تقول صاحبه القصه.
انا دكتورة صيدلانية عايشة في شقة مع بنتي لوحدنا..بعد سفر زوجي للخارج ..ملك بنتي عمرها 6 سنين
هي أجمل حاجة في حياتي هي أصلا كل حياتي
.
.
.
.
بنزل الشغل كل يوم الصبح واخدها معايا الحضانه
ولما ارجع أعدي عليها واخدها ونروح
عندي الصيدلية بتاعتي تحت البيت بنزل أقعد فيها من بعد العصر لغاية الساعه 11 بالليل
أحيانا باخد ملك تقعد معايا تحت وساعات بسيبها
عند الجيران ..راجل و ست طيبين
كبار في السن ربنا ما رزقهمش بأطفال
والست أميمة جارتي بتفرح أوي لما أسيب ملك
عندهم ..
وساعات لما اطلع بالليل
والاقيها نامت عندهم ..جارتي تقولي خليها نايمه
بلاش نصحيها ..وانا اقولها معلش عشان الحضانه الصبح
وكمان لو قلقت بالليل ومكنتش جنبها ممكن تتخض
الحقيقة كانوا ناس ودودين جدا جدا
هما جيرانا من وقت ما سكنا في العمارة من 4 سنين
ناس طيبين جدا وعمري ما شوفت منهم الا كل خير
والحقيقة شايلين عني هم اني أسيب ملك لوحدها في الشقه
لانها ساعات بترفض تنزل معايا الصيدلية
جوزي بيتصل بيا كل يوم يطمن عليا وعلى ملوكه
بقوله اننا بخير الحمدلله
طب وشغلك والصيدلية
.
.
كله بخير متقلقش
المهم انت عامل ايه في شغلك
الحمدلله كله تمام مش ناقصني غير وجودكم جنبي
معلش هانت كلها كام شهر وتنزل اجازة ونتجمع من تاني
دا انا بعدهم باليوم والساعه
ربنا يحفظك وترجع لنا بألف سلامه
الامور كانت ماشية بشكل طبيعي ..من البيت للشغل
للحضانه للبيت والصيدلية
انا وملك وجارتي أميمة وجوزها الأستاذ حسن
.
.
دول محور حياتي واهتماتي الفترة الحالية
أهلي عايشين بعيد بطمن عليهم وبيطمنوا عليا من وقت للتاني
.
.
في يوم صحيت على خبر ضايقني
جيرانا مسافرين يصيفوا وهيغيبوا
أسبوعين تلاته ..انا مبسوطه انهم هيغيروا جو
لانهم تقريبا مش بشوفهم بيخرجوا الا للضروره
.
.
وانا بصراحه مبحبش ادخل في خصوصيات حد
بس هما كانوا بياخدوا بالهم من ملك
وانا بكون مطمنه وهي عندهم ..وانا في الصيدليه
او لو عندي مشوار مينفعش اخدها معايا فيه
بعد اسبوعين رجعوا تاني ..وكانوا مشتاقين لملك جدا
وهي كمان كانت مفتقداهم ..بيعاملوها زي ماتكون بنتهم
.
.
لدرجة اني ساعات كنت بغير على ملك منهم
بعد يومين من رجوعهم ..روحت اخدت ملك
من مدام اميمه بعد ما خلصت شغل وطلعت فوق
بعد ما دخلنا شقتنا وكنت بنيم ملك
لقيتها ماسكه دبدوب صغير
قولتها طنط أميمه أدتهولك يا روحي
لأ يا مامي دا ميدو هو اللي أدهوني
ميدو !! ميدو مين !
أبن طنط أميمه وعمو حسن ؟
أزاي يعني هما معندهمش ولاد أصلا
لا عندهم رجعوا بيه من المصيف
انتي متأكدة ؟
ايوه ..ليه هو ميدو مش كويس ؟
مش عايزه العب معاه تاني !
ها..لا يا حبيبتي مفيش حاجه ..يلا عشان تنامي
بكره عندنا حضانه
طب فين بوسة كل يوم
اهو احلى بوسه لأحلى ملوكه في الدنيا
طفيت النور وقفلت الباب ودخلت أوضتي
وفضلت افكر في كلام ملك
مين ميدو دا ؟..هما مش عندهم ولاد اصلا
يمكن تكون ملك بتتخيل وخلقت في خيالها
صديق من الخيال زي معظم الأطفال في سنها
ممكن ..بس لأ اومال جابت الدبدوب دا منين
مش عارفه ..بس لازم اعرف
تاني يوم وانا بنيم ملك لقيتها زعلانه
مالك يا روحي ؟
ميدو زعل مني وعايز الدبدوب بتاعه
ميدو تاني !! طب ايه زعله
اصل هو قالي اوعي تقولي لمامتك عني
ماما اميمه مخبياني وقالت لي اوعى تخرج من اوضتك
بس انا خرجت من وراها ولعبت معاكي
يعني هما مخبيين ميدو ومش عاوزين حد يعرف انه عندهم
ايوه ..وهو قالي خلي الدبدوب معاكي ..بس متقوليش لحد عني .
طب وهو عرف منين انك قولتليلي
معرفش ..هو عرف لوحده ؟
غريبة دي ..وليه اصلا جيراني عندهم طفل مخبينه
ممكن يكونوا خطفوه مثلا وهما في المصيف
لأ لأ ..يخطفوا ايه دول طبيين ..طيب مش يمكن اتبنوه مثلا
حتى لو اتبنوه هيخبوه ليه عن الناس
مامي..مالك ساكته ليه !!
مفيش يا روحي يلا تصبحي على خير
الموضوع فعلا مريب وانا لازم اعرف الحقيقه
الليلة اللي بعدها ..رنيت الجرس
ومدام اميمة فتحت لي وقالت أن ملك نايمه
ثواني هدخل واجيبها
فكرت بسرعه وقولت لها
لا خليكي انتي مرتاحه ..انا هدخلها بنفسي
