انا طبيب بشري ٢٦ سنه وكنت خاطب واحده من منطقه شغلي اتعرفت عليها عن طريق الشغل وكنت بكشف علي مامتها المهم هي دبلوم تجاره وكملت ودخلت كليه تجاره
المهم دخلنا في قصه حب متبادل لمده ٤ شهور وخروجات وفسح وهدايا وحب مميت وكلام ٢٤ ساعه حرفيا اهلي حطولي العقده في المنشار والكلام اثر عليا
..(امها تقريبا تعليمها زيهم اخواتها البنات دبلومات ولسه صغيرين واخوهم الوحيد دبلوم وحالتهم الاجتماعيه ضعيفه جدا ) انا اقنعت اهلي اني بحبها وضغطت عليهم جامد جدا وتمام وافقو يجو معايا يشوفو الدنيا راحو اول مره انطباعهم عن المكان اللي قاعدين فيه
والعماره وشقتهم كان سئ جدا جدا وأبويا باللفظ قالي انا مش رايح تاني وعدت الايام وقعدت اقنعهم ووافقو علي مضض انهم يروحو تاني هناك ورحنا قرينا الفاتحه
وجبنا الشبكه ومن هنا المشكله بقيت اسمع كلام زي السم من قرايبي كلهم واهلي اولهم واخويا قالي بالحرف وانا بتناقش وهو بيسألني عن خطيبتي عامل ايه معاها فقولتله تمام يعني الجواز لازم تختار حاجه علي حساب حاجه لقيته بيقولي انت مختارتش اي حاجه خالص وكل محد يسألهم خطب مين يسكتو وحاسين بالاهانه
ومش بيقولو هما ساكنين فين ولا حابين يقولو انها تجاره …المهم عدت الايام وابويا كلم اعمامي وقرايبي وفتحلي الاسبيكر وهو بيكلم عمتي وهي متعرفش اني سامع قعدت تعتت فيا وازاي ابنك حاجه كبيره ازاي كدا والبنات بتصطاد وشايف ولاد اخوك متجوزين ايه وانت ولادك حاجات عاليه ليه تعمل كدا والكلام اللي زي دا بقي لمده ساعه متواصله
طبعا الخطوبه وتلبيس الدبل كان بعد يومين وكانت مأجره الفستان وحجزت ميكب وانا نفسيتي تعبت ومحستش اني هبقي فرحان واهلي حاسس انهم مستعرين من الجوازه بتاعتي وبيراضوني وخلاص وبيتكلمو من ورايا والبنت ملهاش ذنب في دا وحسسوني اني هبقي قله في وسط قرايبي كلهم وانا بصراحه بحب البنت جدا جدا
وهي التفصيله بتاعتي المهم انا خدت القرار وقولت بدل ميكلفو نفسهم في الخطوبه ومصاريف كتير جدا هتتدفع ويحصل اللي بنسبه كبيره ممكن يحصل بعد الخطوبه فانا كلمتها وقولتلها ان المووضوع في مشاكل
وياريت نلغي الحجز بتاع القاعه والمصاريف ونلحق الدنيا في اولها طبعا انا بتكلم وانا مأهور ومتفحم من العياط بس مفيش بايدي حاجه اعملها طبعا هي انهارت في التلفون وعياط جامد واهلها دخلو عليها ودخلو كلهم في المكالمه والموضوع بقي دراما صعبه
.
.
وهي مش فاهمه في ايه وفاكراني بهزر المهم انا دلوقتي حاسس بالذنب وتأنيب الضمير لاني والدي وهو بيبلغهم مقالهمش اسباب لانه مش هينفع يقولهم انت وضعكو كذا وكذا ..انا دلوقتي منهار جدا جدا ومش عارف حل الموضوع دا ايه بعد منتهي ومشاعر البنت هتبقي ايه بعد كدا وشايل همها جدا وخصوصا انها كانت مخلصه ليه لابشع درجه ممكن وبتحبني وانا بحبها حب مميت
وصارحتني بحاجات كتير انها اول مره تحب هو انا وانا كمان كنت كدا معاها مليش تجارب بس اللبن اتعكر خلاص ومفيش حل وخالها اتصل وقال بنات الناس مش لعبه وقال اللي في قلبه وطبعا احنا منطقناش بكلمه لاننا راكبنا الغلط كله انا فعلا حاسس بذنب رهيب ومش هعرف ارضيها اساسا تاني خلاص كدا
وفعلا البنت مأثرتش معايا في اي حاجه بس انا اللي كنت حاسس اني هظلمها معايا بعد كدا لو عديت فتره الخطوبه وانا حاسس منهم كلهم بالشعور دا كدا واني مناسب ناس قليله بالنسبالنا وابويا قعد يقولي اخوها دا هيبقي خال عيالك ازاي وانت لما يحصل مشكله هتروح لمين ..
انا منمتش بقالي يومين ومش عارف عدل الموضوع دا ايه هل الايام هتنسيها فعلا وتنسيني ولا هنفضل متعلقين ببعض كدا طب انا بحكم شغلي هنشغل شويه هيا هتتشغل ازاي انا ظلمتها معايا وظلمت نفسي وتعبت نفسيا وحاسس ان الموضوع دا هيكمل معايا فتره طويله مش عارف اعمل ايه…..
.
.
.
.
