدث كل هذا … لذلك قررت أن تختفي تماما عن هذه العائلة فور شفاء والدة إيهاب … يكفي ما سببته لهم من أذى…. فلقد حان الوقت لتتحمل مصابها وحدها …..

كاد سعيد أن يشيط غضبا … فابنته الصغرى خالفت كل توقعاته … فهو يشم رائحة جبروت نادية تفوح من شخصيتها ….. وهذا الإيهاب ليس برجل على الإطلاق…. لذلك يجب عليه التفريق بينهم مهما حدث حتى لا يفلت عيار ابنته الذي ظل محافظا عليه طيلة هذا العمر …
وضعت آمال أمامه كوب الشاي وهي تقول :
……. مش واجب برضه نزورهم ف المستشفى … الست بقالها تلات أيام ف العناية

رمقها مستهزئا:
….. أنا مش عارف بصراحة أنتِ بتفكري ازاي … أنتِ دماغك جزمة يا ولية أنتِ
تنهدت بحزن :
…. أنت معقد الدنيا ليه يا سعيد … ما الدنيا شكلها اتظبطت بين الوالد والبنت اهو . دي واقفة معاهم كأنها منهم …. مش ده اللي أنت كنت عايزه

….. أنا كنت فاكره راجل وهيحافظ عليها إنما ده شكله كدا هسيبلها الحبل على السايب وهيفسد أخلاقها
….. حرام عليك ده طيب ومحترم وهيعاملها أحسن معاملة
قال مستنكرا :
…. ما هي الأحسن معاملة دي هي اللي هتفلت عيارها. .. ويوم ما تحصل مصيبة أنا اللي هشيل العار…. لأن إسمي ورا اسمها إنما هو آخره يرمي عليها اليمين ويقطع القسيمة ويجيب بدلها أربعة مش

واحدة بس
حزنت آمال لتفكير زوجها العقيم… فهي تشعر دائما أن هدفه الرئيسي هو كسر بناته فقط … ولكن لماذا …فهن المؤنسات الغاليات ….
خرجت أم إيهاب من الرعاية واستقرت في غرفة خاصة بها …. قالت لهم الممرضة :
… لو سمحت فين بنتها عشان تساعدنا نغير لها هدومها

ردت عليها رغد دون أي تردد:
…. أنا بنتها
ثم دخلت معها بلهفة ابنة حقيقية وليست زوجة ابن افتراضية إطلاقا……
اقترب أكرم من إيهاب ثم ربت على كتفه قائلا:

… ليك حق تحبها وتقف جنبها…. البنت دي استحالة تلاقي زيها تاني … اصل معادن الناس بتظهر ف المواقف وهي أثبتت نقاء معدنها رغم ظروفكم اللي مش مستقرة
ثم أكمل متسائلا :

….. معقول دي عندها 18 سنة بس ؟؟؟؟
سرح إيهاب بنظره لبعيد …. فهو تأكد أنه لا يحبها فقط بل يعشقها بكل جوارحه … ولكن هل تبادله نفس الإحساس. .. فهو لا يستطيع أن يفرض عليها حبه …. بل يريد أن يتذوق حلاوة حبها ولهفتها دون أي قيود أو ضغط يريد حبا متبادلا وليس من طرف واحد
قال أكرم :

…. إيه يا ابني …روحت فين …
رد عليه شاردا :
…. موجود اهو …هروح فين يعني
….. طيب بص أنا لازم امشي دلوقتي أشوف رنا واكلم والدتها تيجي تقعد معاها لغاية لما نعدي الأزمة دي …

قال إيهاب متعحبا
….. أنت كل ده ماقولتلهاش
….. ما أنت عارف إن والدة رنا تعبانة جدا خفت عليها تتعب أكتر لما تعرف حالة بنتها
وبالفعل ذهب أكرم ف الحال ليدخل إيهاب إلى امه ورغد …. وفور دخوله كاد قلبه أن يتحرك من مكانه فهو لأول مرة يرى شعر رغد منسابا خلف ظهرها بهذا الشكل … لأول مرة يكتشف أنها أجمل امرأة رأتها عيناه

… أيعقل أن تكون حلاله وبعيدة عنه لهذا الحد ….. ما أصعب هذا الإحساس ووحشته ….
شهقت رغد فور دخوله المفاجئ وبحثت سريعا عن حجابها لتجده وتضعه على رأسها بطريقة غير منظمة …. فهو بالطبع رآها كثيرا بشعرها ولكن ليس بهذا الوضع .. فقد كانت دائما ما تلمه بشكل لا يلفت انتباهه إطلاقا. … تلعثمت بخجل قائلة :
…..أنا كنت بتوضا وبعدين طرحتي وقعت. .. قصدي شعري … أنا رايحة أصلي

قالت هذه الجملة وهي تمسك بسجادة الصلاة وتفرشها في ركن بعيد ثم شرعت في صلاتها بهدوء وسكينة
أبتسم إيهاب في خبث. .. كم يحب خجلها الممزوج بالبراءة والعفوية ثم اقترب من امه التي كانت نائمة ف هدوء تحسس على رأسها بحنان ورفع كفها ليقبله وهو يهمس :
….. ربنا يشفيك يا امي ياترا إيه اللي خلاكِ تشربي القرف ده
وصل أكرم شقته ليجد رنا على نفس حالها المزرى … أمسك هاتفه لكي يتصل بوالدتها ويطلب منها القدوم فهو يهتم بها لوحده منذ أيام دون جدوى .. ولكنه تذكر أن بطارية هاتفه فارغة منذ الصباح … لذلك

بحث عن هاتفها ليجري منه الاتصال…. وما أن وجده حتى رأى العديد من الرسائل التي لم تقرأ بعد وجميعها من نفس الشخص … صديقتها غادة … فتح أول رسالة وكان مكتوب بها :
……. أخبار العمل ايه يا رنوش اشتغل ولا لسا … ياترا خلصتي من عروسة الغفلة اللي عندك
صُدم كثيرا ثم ظل يقلب ف باقي الرسائل بغضب إلى أن وصل إلى هذه الرسالة التي أرسلت بواسطة رنا :
….. أنا جهزت حاجة من قطرها زي ما الشيخة طلبت مني هما بيفرشوا الشقة اليومين دول عشان كدا كان سهل عليا اجيبها … وكمان هجيبلها حاجة من قطري أنا كمان عشان تشوف لي حل ف موضوع

الخلفة ……..
ترك الهاتف ف الحال والغضب و الاشمئزاز يسيطران عليه تماما… لا يصدق أن زوجته البريئة تفعل مثل هذه الأمور…. فهي متعلمة ومن بيت متدين ذو خلق… كيف لها أن تسقط في دائرة الأسحار والخرافات …. وأين كان هو من كل هذا ………
اتصل بوالدتها لكي تأتي إليها … وأجّل موعد ابلاغها بقراره الذي اتخذه للتو إلى أن تُشفى تماما … فهو يريد مواجهتها وهي سليمة تماما فالحقوق لا تُرد وقت الضعف والمرض …..

ظلت أخت زوج رانيا تحوم حولها مثل البومة…. تريد أن توقعها في مكيدة ما لتخلص منها ….. وما أن اختلت بأخيها حتى قالت له بخبث :
…… بصراحة رانيا مراتك دي مشرفاني جدا قدام خطيبي
رد عليها بسعادة :
….. ليه يعني

قالت بلؤم :
….. بتعامله كأنه أخوها بالظبط … واول لما تعرف إنه جاي تجهز له الحلو كله … واحلى حاجة أنها رفعت الكُلفة بينهم لدرجة أنها بتقلع الطرحة قدامه وتقعد بشعرها عادي وهاتك يا هزار وفرفشة
صمت أخيها تماما ولكنه كان يغلي من داخله فهي تعلم جيدا أنه مجنون ويغار بشدة رهيبة وهي الآن زرعت بذرة الشك بقلبه لكي يشك ف أخلاق رانيا ويطلقها ف الحال وهكذا تكون تخلصت منها للأبد. …
قام ف الحال بعد أن تحولت ملامحه لبركان من غضب…. صعد إلى شقته ليجدها نائمة ف سلام …. شمر ساعديه وهرول إلى الحمام مسرعاً ليحضر خرطوم المياه ثم اندفع إليها مثل الثور الهائج

?‍♀️??
………………………….

­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ .