سمعت كلام حماتي بودني وشوفت ضحك جوزي المبسوط اووي أن أمه
بتقول عليا بومه وسكت مانا لازم اسكت عشان الحياة تمشي وبيتي مايتخربش اكتر يعني
امي علي طول تقولي كدا
-انتي مابتشوفيش الستات بتمشي أمورها ازاي وعايشه ، انتي ماشوفتيش فلانه دي بتلف البيت كله علي صوابع أيدها وبتعمل مش عارف ايه ؟؟ زهقت انا الخيبة اللي في الستات يعني المهم
قولت بصبر وثبات لرمضان :
-اطلع انت والولاد وقول لحماتي اني جايه وراك صممت اشتري لها ازازتين بيبسي من علي أول الشارع ..
-مانا جايب فعلا
-عارفه هدخل بيهم بعد شويه لما تعرف اني جايه يمكن تحترمني شويه وتخاف علي خاطري ..
طبطب عليا وقالي :
-الله يباركلك ياعزة والله انتي ست الستات ..
-يالا ياشرف ادخل مع بابا وماتقولش حاجة لحد
اشرف : حاضر ياماما
خبط رمضان ودخل حماتي استقبلته كالعادة بالاحضان واللهفة أبنها الكبير واول فرحتها ماخلفتش غير رمضان وربيع وبنت اصغر من الاتنين متجوزة في المنصورة اسمها بسمة :
الحما : ادخل ياحبيبي تعالي ياشرف
رمضان : عزة في المحل بتشتري لك بيبسي ياماما عارفه انك بتحبيها .
الحما : تشكر والله وليه التعب دا
طلعت علي السلم وانا بحمد ربنا أنها افتكرت تقول كلمه حلوة في حقي لاقيتها بتقول لرمضان بصوت واطي :
الحما :ايه القرف اللي الواد لابسه دا
رمضان بتلجلج : ماله قميص وبنطلون حلوين ياماما
الحما :لا شكل القميص قديم و يقرف قول لمراتك ماتلبسهولوش تاني
اتسمرت مكاني مش عارفه ادخل اجيب سكينة من المطبخ وافتح بطنها واخلص ولا اعمل ايه في الجبروت دا اقولها ايه بس ابنك مش موظف وبيشتغل ع عربية لوري اخر الليل وعايشين بستر ربنا ولا اقولها أننا بناكل لحمة مرة في الشهر مش زيها مرتين في الاسبوع كل دي تفاصيل ممكن تبقي عادية بالنسبة لأي حد بس بالنسبة ليا أنا وعيالي اللي بلبسهم مستعمل كبيرة أوووي ?
الاب قاعد في الصالة دخل عليه اشرف ساب كوباية الشاي وخده ع رجله ونجوي واقفه في المطبخ وعماله تقول مش لو كنت خلفت دلوقتي كان زمان عيالي انا اللي ع رجله دلوقتي ،، بصت لاقته مطلع 50جنية واداهم للولد اللي بص لابوه الاول لحد ماهو رأسه خدها فاخدها
وقاله : اشرف :شكرا ياجدو بابا بيديني مصروف علي طول
الجد : وايه يعني أنا جدك وربنا مديني عندي وكالة كبيرة فيها كل الحبوب فول وعدس وفشار انزل تحت خد اللي انت عايزه منها وسيبك من ابوك اللي ماشي ورا امك ..
اشرف : بتقول كدا ليه ع ماما ياجدو
سكت الجد ومارضيش يفتح في القديم ويقوله أن أبوه ساب شقته في الدور التالت بسبب أمه وتحكماتها فيه وفي مراته ولازم يصحوا بمواعيد وكل شويه معايره بالاكل وباللبس اللي بتشتريه الراجل عارف ان مراته شديده ومع ذلك مستحملها عشان عشرة عمره ورفيقة شقاه ..
لطمت نجوي علي وشها وهي بتقول :
وكمان هينزل ياخد اللي هوا عايزه ،الراجل دا شكله خرف ومخه اتلحس
صوت اقدام علي السلم عزة بتمثل أنها بتفتح الباب وداخله عشان ماحدش يقول كانت بتتصنت ..
دخلت وماسكه الشال في علبة هدايا زهري وفي الايد التانية الحاجة الساقعة
عزة : سلامو عليكو
الجميع : وعليكم السلام ورحمة الله وبركاته
عزة : ازيك ياماما ،كل سنة وانتي بالصحة والسعادة
الحما :ايه دا ؟؟ مسكت العلبه تبص عليها من برا
عزة ورمضان في صوت واحد : افتحيها وانتي تعرفي ،مسكت الشال بأطراف صوابعها هي اصلا مش محتاجة معها ومقتدره بس ناشفه شويه وبخيلة جدااااااااا قالت
الحما : ومالقتيش حاجة ارخص من كدا شويه
وش عزة احمر وبصت لجوزها اللي قام ووقف والدم ثار في عروقه وكان هياخد عياله ويروح لولا أمه لمت الدور وقالت قبل مايتصرف :
الحما :اقصد يعني أن دا جميل وغالي انتوا أولي بفلوسه رمضان بيشقي برضو ولازم تحافظي علي فلوسه ..
عزة : مافيش حاجة تغلي عليكي ياماما
الحما : ادخلي تعالي اديني امل اشيلها
.
.
طلعت نجوي من المطبخ بتحرك أيدها شمال ويمين عشان توريها الدهب بتقولها بالطريقة انا متجوزة داخله علي سنة اهو ولسه عروسة وبتدلع ودهبي معايا وبيزيد مش زيك ماستحملتيش شهر وجوزك بيعك دهبك عشان كرامة حضرتك الفلسو ..
نجوي : مساء الخير ،اهلا وسهلا ياعمي رمضان
ازيك يا اشرف ، نورتي ياعزة
عزة :الله يخليكي يانجوي
نجوي :: هاتي ياماما امل عنك عشان دراعك
عزة في سرها : ياحنينه
رمضان :خدي بالك منها يانجوي
نجوي :طبعا دي بنتي
عزة بصت لها و قالت قصدك زي بنتك ..
وقفت نجوي لحظات وبعدين دخلت الاضة من غير ولا كلمة افكارها شغاله في رأسها
نجوي :بكره ربنا يديني واوريكي ي عزة يا بنت فتحية هعمل فيكي ايه انتي وخلفتك المعفنه دي ..
نزل الاستاذ ربيع مدرس الحساب في مدرسة القرية الابتدائي هو الصغير وحظه كان حلو كمل تعليمة هو وبسمة خدت دبلوم أما رمضان فاشل من يومه طلع من الاعدادي يادوب بيعرف يمضي ويقرا خفيف كدا ..
ربيع : السلام عليكم .. اهلا يابو اشرف
ازيك ياعزة
عزة :تسلم من كل شر
رمضان :اهلا يا أستاذنا اخبارك ايه ؟
ربيع :الحمد لله ماشي الحال ،
رمضان :يارب دائما تبقي بخير
الاب : روح العب انت ياشرف وانزل الوكالة وقت ماتحب
رمضان :وكالة ايه ي حج ؟
الاب :مالكش دعوة انت خليك في زعلك
رمضان :زعل ايه بس يابا ربنا مايجيب زعل
الاب :لا فيه وانا زعلان من بعد احفادي عني وبهدلتك يابني ارجع اشتغل معايا في المحل انا محتاجلك ..
رمضان :معاك ربيع اهو والصبيان ماكترهم بيسدوا في أي حاجة
الاب :لسه راكب دماغك عموما مكانك محفوظ وحقك ماتخافش
رمضان :ربنا يبارك في عمرك يابا ليه الكلام دا حسك في الدنيا ودا مالك تحكم ماتشاء
دخلت الحما المطبخ وقالت بصوت عالي :
يالا العشاء جاهز تعالوا ناكل لقمة سوا ،
دخلت عزة المطبخ عشان تحضر الاكل رفضت حماتها بالذوق وقالت لها معلش نادي نجوي اصل هي اللي عارفه مكان الاطباق والحاجة ..
عزة : ياسلام ياعقربة ي حيزبونة عايزا تفهمني أن نجوي احسن مني وبقت زي بنتها عارفه كل تفاصيل بيتها يعني عموما اشبعوا ببعض .. رفعت صوتها بأدب : حاضر ياماما بالمرة ادخل وشوف امل ،دخلت الاوضة علي نجوي من غير ماتخبط واول ماشافت منظر بنتها صوتت وقالت بنتي ..! يتبع
رواية سلفتي الجميلة. الجزء الثالث
.
.
.
.
.
.
