#مشكلة عضوه
شوفوا أنا غلطانه ولا ايه بعد اذنكم أنا امي اتوفيت الله يرحمها من تلات سنين
حماتي مجتش تعزينى لا هى ولا بنتها مع ان مكنش فيه خلاف بينى وبينهم خالص
وكنت قبلها بيومين عند اخت جوزي وواخدلها زياره وكله تمام أنا الوحده اللي كنت بزورها باحلى زيارات
لكن باقي سلايفي لو راحوا يزوروها بياخدوا حق الزياره من أمها
وكنت عند حماتى يوم ماشي امي اتوفيت كنت قاعده عندها والخبر جالي وانا هناك ربنا يعلم نزل عليا ازاي
مكلفتش نفسها حتى تقولي البقاء لله حلفت لجوزي إن يوم ما امه تتوفى مش هروح عزاها ولا عاتبت حماتي
ولا اى حد غير بعدها بسنه تقريبا حماتي فتحت معايا الموضوع لما لقيتنى قطعت زياراتي لبنتها
قولتلها اسالي نفسك انتي وبنتك قالتلي عشان يعني مجناش نعزى في امك
واحنا هنيجي نعمل ايه قولتلها عادي انا مجتش عاتبتك وياستى الدنيا دواره لا حزن دايم ولا فرح دايم
ويوم عندي ويوم عندك قالتلي انا بعتبرك زى بنتى والله وربنا يعلم قولتلها انا ماليش أم امى ما، تت
وانا كنت بعتبرك زيها وهى خلاص ما، تت وعيط يوميها لأن ماليش غير أمي
حتى اخت جوزي لقيتها بتقولي الحزن في القلب مش في اللمه واحنا كنا هنيجي يعني نعملك ايه
قولتلها الله يرحمها بكره تجربي زعلت من كلمتى جات حماتي اتوفيت امبارح
وانا منزلتش عزاها ولا حتى اتحركت من مكاني انا مش شمتانه والله ربنا يعلم انا زعلت قد ايه اللي وجعنى
اني مش عارفه ليه حزينه عليها وبنتها صعبانه عليا ازاي قدروا يشوفوني حزينه كده وهونت عليهم ده انا قلبي بيتقط،ع عليهم ومش عارفه انزل اخد بخاطر بنتها ولا افضل ع موقفي أنا كنت قاعده في شقتى سامعه صوت بنتها وهى بتقول يا أمي بقيت تزلزل جوايا
.
.
وافتكرت وقت ما كنت محتاجاهم فيه كنت محتاجه لحضن حد اترمي فيه واقول يا أمي الكلمه اللي انحرمت منها لأن مبقتش اقولها لحد بعدها مع اني كنت بقولها لحماتي الله يرحمها هى كمان
بس بعد الموقف ده مكنتش بتخرج مني السؤال هنا انزل اروح لبنتها ولا اعمل فيها زى ما عملت فيا جوزي بيقولي براحتك لأنه هو كمان كان زعلان منهم أوي
.
.
.
.
