فلما لفيتلها لقيت ياسمين مقربه من وشي وبتبصلي بحده وهي مبرقه وبتقولي أقتليني .. اتخضيت !!
قولتلها بتقولي ايه ؟
قالتلي ماكنتيش بتسالي عليا ليه طول الفترة اللي فاتت دي ؟!
قلبي هنا كان بيدق جامد وانا باصالها عيني فيعينها وملامحها كلها جد وعينها مفتوحه على اخرها مع انها لازقه في وشي ومش بشوف ملامحها المخيفه دي غير كل خمس ثواني لما البرق ينور الضلمة اللي احنا نايمين فيها
ساعتها قولتلها كلنا بنتشغل في حياتنا بس ما بننساش بعض .. وانتي متغيرة من ساعة ما جيت .. قالتلي انتي اتاخرتي قوي يا سارة ..اتاخرتي قوي وفجأة صوت الرعد ضرب جامد غمضت عيني وفتحتها لقيت ياسمين رجعت نامت مكانها ومدياني ضهرها ..
فضلت نايمه ومش عارفه اديها ضهري وحاسه اني مرعوبه .. والدنيا سقعه قوي .. بس قررت اخد موبايلي واقوم اقعد في الصاله شويه قومت وفتحت باب الاوضه بالراحه وطلعت عالصاله لقيت النور كله مطفي ماعدا لمبه صفرا جمب باب الحمام عشان لو حد قام يدخل الحمام بليل
مارضتش انور نور الصاله واستكفيت بالاضاءه الخفيفه اللي جايه من اللمبة دي وقعدت على الكنبه الجو برد جدا مش حاسه بكل اطرافي برغم اني متقله جدا .. بصيت في الساعه لقيتها 12 ونص .. مش عارفه اخش انام مع ياسمين ولا استنى لحد الصبح وارجع بيتنا
انا حاسه اني تعبانه ومحتاجه انام .. لقيت دمعتي نزلت حاسه بتعب وحاسه اني غريبه زمان كنت بنام على الكنبه من كتر السهر والضحك وكنا نطلع الدور اللي فوق انا وياسمين نلعب وبعدها ننزل ننام البيت عباره عن دورين سطح الدور اللي تحت صاله كبيرة واكثر من 6 غرف والدور اللي فوق فيه غرف برده وبعدها السطح اللي كنا بنسهر فيه كلنا مع الشاي والقهوه والمكسرات
الدور اللي فوق ماحدش بيطلعوا كتير كان بتاع جدي وجدتي الله يرحمهم .. بس لما بنكون كتير بنطلع الدور اللي فوق عادي .. وانا مش عايزة ارجع انام مع ياسمين .. قومت بهدوء وروحت ناحيه السلم اللي بيطلع عالدور التاني وصوت الرعد مش راضي يسكت طلعت السلم وانا مش قادره هموت وانام .. فكرت اني فعلا ممكن انام فوق حتى لو لوحدي
.
وصلت الدور اللي فوق كله ضلمه نورت النور لقيته مش شغال ؟! شكل خالتي وياسمين قاعدين في الدور التحتاني على طول ومش بيطلعوا فوق !! مشيت ناحية الاوضه الكبيره وجيت افتح الباب لقيته مقفول بمفتاح روحت لاوضه تاني لقيتها برضه مقفوله ! روحت ناحية اوضه في اخر الطرقه لقيتها فتحت .. فتحت الباب بالراحه وانا سامعه صوت الصدأ بتاع مفصلاته
دخلت ونورت كشاف الموبايل حاولت اشغل نور الاوضه مش شغال بس في حاجه كويسه لقيت السرير مترتب ونضيف دا معناه ان خالتي نضفت الاوضه واقدر انام فيها قفلت الباب بالراحه ودخلت نمت عالسرير شميت ريحة كمكمة غريبه الاوضه دي عيبها مافهاش سيتاره عالشباك والشباك كبير فنور الرعد ضايقني اديت ضهري للشباك واضغطيت وحاولت انام بصيت في الساعه لقيتها 1 الا ربع
.
.
الوقت بيمشي بطئ قوي .. وحصلت اكتر حاجه بكرهها نسيت الشاحن تحت والموبايل قرب يفصل قررت اسيبه عشان يكمل شحن للصبح .. بعدها مع ضوء البرق اللي شايفاه على الحيطه قدامي عشان اديت ضهري للشباك لقيت خيال واحده واقفه ورايه على الحيطه اللي قدامي لفيت بسرعه وبصيت ورايه مالقتش حاجه ؟!!
انا اعصابي سابت خالص ..وفضلت باصه ناحية الشباك .. مع الخوف بدات اتنفس جامد وهنا شميت ريحة مش حلوة خالص حسيت ان الاوضه مهما نضفت بس شكلها ما اتهوتش ريحتها مكتومه وفجأة سمعت صوت حاجه بتتحرك حواليا فضلت باصه حواليا وجبت كشاف الموبايل ونورت لمحت فار كبير بيجري تحت الدولاب
وانا بخاف جدا من الفيران .. قررت اقوم انزل تحت واقعد في الصاله لحد الصبح او انام عالكنبه وخلاص في السقعه احسن من الاوضه اللي انا فيها دي ..
بس عشان السقعه قررت اخد البطانيه معايه عشان شكلها نضيف شيلت البطانية والموبايل وجيت افتح باب الاوضه لقيت مافيش اكرة من جوه فضلت باصه عالباب للحظات رميت البطانيه عالسرير وحاولت افتح الباب مش عارفه
جبت موبايلي وبعدها اتصلت على ماما رن 10 ثواني بعدها التلفون فصل .. هنا انا قعدت على السرير وقعدت اعيط عيطت جامد عمري ما تخيلت اني هتبهدل هنا البهدله دي ..
قعدت على السرير وقررت اهدى عشان اعرف الاقي حل الاوضه فيها سرير وتحتيه كراكيب وفي دولاب وتسريحة
.
.
اكيد لو الاكرة مش متكربه اكيد جوة الاوضه في درج من الادرج .. فتحت اول درج .. في التسريحة لقيت صور كتير قوي لينا للحظة نسيت نفسي وفضلت اتفرج عليهم على النور الخفيف اللي جاي من الشباك او بحاول انسي نفسي اني في مصيبه بس لاحظت حاجه غريبه قوي في صورة قديمة ليا….
بيت العيلة. الجزء الثالث
.
.
.
.
