كانت أسماء تنظر إلى الأرض بتوتر شديد بعد وقوف أسر وصدمته وقالت
وأنا برده قولتلك على كل حاجه من الأول علشان تبقي على نور من الأول
أسر وزاد توتره…..طيب بعد اذنك أنا صلي استخاره وأرد عليكي
استأذن أنا يا جماعه
خرج أسر وخرج معه احمد وصاحب العمارة وهم مرسوم على وجوههم الأسف
بعدما أغلق الباب أخذت جنات أسماء في حضنها وانفجرت أسماء في البكاء
أسماء….كنت حاسه إن فرحتي مش هتكمل أنا كنت حاسه
جنات وهي تبكي أيضاً….لسه الموضوع مخلصش يا أسماء قال إنه هيصلي استخاره ويرد عليكي
اسماء….دي كانت طريقه بيخرج بيها من هنا من غير ما يكسفني…بس كل حاجه بانت على وشه
جنات…. والله هو إللي خسران هو هيلاقي زيك فين
اسماء…. الحمد لله… أنا هقوم أصلي ركعتين لله علشان ازيح الهم ده… وأنا واثقه في ربنا إنه هيجبر قلبي
جنات…. ربنا يعملك إللي فيه الخير يارب
.
.
اسماء….انزلي إنتي لجوزك يا جنات… أنا كويسه متقلقيش
جنات…. لأ أنا هعقد معاكي شويه
اسماء…. أنا والله كويسه هصلي وانام..انزلي إنتي علشان عيالك وجوزك…
جنات….ماشي.. بس لو عوزتيني في أي حاجة ترني عليا في أي وقت
اسماء … ماشي
.
.
نزلت جنات إلي شقتها
ووقفت أسماء بين يدي الله تناجيه وتشكو له عن ضر أصاب قلبها…وحزن أصبح ونيسها
وبعدما انتهت من صلاتها ذهبت إلى النوم.. تحاول أن تهرب من أحداث يومها…
وانتهي اليوم عليها وبدأ يوم جديد… استيقظت على المنبه
قامت قبل الفجر…صلت قيام الليل وانتظرت الفجر
.
.
وبعدما انتهت من فرضها جلست تقرأ وردها حتي هل عليها الصباح ….قامت بترتيب شقتها واستعدت لتذهب إلي الحضانه
………….. ………….. ………
في منزل سهيله
.
.
اتت إليها والدتها في الصباح وجدتها في غرفتها بين النوم واليقظه وكانت تبكي
والدتها….يا بنتي حرام عليك نفسك وعيالك… إيه إللي إنتي بتعمليه في نفسك ده
.
.
سهيله بدموع….. سعيد يا ماما كان جالي في الحلم وزعلان مني… أنا عايزة اعرف هو زعلان ليه… أنا عايزة اروحله يا ماما
والدتها بدموع على ابنتها…. إيه إللي إنتي بتقوليه ده بس يا بنتي
سهيله وبدأت تزيد في البكاء… أنا عايزة سعيد ودوني عند سعيد
والدتها….استهدي بالله يا سهيله دا قرب يكمل سنه ميت وإنتي دمعتك منشفتش عليه… قومي بصي في المرايا وشوفي شكلك بقي عامل إزاي
وشوفي عيالك حالهم بقي عامل إزاي من غير أبوهم وإنتي كمان بعدتي عنهم
سهيله …ياماما سعيد وحشني أوي نفسي اتكلم معاه
نفسي يرجعلي تاني… أنا عايزة جوزي يا ماما
والدتها.. لا حول ولا قوة إلا بالله مينفعش اسيبك كده لازم اتصرف نامي دلوقتي يا سهيله..نامي يا حبيبتي
…………. ………… ………
كانت أسماء عائده من عملها فأوقفها صاحب العمارة
عم حامد بتوتر… مش عارف اقولك ايه يا بنتي
اسماء… اتكلم على طول يا عم حامد خير
عم حامد…. الدكتور بيقولك كل شيء قسمه ونصيب
ابتسمت أسماء بوجع وقالت … إنت خضدتني يا راجل يا طيب… أنا كنت هقولك تقوله كل شيء قسمه ونصيب بس هو سبقني بقي.. سلام يا عم حامد
كانت أسماء تحاول جاهدة أن لا تسقط دموعها على السلم أمام الجيران…وحمدت الله أنها لم تري جنات علي السلم
ودخلت شقتها واطلقت لدموعها العنان
وبكت كثيرا ثم قامت توضأت ووقفت بين يدي الله فهذا أفضل شئ يستريح فيه الإنسان من هموم الدنيا…هي الصلاة ومناجاة الله… يطمئن القلب وتسريح النفس ويشرح الله الصدر بعد الصلاة
عند سهيله استيقظت من النوم ولم تسمع أي صوت في المنزل خمنت أن والدتها أخذت الاولاد معها ذهبت إلى المطبخ لا تدري لماذا
ولكنها ما إن وجدت أمامها السكينه ورأت نصلها يلمع بشده
ذهبت إليها كالمغيبه وامسكت بها وابتسمت وقالت
أنا هجيلك يا سعيد يا حبيبي أنا عارفة إني وحشتك زي ما أنت كمان وحستني
ووضعت سن السكينه على شرايينها وهي مبتسمة
واغمضت عينها وقالت…. أنا جايه ياسعيد
يتبع…..
دخلت والدة سهيله المطبخ بعدما سمعت ارتطام شئ ما وجدت سهيله على الأرض ويدها تنزف الدماء صرخت الوالده بشده واجتمع الجيران وذهبو بها إلي المشفي
والدة سهيله… كانت واقفة تبكي بإنهيار على ما يحدث لإبنتها
خرج الطبيب وجرت عليه والدة سهيله
الوالده.ببكاء شديد… طمني يا دكتور ينتي
الدكتور برسمبه…. الحمد لله لحقناها.. بس ايه اللي وصلها لكده
الوالده….من ساعة جوزها ما مات وبدأت تحكي له كل شيء
الدكتور….دي حالة اكتئاب شديد…ولازم تتابع مع دكتور نفسي… علشان لو متعلجتش هتحاول تموت نفسها تاني
وتركها وذهب
والدتها .. بانهيار…يارب نجي بنتي يارب….يارب استرها معاها واهديها وقومهالي بالسلامه يارب ….يارب مليش غيرك يارب
…………….. ……… .. ………. .
عند أسماء
كانت تحفظ ورد القرءان..وهي تدعو الله أن يخفف عنها حزن قلبها ويعوضها خيراً
سمعت جرس الباب وعندما فتحته وجدت جنات
جنات…. ازيك يا أسماء يلي علشان نروح الجامع
اسماء…ماشي… أدخلي على ما اتوضي والبس. جنات… مالك كده شكلك معيطه وزعلانه
اسماء وهي تحاول أن ترسم البسمة على وجهها….. ربنا ميجبش زعل يارب أنا بس مش حافظه كويس فمدايقه
جنات….هو إنتي أول مرة متحفظيش. ما تقولي في إيه يا اسماء إنتي هتخبي عليا
اسماء وسمحت لدموعها بالهبوط… عم حامد قالي إن الدكتور قاله كل شيء قسمه ونصيب
جنات وهي تحاول أن تخفف عنها… أكيد هو مش خير ليكي علشان كده ربنا بعده عنك
اسماء…. أنا عارفة الحمد لله… ربنا هيعوضني عوض كبير أوي أنا واثقة في ربنا … أنا هلبس أنا علشان ما نتأخرش
دخلت أسماء وجلست جنات تبكي على صديقتها وتدعو الله لها أن يريح قلبها
…… …………. ……….. ……
وتمر الأيام وبدأت سهيله أن تتعافي بعدها ذهبت لدكتور نفسي… بعد إصرار والدتها الشديد عليها وبعد فتره من العلاج أصبحت افضل من ذي قبل
وأسماء بدأت تنسي أمر الدكتور أسر وتركز مع حياتها وحفظها لكتاب الله وعملها
……… …. ……… ………
أسماء بفرحه…. أنا مش مصدقه نفسي أنا ختمت القرآن يا جنات
وجنات وهي سعيده لصديقتها… ألف مبروك عقبالي يارب
اسماء بفرحه…..يارب تعالي نطلع نعمل أحلي تورتايه بالمناسبة السعيده دي
جنات.. لأ الواجب ده عندي أنا…. أنا هعملك أحلي تورته
نادي عم حامد عليهم وكان يقف معه شخص ما وقال
يا استاذه أسماء شكلك فرحانه
اسماء بسعادة..نورت وجهها…. أنا ختمت القرءان يا عم حامد
جنات….وهتاكل أحلي كيكه اكلتها في حياتك انهارده بالمناسبة السعيده دي
كان يوجد شخص يضع نظره في الأرض وهو مبتسم وقال
ألف مبروك يا استاذه عقبال ما تاخدي إجازات في القرءان يارب
اسماء ومازالت مبتسمة…. اللهم امين يارب العالمين
كان عم حامد ينظر إليهم بإبتسامه وقال
أستاذ ياسين كان طالب إيدك مني يا استاذه أسماء من اسبوع وأنا قولتله على كل شيء وهو متمسك بيكي وقال لازم ييجي يتقدملك….وكان واقف معايا دلوقتي علشان أحدد معاكي ميعاد ييجي فيه وإنتي جيتي واحنا واقفين
فحددي الميعاد إللي يناسبك يا بنتي
كانت أسماء تنظر إلى الأرض من الكسوف وقالت
إللي تشوفه يا عم حامد إنت زي والدي بالظبط وتركتهم وذهبت مسرعه وورائها جنات
بعدما أغلقت أسماء الباب زغرطت جنات
اسماء بفرحه…..يا مجنونه إنتي بتعملي إيه ده لسه واقفين تحت
جنات…. لأ دا الفرحه انهارده فرحتين سبيني براحتي
سجدت أسماء على الأرض وقالت الحمد لله
جنات بتوتر…. أسماء كنت عايزه أقولك حاجه
اسماء…..خير يا جنه
جنات….بلجلجه. أستاذ ياسين جارنا من زمان وكان متجوز ومراته ماتت ..ومعاه بنتين
اسماء ومازالت مبتسمة. ولكن ابتسامه حزينه…. الحمد لله يعني لو ربنا مكتبليش الخلفه…يكون في أولاد يحسسوني بالأمومة
جنات زغرطت مره أخري وقالت…. الحمد لله الحمد لله إنك متقبله الأمر
مساء في شقة أسماء حضر ياسين ومعه والدته ووالده وعم حامد وأحمد
كانت أسماء حزينه لأنها قامت بالاتصال على مسعد وأخبرته بشأن العريس لكنه رفض أن يأتي بحجة أنها رفضت أن تتعرف علي عائلة عليا زوجته…وقال لها عندما طلبت منك أن تأتي رفضتي وقولتي أخبر أهل زوجتي أنك متوفيه.. وأنا الآن أقول لكي اخبري أهل المتقدم أنني متوفي
فاقت أسماء من سرحنها على صوت جنات
مالك يا عروسه سرحانه ليه وشكلك مدايق
اسماء بابتسامة… لأ مش مدايقه ولا حاجه
جنات….طيب يلي علشان تخرجي…دول خلاص قربو يخلصوا الإتفاق
أسماء…ماشي يلي
خرجت أسماء وجلست بجانبهم تسمع الإتفاق وظلت مبتسمه وفجأة سمعو صوت جرس الباب
فتحت اسماء ودهشت عندما وجدت مسعد وزوجته
دخل مسعد وسلم على اسماء وقالت عليا….هي دي أسماء
واحتضنتها بشده
اسماء…. إنتي مرات مسعد
عليا…. أيوه أنا وإنتي بقي أسماء كان نفسي أتعرف عليكي من زمان وقعدت ازن ازن على مسعد لحد ما جابني معاه
مسعد….. ادخلوا بقي علشان الناس إللي قاعده
أسماء بفرحه شديدة.. ده مسعد أخويا… اتفضل يا مسعد
سلم مسعد على الموجودين وجلس ودخلت أسماء وعليا إلي جنات في الداخل
ياسين….. أنا يشرفني اني أطلب منك ايد أختك أسماء
مسعد….الشرف لينا يا أستاذ ياسين
والد ياسين….واحنا يا إبني عايزنها بشنطه هدومها
مسعد… ربنا يكرم أصلك يا حاج…بس أختي هنجهزها أحلي جهاز…. وإن شاء الله تخرج من بيت أخوها
والد ياسين….زي ما تحب يا إبني
واكملو الاتفاق وانطلقت الزغاريد….وعمت الفرحه على كل المنزل
بعدما غادر كل شخص إلي منزله قال مسعد.
لمي هدومك وحاجتك علشان هتيجي تقعدي معانا الشهر ده قبل ما تتجوزي
اسماء بتوتر.. مش عايزه اتقل عليكم
عليا بإبتسامه.. علي فكرة إنتي هتنورينا..وتونسيني في البيت…. وأنا بجد هكون فرحانه اوي اوي لو جيتي قعدتي معانا
مسعد…. وبعدين دا هو شهر يا أسماء مش كتير يعني بلاش الحساسية دي
اسماء…. مالك يا مسعد إيه إللي غيرك كده
نظر مسعد إلي عليا وابتسم وقال لما اتجوزت و شيلت مسئولية عرفت معناها… طول عمرهم أهلي كانو بيعاملوني على إني العيل الصغير إللي ملوش دعوه بأي حاجة عمرهم ما شيلوني مسئولية أي حاجة.. كانو بيقولي شوف إيه إللي يخليك مبسوط واعمله…عمرهم ما قالولي وإنت بتفكر في نفسك متجيش على غيرك…فعلشان كده كنت مقدم مصلحتي على مصلحة أي حد
بس بعد ما دخلت بيت الناس المحترمه دي وشوفت طريقه تربيتهم لعيالهم إزاي كل شخص متحمل مسئولية شئ في البيت..غير مسئوليتهم… وإزاي بيحترمو اختهم وبيعاملوها بكل حب وخوف عليها
ولما عليا دخلت بيتي وشوفت تربيتها وإزاي بتتعامل بدأت اتغير لأني كان لازم اتغير
وأنا آسف علشان ظلمتك…. أوقات الأهل وهما بيربو عيالهم مش بيكون قصدهم عيالهم يطلعو وحشين بتبقي نيتهم إنهم ميحملوش عيالهم فوق طاقتهم بس للاسف خوفهم ده بيطلع جيل مش هامه غير نفسه وبس … المفروض الأهل يسيبو عيالهم يغلطو ويتعلمو..وهما جمبهم فيسندوهم ويلحقوهم
مش يشيلو عنهم كل المسئولية وأول ما الأهل يسيبوهم يقعو وينهارو ويبدأو من الصفر في تحمل المسئولية
اسماء…. أنا كده لازم أشكر عليا وأهلها في التغيير إللي حصلك
مسعد…. أنا لازم أشكر ربنا إنه فوقني واداني فرصة تانيه أتغير وابقي إنسان أحسن
اسماء….بس ليه لما كلمتك في التليفون قولتي كده
مسعد بمزاح….. بصراحه كنت بنتقم منك علشان أنا زعلت أوي لما قولتلك تيجي تتعرفي على أهل عليا وإنتي موافقتيش
…………. …………….. …. …….
في شقة جنات
جنات….. أنا بجد فرحانه اوي لأسماء.. إن الموضوع مشي وكمان فرحت أوي لما أخوها جه
احمد….. ربنا يتمملها على خير ياسين راجل محترم
جنات…..وهي كمان ست البنات كفايه طيبة قلبها
احمد…..يا أختي على الحب يا أختي….مش دي إللي كنتي مش بطقيها
جنات…..كنت…. لما كانت ضرتي.. إنما هي دلوقتي صحبتي
احمد…..يا سلام ولو كانت لسه ضرتك كنت هتقولي كده
جنات….احمااااااااااد عدي يومك يا أحمد…واقفل الموضوع
احمد بضحك….يا ساتر بتقلبي في ثانيه… الواحد ميعرفش يهزر معاكي أبدا
جنات… لأ يا اخويا متهزرش
………… ………….. ……………
في منزل سهيله
كانت تجلس بين أبنائها تطعمهم… ويوجد تحسن كبير في شكلها ومعاملتها
سهيله…يا ماما ارجعي بيتك أنا بقيت كويسه والله
والدة سهيله….ولا اسيبك أبدا يا تيجي بعيالك تعيشي معايا يا أعيش معاكي أنا
سهيله بضحك….للدرجه دي خايفه عليا إنتي عمرك ما سيبتي بيتك
والدتها بتأثر….دا انتي ورتيني فتره…. اسوء فتره في حياتي
دي أسوأ من الفترة إللي أبوك مات فيها
سهيله….. الحمد لله إنها عدت على خير وربنا نجاني واداني فرصة تانيه
والدتها…. الحمد لله يارب… الحمد لله
في منزل مسعد
عليا….. نورتي البيت يا أسماء
اسماء….منور بصحابه يا عليا
مسعد….خدتي راحتك بقي ونامي براحتك
اسماء….. لأ لازم اصحي بدري علشان عندي حضانه وعندي جامع بعد الضهر
وبعدين جنات لو عرفت إني مشيت من غير ما أقولها هتزعل أوي
مسعد….مش هينفع بقي تروحي هناك علشان أهل خطيبك…. إنتي بقي تسيبي الحضانه علشان تبدأي تجهزي نفسك.مفيش قدامك غير شهر
وبكره تروحي تجيبي حاجتك وتسلمي على صحبتك
اسماء لنفسها…. جنات هتزعل أوي علشان هسيبها دا إحنا كنا بنقضي النهار كله سوا
رواية احببت زوجة زوجي. الجزء الثاني عشر
.
.
.
.
