مشكلة عضو
.
.
.
.
السلام عليكم كنت حابب اخد راي الناس الخبره في موضوعي انا عندي ٣٠ سنه
مخلص كليه صيدله ولكن لاني دخلتها غصب عني تركت المهنه ومسكت مضرب الرز
بتاع والدي في البحيره انا طبعا وحيد ووالدتي توفاها الله من سنتين
خطبت دكتورة صيدلانية عمرها ٢٨ من بيت محترم وقت الاتفاق
طلبوا ١٠٠ جرام دهب ولم اعترض هما من منطقه اسمها حوش عيسي
وقالولي ان تجهيز البنت بيكون علي العريس كاملا وانا وافقت وكمان المؤخر ٥٠ الف
اديته للبنت وكان عندي شرط أن مفيش حاجه اسمها قايمه انا هجهز كل حاجه
.
.
من الابره للصاروخ واشتريت شقه تمليك في نفس منطقتها عشان عملي
وعشان تكون جنب أهلها المهم جهزت كل حاجه مبخلتش عليها بحاجه والبنت
صراحه مكنتش متعبه بالعكس ريحتني جدا ومثلا انا اخترت غرفة نوم سعرها ٤٠ تقولي
حرام كتير مش عايزة اكلفك صراحه بنت مشفتش زيها وخلصنا شقتنا وفرشنا
وقبل كتب الكتاب بكام يوم والدتها طلبت تقابلني المهم رحتلها لقيتها بتقولي
.
.
يا اما نكتب قايمه كامله بكل الحاجات يا اما تكتب الشقه باسم البنت قلتلها
في اتفاق رجاله ورحت لحمايا للاسف موصلتش لحل معاه المفروض كتب الكتاب
.
.
يوم الخميس والبنت معترضه علي كلام امها وبتقولي انا مستعده اعملك تنازل
عن الشقه مباشرة بعد ما تكتبها باسمي بس متسبنيش اتكلمت مع ناس خبره
.
.
قالولي الاوله شرط آخره نور ولازم ترفض تماما وانا مش عارف اعمل ايه
انا مستعد اكتبلها الشقه ولكن الموقف مضايقني جدا ومش عارف اتصرف ازاي
.
.
ياريت الناس تنصحني وانا صليت الاستخارة وقررت انزل علي رأي الاغلبيه
حتي لو مش علي هوايا طبعا والدي رافض المبدا وبتقولي المسلمون
عند شروطهم ولكن قالي انت حر
