السلام عليكم
انا معلمه في مدرسة ليا 12 سنه وفي حالي مش مختلطه بحد خصوصا المدرسين
شغل وبس وصباح الخير مش اكتر المشكلة انا ليا صديقه قريبه ليا طول السنين دي
اكل مع بعض وبنحكي مع بعض اخبار يومنا حتي بعد ما نروح البيت
لو حصل حاجه نتصل يعني طول اليوم مش بنفارق بعض حتي الفسح في الإجازة
مع بعض اللي حصل إن كان في استاذ قريب منها خالص وتليفونات وهزار واخدين علي بعض
الكلام ده من سنتين انا مكانش عاجبني الوضع حكيت معاها أنه غلط
وان الاستاذ ده مستبعد من مدرسة بسبب قضية تحرش
زعلت مني وقالت احنا مشوفناش منه حاجه وهو اللي بيخدمني في المدرسه
وهو اللي واقفلي لما المديرة تضايقني وبعدين هو زي ابويا دا كبير وكلام من ده
مرت الايام ولقيت زوجها رن عليا بحيث اني اقرب اصدقاءاها بيقولي ويحلفني
ايه العلاقة اللي بين مراتي وفلان طبعا أنا انصدمت وقلتله ايه الكلام ده
هي ديما تقول ده زي اخويا الكبير أو ابويا وكده
قالي انا شفت رسائل علي الموبايل قلتله انا معرفش اكتر من كده
مرضيتش اقول كلام تاني لانه كان متنرفز وحسيت بيتها هيتخرب
المهم بعدها بيومين رنيت عليها لقيتها غضبانه في بيت ابوها وطلقها
بس قالتلي كلام تاني أنه مش قاعد في البيت وكدا
وانا مقلتش أنه رن عليا وسألني عشان المشكلة متكبرش
المهم بعد شهر رجعوا واتصالحوا وحاول ينقلها من المدرسه كان صعب
المفروض انها ترجع متكلمش الشخص ده بالعكس بقي رجعت اكتر من الاول
والشاي والحلويات اللي مضايقني بقي اني لقيتها مدخلاني معاها
في كل حاجه الاقيها بتحكيله علي اللي بيحصل معايا
.
.
وفي بيتي وتقوله هي بتعمل كذا وبتاكل كذا وجوزها اشتري كذا رحت شديت معاها
واتخانقت معاها ورجعنا تاني وتتكرر تاني المواقف دي وتعملوا الشاي وتقولوا الشاي بتاع صحبتي
وهو يمشي في المدرسه يقول الشاي بتاع فلانه وهي تنبسط وانا معروفه في المدرسه
مختصرة ومش بتاعة كدا
المهم من يومين شديت شدة كبيرة بسبب الحوارات دي
ومش قادرة ارجع زي الاول وبدخل أصبح عليها واكلمها ترد بالعافيه
ولاويه في وشي وهي دلوقتي اختصرته خالص
يعني اللي عملته لمصلحتها وانا صعبان عليا العشرة والعيش والملح اللي بينا
.
.
.
.
