انا مش بعرض مشكلتي علشان اتهاجم فلو سمحتم اللي عنده اهانه يحتفظ بيها لنفسه
اولا انا دكتور ومتجوز دكتوره وعندنا. ولدين ربنا يحفظهم
من حوالي خمس سنين والدتي تعبت جدا وكان لازم حد يفضل جمبها ويراعيها ولانها كانت قعيده يدخلها الحمام وكده
اخواتي البنات متجوزين ومفيش واحده فيهم هتعرف تسيب بيتها
عرضت علي مراتي انها تسيب الشغل وتراعي والدتي رفضت هي بصراحه كلمتني بالذوق وبالعقل واقنعتني انها ماينفعش تسيب شغلها لانها لسه بتبني نفسها وكده وعلشان تراضيني خصصت اوضه لوالدتي في شقتنا وقالتلي هتيجي تعيش معايا ونجيبلها ممرضه تراعيها وانا هعملها كل اللي اقدر عليه لما اكون موجوده بس مش هقدر ادخلها الحمام وكده
وفضلنا ع الوضع ده لحد ما والدتي ربنا توفاها من سنه
بعدها بفتره حمايا عمل حادثه هو وحماتي هي توفت وهو جاله شلل ربنا يشفيه يارب
قعد في المسشتفي لحد ما بقي كويس وجيه وقت خروجه وهنا بدأت المعضله
اخواتها الاولاد قالولها انهم عاوزينه يعيش معاهم وهي رفضت وقالت ابويا مش هيتكشف علي واحده غريبه سواء زوجات اخواتها او ممرضه
واخواتها كانوا متمسكين بابوهم علشان عارفين اني هتضايق لو جابتوا يسكن معانا فاتوصلوا لحل وسط وهو انهم ياخدوله شقه جمب شقتنا ويدفعوا ايجارها ومراتي هي اللي تخدمه
الغريب بقي ان مراتي سابت الشغل!!
قدمت علي اجازه م الحكومي وسابت البرايفت تماما
يعني كلامك عن الكيان وببني نفسي كان ايام امي بس ؟
حاولت اعمل مشكله واتحججت بانها هتقعد م الشغل يبقي هتصرف علي ابوها منين وفلوسي يادوب تكفي الولاد والمدارس
اكتشفت ان اخواتها بيعطوا لابوها شهريا 5 الاف جنيه للعلاج بس وبيجيبوا الاكل واغراض البيت كل يوم وهما بيزوروه
قلت هراقبها اشوف هتقصر في شغل البيت ولا لا
وماحصلش لانها اصلا شاطره وبتعرف توفق بين كل حاجه
اتحججتلها ان طول ما انا موجود عاوزها تبقي قاعده معايا راحت غيرت مواعيدها مع اخواتها يعني هي بتقعد مع باباها وانا في الشغل ولما ارجع اخواتها بيجوله
يعني م الاخر مفيش مهرب او حجه
انا عارف انكم هتقولوا عليا عيل بس حطوا نفسكم مكاني لما مراتي اللي كانت بتتقرف تدخل امي الحمام بتصحي في عز البرد علشان تروح لابوها شقته تشوفه اذا كان عاوز يروح الحمام ولا لا!
انا اتخنقت لدرجه اني وصل بيا اني اطلقها
بس خايف علي ولادي
.
.
.
.
