في منزل احمد وجنات
خرجت جني من المشفى وعادت برفقة والدها ووالدتها إلي المنزل
كانو سعداء للغاية بعودتهم…إجتمع حولهم الجيران يباركون عودة جني بالسلامه
اتت أسماء سريعاً تبارك عودة صديقتها وابنتها بالسلامه
اسماء…. الحمد لله على سلامتكم أنا فرحانه اوي انكم رجعتو تاني
جنات براحه….دا أنا إللي حاسه إني كنت مهاجره ورجعت وطني الحمد لله… الحمد لله…. إيه إللي إنتي شايلاه ده
اسماء… لما الدكتور قال إن جني هتخرج….قولت اجهز ليكم وليها شويه أكل كده علشان إنتي تعبانه ومش هتقدري تجهزي
جنات بشكر…يا حبيبتي ربنا يبارك فيكي تعبتي نفسك
اسماء….تعبت نفسي إيه….كان من فرحتي كان نفسي اجبلكم حتة من السما
جنات….. إنتي اكتر من أخت يا أسماء…. أنا فرحانه اوي إن ربنا حطك في طريقي وبقيتي صحبتي
اسماء….دا أنا إللي ربنا بيحبني علشان رزقني بيكي إنتي وياسين
أثناء حديثهم دخلو إخوة جنات حضنوها بشده وجلسو بجانب جني يقبلون وجهها الصغير وهم يبكون على ما حدث لها
اسماء….اسيبك أنا بقي تاخدي شاور وترتاحي ولو احتجتي أي حاجة قولي اسمااااااء هتلاقيني قدامك فورا
جنات بضحك….حاضر بس طالما أخواتي جم مش هتعبك هما بقي يشيلو شويه من على دماغي
في منزل سهيله
والدة سهيله….يا رأيك يا سوسو لو نخرج نشم هوا شويه ونخرج العيال
سهيله..بتفكير…. مليش مزاج أخرج انهارده
.
.
والدتها…. علشان خاطر عيالك يا سهيله العيال محبوسه مش بتخرج خالص
سهيله لنفسها…من أمتي وأمي بتحب الخروج أنا مش مستريحالك يا ماما بس همشي وراكي لحد ما اشوف في إيه
سهيله بصوت عالي … خلاص ماشي ياماما علشان خاطر العيال أنا هقوم ألبس
جهزت سهيله نفسها والاولاد ونزلو للأسفل…
وجدت ماهر جارهم الذي طلق زوجته منذ سنتين يقف أمام سيارته ويمسح زجاجها
فقالت والدتها بصوت عالي….هو إحنا هنلاقي مواصلات بسهولة…شكلنا كده العيال هتتمرمط معانا
.
.
ماهر بسرعه… أنا عربيتي تحت أمركم يا حاجه توديكم مكان ما انتو عايزين
سهيله لنفسها… حاسه إني ابتديت أفهم .. أصل دي حركات أمي وأنا عارفاها
.
.
والدتها…. يعني مش هنعطلك عن حاجه يا إبني.
ماهر…..ولا أي حاجة أنا فاضي اصلا وكنت خارج اشم هوا
.
.
سهيله بصرامة…. إحنا آسفين يا استاذ ماهر إحنا مش بنركب مع حد غريب
والدتها…. وهو أستاذ ماهر غريب برضه دا جارنا… والنبي وصي على سابع جار
.
.
نظرت لها سهيله طويلاً وقالت ماما هاخد العيال واطلع
والدتها… خلاص خلاص. يلي نمشي..ونظرت إلى ماهر وقالت إحنا آسفين يا أستاذ ماهر مره تانيه إن شاء الله
رحلو بعيداً عنه وقالت والدتها
كده تحرجيني قدام الراجل
سهيله….من أمتي واحنا بنركب عربيات مع حد غريب أنا مستغرباك انهارده يا ماما وحاسة إن في حاجة
والدتها بتوتر.. حاجه إيه يعني…. أمشي امشي علشان نوصل قبل الحر
…………… …….. … ……….. .
في منزل مسعد
كان يجلس على السرير وينظر إلى الفراغ أمامه ويفكر في حياته… كانت عليا تملأ حياته ضحك ومرح وفرحه وطفوله لم يكن يعلم أنه سوف يفتقدها بهذا الشكل
نزل إلي الأسفل ودخل إلي المطبخ يحاول أن يصنع شئ يأكله…لأنه لم يتناول الطعام منذ أمس
فتح الفريزر ووجد الأكل أمامه وتذكر عليا
فلاش باك
مسعد… إيه كميه الأكل إللي إنتي عملاها دي كلها
عليا بفرحه…. بيقولوا إن الحامل لما بتتوحم بتكون قرفانه من الفراخ واللحمه وكل حاجه
فأنا قولت قبل ما ادخل في الشهور دي اجهزلك أكل علشان مظلمكش معايا
أنا تبلت فراخ بانيه وعملت أربع صواني مكرونه بشاميل علشان إنت بتحبها أوي….وتبلت لحمه…وكمان نضفت سمك وتبلته…وكل حاجه جاهزة على السوا علي طول
علشان لو قرفت من الحاجات دي.. أكون مجهزاها واستحمل الشويه إللي هيستو فيهم وخلاص…ما أنا مش هجوعك برضه
مسعد بإبتسامه….يا سلام على مراتي الشاطره. إللي بتفكر في جوزها
عليا.. آمال إيه دا أنا أعجبك أوي تعالي رص معايا بقي الأكل ده في الفريزر
عودة من الفلاش باك
أغلق مسعد الفريزر بشده وقال أنا غبي ضيعتها من ايدي
فأمسك هاتفه وبعث رساله إلي عليا
………….. …. ……… ………….
في منزل عليا
كانت تجلس في غرفتها تمسك المصحف وتقرأ منه وعندما انتهت قالت
يارب صبر قلبي واربط عليه واهديني أخد القرار الصح
مسعد ظلمني وأنا مش عارفه اسامحه…كان نفسي أوي يكون عندي طفل وكنت بقعد احكيله أد إيه أنا نفسي في بيبي وهو كان بيقعد يصبرني….حاسه يارب إنه ضربني بسكينه في ضهري وهو بيبتسم في وشي… أنا تعبانه أوي ريح قلبي يارب
أنا مكنتش متخيلة إنه ممكن يخذلني كده… أنا معملتش معاه حاجه وحشه …صبرني يارب
ووضعت يدها على بطنها وظلت تتذكر الايام القليلة التي كانت تحمل في بطنها طفلها وكم كانت سعيدة جداً
وأثناء ذلك اتتها رساله من مسعد فتحتها
أنا عارف إن كلمه آسف قليله أوي…. بس أنا مش عارف أعيش من غيرك… البيت من غيرك بيخنقني…. أنا غلطان…وغلطان أوي كمان.. وهستحمل أي عقاب تعاقبيني بيه إلا الطلاق… أنا بحبك أوي يا عليا
قرأت الرسالة وابتسمت بسخرية وقالت
بتحبني يا مسعد… إللي بيحب عمره ما قلبه يطاوعه إن يأذي إللي بيحبه
…………. ……….. …. ………
في الجنينه عند سهيله
بدأ الاولاد باللعب والجري وهم سعيدين وجلست سهيله ووالدتها
.
سهيله…..كان عندك حق يا ماما الاولاد فعلاً كانو محتاجين يخرجو
وفجأة اتي ماهر جارهم وقال
إيه ده دا أنا حظي حلو بقي… إيه الصدفة الحلوه دي
نظرت سهيله لوالدتها برفعة حاجب وقالت .. إيه رأيك يا ماما في الصدفة
والدتها بإرتباك…. صدفه حلوه
ماهر…تسمحولي أقعد معاكم
سهيله…. إحنا آسفين بس مش هينفع أنا ست ارمله ولما الناس تلاقيني قاعده مع واحد غريب يتكلمو عليا.. وأنا محبش إن حد يتكلم عليا… بعد اذنك يا ماما هروح أشوف الاولاد
ذهبت سهيله وقال ماهر
دي مش مدياني فرصة خالص إني اكلمها يا حاجه
والدتها….. أنا قولتلك من الأول مصدقتنيش وقولت لو خرجنا هعرف اكلمها واديني خرجتها
ماهر….الصبر يا حاجه بالصبر هتلين…. أنا همشي علشان هي جايه وأنا مش عايزها تشك في حاجة
في منزل ياسين
كانت أسماء تجلس على مائدة الطعام وحولها الاولاد وياسين
ياسين….. تسلم ايدك يا أسماء السمك من إيدك حلو جدا
اسماء…. يعني ده ولا بتاع المطعم
ياسين…. لا مطعم إيه أنا متجوز أحسن شيف في الدنيا
ريهام…. الأكل طعمه حلو يا ماما
وقعت كلمه ماما في قلب أسماء وفرحت بشده..فقالت رانيا
ريهام ماما عند ربنا دي اسمها طنط أسماء
ياسين….هي زي ماما برضه يا رانيا وبتحبكم زي ماما بالظبط
رانيا…. لأ مفيش حد زي ماما…ماما دي أحسن واحده في الدنيا…..وتركت الأكل وذهبت
نظر ياسين إلي أسماء وقال….متزعليش يا أسماء رانيا كانت متعلقة بوالدتها جدا كانت طول الوقت معاها ومش بتسيبها أبدا وموتها أثر على نفسية البنت جداً
أسماء بدموع محبوسه حاولت أن ترسم البسمة وقالت…. لأ أنا مش زعلانه منها….. أنا يتيمه زيها وعارفه يعني إيه بنت أمها ماتت… ربنا يصبر قلبها
ياسين وهو يحاول أن يغير الموضوع
كنتي قولتيلي إنك عامله حلويات دوقيني عمايل ايدك يلي
اسماء…..حالا هتاكل أحلي صنيه رواني في الدنيا
ادخل إنت اتكلم مع رانيا وحاول تهديها وأنا هجبلكم الحلويات جوه
دخل مسعد لرانيا وبدأ يحدثتها بهدوء ويحاول أن يطمئنها بوجودهم حولها
دخلت عليهم أسماء بعد الاستئذان وقالت…. أحلي صنيه رواني..لأحلي رانيا
ياسين رانيا وريهام ساعدوني في عمايلها..دوق بقي عمايل ادينا إحنا التلاته
استطعم ياسين وقال….الله تسلم ايد حبايبي التلاته
……….. …………. ………..
في منزل أحمد
دخل احمد علي جني وهو يحمل عروسه كبيرة..وقال
حبيبة بابا.. العروسه إللي كان نفسك فيها
جني بفرحه…..عروستي.. الله… هاتها يا بابا
آدم….. وأنا جبتلي إيه
احمد….جبتلك مسدس بدل إللي باظ يا حبيبي
آدم…. أيوه بقي…المسدس إللي أنا عايزه
جنات…. وأنا مليش حاجه
احمد….. لأ بقي كده كتير دول اطفال إنما إنتي كبيرة
جنات بصرامة…. يعني مجبتليش
احمد…. أنا أقدر…. أحلي شيكولاته ليكي
جنات.. أيوه كده…. الحمد لله يارب إن ربنا جمعنا تاني الحمد لله
احمد…. الحمد لله يارب….يارب دايما اشوفكم مبسوطين واقدر اسعدكم
وقف آدم ووجه المسدس في اتجاه احمد وقال
ثبت نفسك يا بابا… المكان كله محاصر
احمد يمثل الخوف ويرفع يده ببطئ… أنا مستسلم.. والله العظيم مستسلم
وشال آدم وظل يدور به في الغرفة وجنات وجني يضحكون
تمر الأيام ومسعد يحاول أن يصالح عليا….لكن عليا حسمت موقفها بطلب الطلاق
.. العلاقة بين أسماء وياسين جيده جدا يسودها الحب والتفاهم… وتحاول أسماء أن تتقرب إلي بنات ياسين
… احمد وجنات أصبحت الحياة بينهم أقوي وأفضل من قبل
ينورها صغارهم.الاشقياء
والدة سهيله تحاول بشتي الطرق أن تزوج سهيله لماهر ولكن سهيله تفهم والدتها جيداً…وتفهم ما تخطط له
………… ………. ….. ……….
على كافيه يجلس مسعد ووالد عليا
مسعد….يا عمي والله أنا مقدرش استغني عن عليا.. بالله عليك بلاش طلاق..كلمها إنت طيب.. إنت ترضي إن بنتك تكون مطلقه
والد عليا بهدوء…. أنا كلمتها وهي مصره علي موقفها
مسعد… أنا عارف إني غلطت بس أنا قولتهلها على أسبابي
والد عليا…يا إبني أسبابك مش مقنعه بالنسبة ليا…. إنت مش عجبك تربية أهلك ليك…ربي إنت ولادك بالطريقة الصحيحة ربيهم إنهم يعتمدو على نفسهم..وشيلهم مسئولية نفسهم.. وبعدين إنت بتتكلم عن الموت…. ربنا بيقول…بسم الله الرحمن الرحيم
وليخش الذين لو تركو من خلفهم ذرية ضعافا خافو عليهم فليتقو الله….صدق الله العظيم
اتق الله إنت في معاملاتك وفي تربية اولادك…وسيبها لربنا
مسعد…. أنا كنت خايف ومازلت خايف
والد عليا…..تسمحلي اقولك يا إبني إن ده ضعف إيمان بالله
مسعد…. أنا مش هقولك إن إيماني قوي… بس أنا بعافر وبجاهد نفسي….وعليا وحضرتك كنتو السبب إني أحط رجلي على بدايه الطريق الصحيح… بالله عليكم ما تتخلو عني.. أنا من غيركم هضيع
والد عليا…يا إبني اعتبرني أبوك وقت ما هتحتاجني هتلاقيني سواء كملت مع عليا أو لأ
……….. ……… . …………. ………
في منزل سهيله
كانت سهيله منفعله وتقول
يا ماما مينفعش إللي إنتي بتعمليه ده…. إنتي ليه مش متخيله إني فاهمه الحركات دي
والدتها…..حركات إيه دي
مره الأستاذ ماهر يطلع لينا حلويات قال إيه…عازم الجيران كلهم
ودلوقتي بتقولي إنك عايزه تعزميه علشان تردي العزومه
أنا مش غبيه أنا فاهمه كل حاجه وريحي نفسك أنا استحالة اتجوز بعد سعيد
والدتها…..متتجوزيش ليه ناقصه ايد ولا رجل….يا بنتي أنا خايفه عليكي…. عايزه اطمن عليك قبل ما أموت
والدتها… يا عالم مين هيموت قبل مين..دي الأعمار بيد الله وأنا عايزه أربي عيالي من غير جوز أم..يبقي مش طايق ليهم كلمه…ولا طايق انهم يتحركو…. أنا مش أول واحده جوزها يموت وهي تقعد تربي عيالها
والدتها… طول عمرك واجعه قلبي الأول كانت تصرفاتك غبيه
وكنت بدعيلك بالهداية… دلوقتي بعد ما ربنا استجاب مني وهداكي…برضه واجعه قلبي
سهيله ببكاء….واجعه قلبك ليه…. أنا الأول فعلاً كانت تصرفاتي طايشه ومكنتش بفكر غير في نفسي …بس موت جوزي كسرني….وفوقني لنفسي .. وبقيت أفكر في غيري
ذنبي اني.. عايزه أعيش لعيالي… عايزه تجوزيني…افتحي قلبي وطلعي منه جوزي … أنا عايزة أبقي مع سعيد في الجنه…الست بتبقي مع زوجها الأخير في الدنيا وأنا عايزه أكون مع سعيد في الجنه….عايزاني اتحرم منه في الدنيا وفي الآخرة
في منزل جنات
كانت تجلس على سجادة الصلاة تحمد الله وتشكره على فضله عليها سمعت جرس الباب.. وعندما فتحت وجدت زينب صديقتها أمامها
جنات بفرحه…. زينب حبيبتي عامله ايه
زينب بدموع احتضنت جنات وقالت….كده يا جنات كل ده يحصل معاكي ومعرفش
جنات….يا حبيبتي من ساعة ما سافرتي وإنتي تليفونك اتقفل
زينب… التليفون ضاع ومكنتش عارفه اتواصل مع حد أبدا
جنات….طيب بطلي عياط وادخلي إنتي وحشتيني اوي
زينب…. وإنتي اكتر والله طمنيني عليكي وعلي جني حبيبتي
جنات…. إحنا بخير الحمد لله…تعالي أدخلي لجني
دخلت زينب وجلست بجوار جني وظلت تبكي
جنات…..يا بنتي كفايه عياط.. قلبك هيوجعك
زينب.. مش مصدقه إن حصل معاكي كل ده يا حبيبتي
أنا لو كنت هنا وإنتي مخطوفه مش عارفه كان ممكن يجرالي ايه
جنات….يا بنتي إنتي إكتر واحده عاطفيه في الدنيا…دا إنتي كان ممكن بعد الشر يجرالك حاجه
زينب…. الحمد لله إن ربنا ردك بالسلامه الحمد لله الحمد لله
……….. ….. …………. ………
في منزل اسماء
والدة ياسين…. إنتي لسه تعبانه يا أسماء
اسماء. جسمي كله بيوجعني ومش عارفه ليه..ومش قادرة أقوم من مكاني
والدة ياسين….. روحي اكشفي يا بنتي واطمني على نفسك ليكون موضوع الرحم إللي هيتشال ده هو السبب
اسماء…. أنا برده شاكه في كده… ياسين قالي إنه هيحجزلي عند الدكتورة وهو راجع من الشغل
والدة ياسين….. هروح معاكي يا بنتي
اسماء.. متتعبيش نفسك يا ماما ياسين رايح معايا
اتي ياسين من العمل وذهب بها إلي الدكتوره…كانت أسماء تضع يدها على قلبها..خائفه أن يكون سبب التعب هو الرحم وتضطر أن تستأصله قبل أن تنجب… ظلت تدعو الله أن يلهمها الصبر إن كان ذلك هو السبب
دخلت إلي الطبيبه وشرحت لها مرضها وما تعانيه الآن
طلبت منها الطبيبه أن ترقد على السرير لتجري لها اشعه السونار….فعلت اسماء مثلما قالت..وبدأت الطبيبه في الكشف
ونظرت لها بإبتسامه وقالت… ألف مبروك… إنتي حامل
في منزل أسماء
كانت تجلس هي وياسين على سجادة الصلاة…كان ياسين امامها..وهي تصلي ورائه قيام الليل وتبكي بشده وتحمد الله على نعمه عليها… وعندما أنتهي ياسين…قال
ألف مليون مبروك يا أسماء…. كفايه عياط بقي.. في حد يكون فرحان يبكي كده
اسماء بدموع…. أنا مش مصدقه كرم ربنا عليا.. إنت متخيل كم النعم إللي أنا فيها…زوج حنين زيك وكمان ربنا هيرزقني بالذريه إللي طول العمر بحلم بيها قبل العمليه… أنا مش عايزه اقوم من على سجادة الصلاة واقعد احمد ربنا طول حياتي
ياسين….وكان فضل الله عليك عظيما
اسماء….بص يا ياسين أنا أطلع حاجه كبيره لله أنا هدبح عجل واوزعه…واجيب مصاحف واحطها في الجامع…..واخرج فلوس لمستشفيات…. وأخرج فلوس لدار أيتام
ياسين…. والله لو معايا مش هتأخر
اسماء… لأ من فلوسي أنا أنا معايا فلوس كتير أوي الحمد لله
ياسين بتأثر واضح على ملامحه…. أنا كان نفسي أنا إللي أعمل كده
اسماء…. مفيش فرق بيني وبينك يا ياسين بالله عليك متضيعش فرحتي…سيبني أفرح يا ياسين.
ياسين بإبتسامه…. أفرحي واعملي كل إللي نفسك فيه…. ربنا يفرحك كمان وكمان يارب….ويقر عينك بمولودك
في منزل عليا
كانت عليا تمسك هاتفها وتهتف بضجر….. إنت مبتزهقش
دخل عليها أخوها الكبير وقال
إيه بتكلمي نفسك
عليا…. بالله عليك تسكت يا يوسف علشان مسعد هريني رسايل وأنا اتخنقت منه
يوسف.. طيب نتكلم براحه.. وبهدوء… إنتي دلوقتي الحمد لله كويسه… ومسعد غلط وعرف غلطه..واعتذر كتير أوي
ما خلاص بقي…
عليا بتأثر….. إنت عارف يعني ايه تتصدم في واحد.. إنت متخيل إنه آخر واحد في الدنيا ممكن يأذيك
أنا حاسه زي ما يكون مخي اتشل…كان عارف إني نفسي في أطفال وكنت بقعد اعيط قدامه… مفيش مره صعبت عليه وقال لأ كفايه كده….مفيش مره قلبه وجعه عليا.. وعلى دموعي… لأ وأنا عايشه معاه وحاسة بالذنب وبقول لنفسي إنتي مش عارفه تسعديه… إنتي مش عارفه تجبيله طفل يشيل إسمه
أنا حاسه إني ربنا حول حبي ليه لكره….دا بيأذيني وهو متعمد إنه يأذيني…ومكفهوش كده..ولما ربنا أراد إني اشيل منه طفل….راح بدم بارد علشان يتفق مع الدكتور..
اتخنقت بالبكاء وقالت….راح يتفق عليا يا يوسف. مفرقش معاه حزني وزعلي
أنا استحالة ارجعله… أنا لازم أطلق منه
في شقة أسماء
جنات…. ألف مليون مبروك… أيوه كده الاخبار إللي تفرح بجد
اسماء…. الله يبارك فيك يا حبيبتي… شايفه كرم ربنا عليا
شايفه ربنا غيرلي حالي الافضل ميه وتمنين درجة ازاي يا جنه…كنت بيني وبين نفسي متشائمة وبقول نفسي أكون زي كل البنات….طلع ربنا شايلي حاجه كبيره هتفرحني فرحه كبيره… يمكن لو كانت جت في الوقت إللي أنا عايزاه مكنتش هفرح كده
جنات….يارب دايما فرحانه كده ومبسوطه
اسماء… يارب
جنات…هما فين رانيا وريهام
اسماء….مامت مامتهم اخدتهم يقعدو معاها اسبوع
بس والله عملو فراغ كبير في البيت كانو عاملين ليه حس كده
جنات….كلها كام ويرجعو يملو عليكي البيت تاني
بقولك ايه مش عايزاكي تعملي أي مجهود وريحي نفسك على قد ما تقدري وأنا إن شاء الله هاجي كل يوم أشوف لو محتاجه حاجه
اسماء….من غير ما تقولي الدكتورة حظرتني من المجهود
…….. ………. ……….. … ……..
في منزل والد عليا
المأذون…. إن أبغض الحلال عند الله الطلاق
والد عليا….دي آخر فرصة يا عليا.. فكري كويس يا بنتي
عليا بدموع….. أنا خلاص أخدت قراري يا بابا
مسعد…. أنا آسف يا عليا أنا غلطت ومعترف..بس بلاش طلاق
زادت عليا في البكاء
يوسف….يا حبيبتي من غير عياط الموضوع لسه منتهاش…….. بلاش طلاق
عليا… أنا لازم أطلق أنا بقيت مش حاسه معاه بالأمان
اتوكل على الله يا شيخ وابدأ في الإجراءات….هو وعدني إنه هيكون راجل معايا ويطلقني مقابل إني اسامحه
مسعد…. مينفعش تسامحيني من غير طلاق يا عليا
عليا…كان شرطي إني اسامحك إنك تطلقني
مسعد…. أنا عملت حاجات غلط كتير في حياتي واكيد لازم يتردلي..من إللي أنا عملته
ابدأ يا شيخ في الإجراءات وأنا أوعدك يا عليا إنك مش هتشوفي وشي ثاني
في منزل سهيله
والدة سهيله…. بجد يا سهيله أسماء حامل… ربنا يتمملها بخير يارب
سهيله…. الحمد لله كلمتني وهي فرحانه… ربنا يتمملها فرحتها على خير يارب
تعرفي يا ماما كنت حاسه بالذنب اوي تجاه أسماء..في الفتره إللي كنت انانيه فيها ومش بفكر فيها غير.في نفسي.دمرتلها أنا حياتها… بس الحمد ربنا عوضها بالاحسن وانتقم مني أشد انتقام
والدة سهيله…..لا حول ولا قوه الا بالله… إيه إللي بتقوليه ده يا بنتي دا نصيب وكل واحد بياخد نصيبه
إنتي فاكره أن إللي إنتي عملتيه ده كان شطاره وذكاء منك… لأ دا دي إرادة ربنا إللي نافذه … وإنتي كتتي مجرد سبب
ويمكرون ويمكر الله والله خير الماكرين
سهيله… خايفه من حساب ربنا اوي يا ماما
والدتها. استغفري ربنا وتوبي واطلبي منها إنها تسامحك….
سهيله…هي سامحتني بس أنا مش عارف أسامح نفسي حاسه بتأنيب ضمير
والدتها….الندم أهم حاجة في التوبه… ربنا يغفرلك يا بنتي
……….. . . ……….. ………… . …………
في منزل جنات
احمد…. كنت فين كل ده يا جنات
جنات بفرحه….كنت عند أسماء بباركلها على الحمل.. وكان عندها شويه حاجات عملتهم
احمد…. ربنا يقويكي…بس مش عايزك تيجي على نفسك علشان متتعبيش… تعملي إللي تقدري عليه معاها…وسبيلي أنا شغل شقتنا أنا إللي أعمله
جنات بابتسامة….فاكر يا أحمد لما كنت حامل وكنت بتساعدني في شغل البيت
احمد….فاكره إنتي لما كنت بمسح الأرض وأمي جت وأنا بمسح
جنات بضحك……دي اتصدمت صدمة عمرها يا عيني ساعتها….وكانت عماله تقول إنت يا احمد… إنت….دا إنت مكنتش بتملي مايه تشرب
احمد….ومن ساعتها بقيت كل ما أروح عندها تخليني أعمل معاها شغل البيت…. الله يسامحك يا جنات
جنات….طيب فاكر لما جت مره تتعشي معانا وكانت عماله تقولي…. إيه يا جنات الأكل ده أول مرة أكل عندك أكل طعمه وحش كده
احمد….. يعني إنتي سترتي عليا ما إنتي ساعتها قولتلها احمد إللي عامل الأكل علشان أنا اتأخرت عند الدكتوره
طول عمرك فضحاني
جنات بضحك……بس إنت اتأفشت كذه مره ومره حمايا الله يرحمه قفشك وانت بترمي الزبالة وفضل ذلك فتره كبيره
احمد….. كويس إنك فكرتيني بكل الحاجات.دي .. آخر مره أساعدك فيها في الشقه
جنات…. لأ لأ قلبك أبيض أنا بهزر معاك
احمد بمزاح…. أبدا
جنات…..دا الرسول كان بيساعد زوجاته وده الرسول.. عارف يعني ايه الرسول
احمد… خلاص عفونا عنك…. علشان الرسول قدوتي أنا هعمل زيه
عند مسعد
أنتهي من إجراءات الطلاق وأصبحت عليا شخص غريب عنه لا تربطه بها أي علاقة…كان يوجد دموع محبوسه في عينيه متحجرة تأبي النزول…كان يسير في الطريق لايريد الذهاب الى المنزل اتصل بأسماء وانفجر بالبكاء
في منزل اسماء
اسماء بصدمه……طلقتها….طلقتها يا مسعد.. هو إنت هتلاقي زي عليا
مسعد…. هي إللي أصرت على الطلاق
عليا…. طيب ليه انت عملت حاجه تزعلها
مسعد…. أنا فعلاً عملت حاجه.. بس مكنش قصدي خالص إن الموضوع يوصل لكده…ومكنتش أعرف إن الموضوع ممكن يضايقها بالطريقة دي… أنا كنت متخيل لما أقولها الاسباب إللي خلتني أعمل كده هتفهمني وتسامحني….بس رد الفعل صدمني….. وكمان أهلها في ضهرها أوي….. إحنا في عيلتنا كلمه طلاق دي كبيرة أوي…حتي لو الواحدة جوزها بيموتها من الضرب …. إنما أهلها هي مختلفين عننا
اسماء…. إنت عارف يا مسعد لو كل زوج عرف واتأكد إن أهل مراته هيقفو في ضهرها وهيسندوها… مكنش في راجل افتري على مراته ولا ظلمها…ولا شوفنا المصايب إللي إحنا بنشوفها اليومين دول
مسعد….قصدك إيه….. أنا عارف إني ظلمتك…بس…. بس
لم يعرف مسعد ماذا يقول فعندما ظلمها لم يكن لديه مبرر
وليس للظلم مبرر مهما كانت الأسباب
اسماء….مش قصدي عليك يا مسعد أنا بتكلم عموماً يعني..بس قولي إيه إللي حصل وصلكم للطلاق وإزاي متقوليش… ممكن كنت أعرف أصلح بينكم
مسعد…. أنا مش عايز اتكلم دلوقتي يا أسماء ومش مستحمل لوم من حد…. أنا جيت اتكلم معاكي شويه علشان أرتاح
أنا تعبان…تعبان أوي…ومش طايق ادخل البيت.. بقي كئيب
حتي الشغل مش طايقه…. أنا مش طايق حياتي عموما
اسماء…. استغفر ربنا….كله هيعدي إن شاء الله…وبكره عليا تهدي وإن شاء الله ترجعو لبعض تاني
بقولك ايه يا مسعد….اطلع اعمل عمره…. وروح شوف الرسول
وسلملي عليه وإن شاء الله ترجع من هناك نفسيتك كويسه ومقبل على الحياة…. وادعي إن عليا ربنا يهديها إنها تسامحك
مسعد…..بأمل…..فكره حلوه أروح أعمل عمره.. .بس عليا استحالة تسامحني أنا متأكد….دي ممكن تدوس على قلبها بالجزمه.. كله إلا كرامتها
في منزل جنات
يا أولاد تعبتوني قومو نامو بقي
جني وهي بتتنطط على السرير….. لأ ه لأ ه… مش هنام مش هنام
جنات…. يا جني بلاش تعملي كده إنتي تعبانه اقعدي بقي
آدم علي سريره هو الآخر. … لأ هي مش تعبانه..وطلع يجري وقال….تعالي يا ماما امسكيني
جريت وراه جنان وقالت…. أنا دايخه لوحدي يا آدم تعالي هنا
جريت جني الأخري.وقالت …. لأ أجري ورايا أنا يا ماما…مش هتعرفي تمسكيني
جلست جنات بتعب وقالت…. أنا مش قادره.. وقالت بصوت عالي جداً…. احمااااااااااد..يا احمااااااااااد
قام احمد من النوم بخضه وقال….في إيه في حاجة ولا ايه
جنات بتعب….شوف ولادك مش عايزين ينامو
احمد بإنفعال….بتخضيني كده علشان مش عايزين ينامو
أنا قولت حد منكم جراله حاجه
وقفت جنات ولكنها لم تستطيع أن تتماسك فوقعت على الأرض….جري نحوها احمد والاولاد بلهفه
احمد….. مالك يا جنه في إيه
جنات….دايخه أوي
جني بدموع…. أنا أسفه يا ماما أنا هنام
آدم…. أنا آسف يا ماما إني تعبتك أنا كمان هنام. سند احمد جنات وخرجو من الغرفه
احمد…. إنتي مأخدتيش برشام السكر انهارده
جنات….خلص من امبارح ونسيت اجيبه
احمد…..هو ده حاجه تتنسي يا جنات.. أنا داخل البس ورايح اجيبه
في منزل عليا
كانت تجلس هي وسهيله
سهيله بصدمه…اتطلقتي يا عليا…مش إنتي قولتي إنك هتعلميه الادب…. أي إللي وصل الموضوع للطلاق
عليا…. فكرت في الموضوع كويس.. وبقيت خايفه منه أوي يا سهيله … إزاي هعرف أعيش معاه… هفضل شاكه في كل حاجه بيعملها معايا….دا لو اداني ميه أشرب هكون خايفه ليكون حاطط فيها حاجه
سهيله…. طالما عرف غلطه واعترف بيه كنتي سامحتيه يا عليا….هو مش هيقدر يعملك حاجه بعد الموضوع ما أتعرف
عليا…..هو كسر الثقه إللي بيني وبينه وبني حيطه سد بينا
سهيله…. كان المفروض تسامحيه يا عليا…. إنتي كده اطلقتي وخلاص….وممكن تتجوزي واحد تاني يكون مش كويس يبقي إللي نعرفه احسن من اللي منعرفوش
عليا…. موضوع السماح ده حاجه نسبيه… ممكن حاجه أنا أقدر أسامح فيها إنتي متقدريش أو العكس وكل واحد حسب قدرته…. وأنا مش قادره اسامحه
رواية احببت زوجة زوجي. الجزء السادس عشر
.
.
.
.
