قصة الشاهد الوحيد 1 & 2

الفصل الاول 1

الحكايه بدأت مع اختفاء بن جاري طفل عمره ٧ سنوات نزل الشارع يلعب مع أصحابه وما طلعش تاني 

في الوقت ده كنت قاعد بتعشي مع مراتي علشان كنا لسه راجعين من برا لحظه ما باب الشقه خبط علينا ولقيت استاذ محمد جاري بيسالني عن ابنه سيف يمكن يكون موجود عندي بحكم ان الشقه في وش الشقه وابنه كان متعود يجي عندي

طبعا انا في الوقت ده ما كنش ينفع اسيب محمد لوحده ونزلت علي طول معاه وابتديت انا كمان اسأل الناس والجيران اللي في الشارع عليه وزي ما تكون الأرض انشقت وبلعته وكل ما نسأل عليه حد يقول ما شفهوش خالص النهارده 
كنا في حاله قلق بسبب ان من فتره في بنت اختفت وهي كمان من المنطقه وللأسف محدش عرف عنها حاجه 

روحنا بعد كده القسم علشان نعمل محضر بس الغريبه ان الضابط اللي موجود قالنا مش هينفع محضر في حالات الاختفاء غير بعد مرور ٤٨ ساعه
 بس طبعا احنا ما سكتناش ودخلنا لرئيس المباحث وكان متعاطف جدا معانا وأمر بأن ينزل معانا ضابط وامناء شرطه المنطقه 
اول ما رجعنا المنطقه ابتدي الضابط انه يسأل في الشارع علي كاميرات المراقبه الموجوده في المحلات 
بس للاسف كل المحلات الموجوده قدام البيت الكاميرات بتاعتها مش جايبه الشارع 

وكان المحل الوحيد اللي له كاميرات جايبه الشارع كان بيعيد عن البيت بحوالي ٢٠٠ متر وابتدي الضابط فعلا انه يفرغ الكاميرات بتاعه المحل ده بس للاسف مش موضحه اي حاجه 
ابتدي الضابط بعدها انه يسأل الجيران وكل اللي موجود في الشارع بس كان الكلام كله واحد ان محدش شاف الطفل 
وابتدي بعدها الضابط يسأل محمد ان كان في بينه وبين حد مشاكل ولا لا بس طبعا الاستاذ محمد كان في حاله جدا وانا بقالي سنه ساكن جنبه عمري ما شوفته بيزعق مع حد او بيعلي صوته بالعكس ده كانت الجيران كلها بتحبه 

ولما الضابط ساله طب في حد انته شاكك فيه انه يكون وراء اختفاء ابنك كان نفس الرد لا 
ابتدينا بعدها نقسم نفسنا مجموعات احنا والجيران وندور في كل المستشفيات واقسام الشرطه علي امل ان احنا نوصل للطفل بس للاسف كان كله بيطلع علي ما فيش 
فضلنا اكتر من يومين علي الحال ده مش عارفين عن الطفل حاجه وكنت طول الوقت بحاول علي قد ما اقدر اني اطمن والده عليه كان عندي احساس بأن الولد هيرجع تاني بس مسأله وقت مش اكتر 

في اليوم التالت كان لازم انزل شغلي كان بقالي يومين قاعد وبعد ما خلصت شغلي ورجعت البيت
 مراتي كانت تصرفاتها غريبه شويه وكلامها كان أغرب ولما سألتها مالك وقبل ما تجاوب عليا 
لقيت باب الشقه انكسر والبوليس حواليا في كل مكان 

الجزء التاني 

لحظه ما باب الشقه انكسر لقيت البوليس حواليا في كل مكان وزي ما يكون كان مستني اني ادخل البيت علشان يقبض عليا كنت واقف مش عارف اتصرف ازاي او اعمل ايه وفي غمضه عين لقيت امين الشرطه بيحط الكلبشات في ايدي 
ولما سالته في ايه قالي لما نروح القسم هتعرف كل حاجه 
كنت واقف في حاله ذهول ومش عارف اتصرف وانا كل اللي علي لساني عاوز افهم انا مقبوض عليا ليه 

نزلت من الشقه وركبت البوكس حاولت اني اتكلم مع امين الشرطه علشان افهم منه بس للاسف ما ردش عليا 
اول ما وصلت قسم الشرطه اتعرضت علي النيابه علي طول ولما سألت وكيل النيابه انا مقبوض عليا ليه كان رده عليا انه مجرد اجراء روتيني ومحتاجين مني اني اجاوب علي شويه اسئله وبعدها امشي 
كان اول سؤال ليا انا كنت فين يوم اختفاء سيف وكان ردي عليه اني في اليوم ده كنت اجازه من الشغل وكنت موجود في البيت لوحدي ومراتي كانت عند اهلها وكان عندي فني تصليح تلاجات كان بيصلح

التلاجه وبعد ما خلص شغله قومت لبست وروحت عند أهل مراتي قعدت معاهم وبعد كده نزلت انا ومراتي اتمشينا شويه ورجعنا البيت وبعد ما دخلنا البيت بنص ساعه كان الاستاذ محمد بيخبط علينا الباب وبيسال عن ابنه وهو ده كل اللي حصل في اليوم ده 
بس بعد كده لقيت وكيل النيابه بيفتح الدرج وبيطلع منه فرده شبشب وبيقولي ان دي كانت موجوده في الشقه عندي وانها تخص سيف 
بس انا كان ردي عليه انه عادي علشان الطفل كان بيجي علي طول يلعب في الشقه عندي وخاصه ان مراتي كانت بتشغله اللابتوب ولو مش مصدق كلامي عندك مراتي تقدر تسالها وهي تاكدلك الكلام ده 

بس كانت صدمتي بعد كده لما عرفت منه أن اللي مقدم البلاغ فيا تبقي مراتي وانها بتتهمني باختفاء سيف بسبب تصرفاتي الغريبه في الفتره الاخيره 
كنت واقف في حاله ذهول من كلام وكيل النيابه اللي سمعته منه وانا كل اللي علي لساني اني ما اعرفش حاجه 
وفضلت اكتر من يومين محبوس كل ساعه والتانيه اسأله وعرض علي النيابه واني السبب في اختفاء سيف 

وبعد مرور ٤ ايام كان طلع اذن االافراج عني ولما سألت ازاي عرفت ان الاستاذ محمد شهد ان الشبشب ده كان ضايع قبل اختفاء سيف بيوم 
اول ما خرجت من قسم الشرطه كان واقف الاستاذ محمد مستنيني هو والجيران ومراتي كانت موجوده معاهم 
ما كنتش عاوز ابص في وش حد منهم بس لقيت الاستاذ محمد عمال يتاسف لي كتير هو ومراتي 

وبعدها مراتي بدأت تقولي انه كان غصب عنها اللي حصل بس هي ما عملتش كده غير لما لقت فرده الشبشب بتاعته في الشقه 

رجعت الشقه وبعدها بشويه لقيت مراتي بتقولي انها جهزت العشاء بس انا رفضت اني اقعد اكل معاها ودخلت اوضه الأطفال ونمت فيها 

صحيت الصبح ونزلت شغلي وانا في الشغل جالي رساله غريبه علي الفون بعد ما قريت الرساله ما عرفتش اني اكمل شغلي ومشيت علي البيت وانا في الطريق اتصلت علي فني تصليح الثلاجات علشان الثلاجه عندي كانت عطلت تاني 
بعد ما وصلت البيت بنص ساعه كان الفني بتاع التصليح وصل وشاف العطل اللي في التلاجه وصلحه ومشي 
بعدها مراتي جهزت الغداء بس انا بردوك كنت زعلان منها وسبتها ونزلت كنت رايح أصلح العربيه عند الميكانيكي وما رجعتش الشقه غير حوالي الساعه ١٢ بالليل 

بعد ما رجعت البيت كانت قاعده مستنياني وبتطلب مني اني اسامحها بس انا كان ردي عليها 
انها تقوم تجهز شنطه هدومها علشان تروح لاهلها وما ينفعش انها تقعد معايا بعد اللي عملته
طلبت مني اني اسبها للصبح علشان الوقت اتأخر بس انا صممت علي رأي انه دلوقتي 
بعد ما مراتي جهزت شنطه هدومها نزلنا وركبنا عربيتي علشان تروح لاهلها كنا علي طريق زراعي وما فيش اي حد علي الطريق غيرنا ومره واحده العربيه عطلت تاني

نزلت علشان ابص علي العربيه واعرف ايه سبب العطل بس كانت الدنيا ضلمه 
طلبت منها انها تنزل علشان تنورلي بكشاف الفون ولما نزلت خبطتها علي راسها بحديده كانت في ايدي واغمي عليها 
سحبتها بعيد عن العربيه وكان في كوم قش كبير ابتديت اني اجيب منه واحط عليها وبعد كده ولعت في كوم القش علشان محدش يتعرف علي الجثه
وركبت عربيتي علي طول ومشيت بعيد عن المكان لغايه ما بعدت عنه خالص بعدها وقفت بالعربيه علشان ارد علي الرساله اللي جاتلي وانا في الشغل واللي كان نصها اني اق.تل مراتي ورديت علي الرساله وبعت رساله مكتوب فيها ان المهمه تمت بنجاح وفي انتظار ردك 

­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ ­ .