شوق قالت للشيخه انتى بتقولى ايه معقول خلاص خلاص انا هلبس وهحاول اكون عندك دلوقتى وشوق قالت للشيخه انها عاوزه تكلم امها وفعلا كلمتها واتفقت معاها انها هتكون عندها ولو حد سألها هى تعبت تانى.. وشوق خدت صينيه الشاى وخرجت وقدمت الشاى لحماتها وأميره سلفتها
أميره : ايه ده هو انتى مش هتشربى شاى معانا
شوق : انا لسه ماما مكلمانى وتعبانه اوى ولازم اروحلها دلوقتى
الحماه : مش انتى لسه راجعه يا شوق
شوق : تعبت تانى يا ماما
الحماه بصت لشوق واتعوجت وقالت طيب ابقى سلميلى عليها
شوق : حاضر حاضر
وشوق كانت ملهوفه اوى ع تفسير الحلم ونسيت انها حطت برشام الهلوسه فى كوبايه اميره وكوبايه حماتها ومخدتش بالها كل اللى شاغل شوق الحلم وطلعت شقتها ولبست هدومها ونزلت جرى ع بيت امها وفالطريق قابلت فاطمه
فاطمه : مالك يا بنتى بتجرى كده ليه وشكلك مخضوض وقالت بصوت واطى ووشوشه شكلك حطيتى برشام الهلوسه لسلفتك؟ اوعى تكونى خايفه يا شوق
شوق : اه حطيته فالشاى بس فى حاجه مهمه تانيه
فاطمه : حاجه ايه؟
شوق : فاكره الحلم اللى قولتلك عليه
فاطمه : قصدك الكابوس اعوذب بالله انا لما بسمعه منك جسمى بيقشعر
شوق : اومال انا اعمل ايه انا لما بشوفوا بقوم مخنوقه عارفه لو مره مش مشكله هيبقى حلم زى اى حلم إنما علطول بحلم بيه
فاطمه : وايه دخل الحلم فالهفتك دى ووشك الأصفر ده انتى شكلك مخضوض اوى
شوق : ماما كلمتنى وكان عندها ست شيخه بس ايه قادره وهتفسر الحلم هى قالت حاجه بس انا عاوزه اتأكد وبرضه خايفه ?
فاطمه : شيخه ياااه انا بموت فالحاجات دى انا هاجى معاكى
شوق : والصيدليه
فاطمه : فايز هناك ومعاه البت اللى هيخطبها واقفه معاه علشان كده مشيت هو بالمحسوس كده قالى أمشى
شوق : خلاص تعالى
وشوق وفاطمه راحوا ع بيت مامت شوق ووصلوا البيت وطلعوا وشوق خبطت وأم شوق فتحت وشوق قالت..
ماما هى فين ست الشيخه
الأم : فالصالون ادخلى هى قاعده جوه مستنياكى من بدرى
شوق : تعالى ادخلى يا فاطمه معايا
الام : ازيك يا فاطمه عامله ايه يا بنتى ربنا يسعدك واشوفك عروسه
فاطمه : يارب يارب ادعيلى بقولك يا ام شوق هى الشيخه دى بتفهم فالاعمال اصلى كنت عاوزه اشوف بختى مع انى عارفاه بس هجرب
الام : اه دى سرها باتع وبتشوف وكمان بتشوف الفنجان
فاطمه : طيب كويس
شوق : بطلى رغى يا فاطمه الشيخه مستنيه جوه
وشوق دخلت ع الشيخه وقالت السلام عليكم يا ست الشيخه
الشيخه : وعليكم السلام تعالى يا شوق اققعدى وشوق قعدت وقالت تعالى يا فاطمه
الشيخه : مين دى
فاطمه : انا صاحبه شوق وفى مقام اختها انا تقريبا مليش غيرها
الشيخه : عندك حلم يا فاطمه
فاطمه : لا انا نفسى اشوف الفنجان لو حضرتك بتعرفى نفسى اشوف بختى مع انى عارفاه
الشيخه : محدش لى فى نفسه حاجه ومحدش يعرف بكره فى ايه غير ربنا
شوق : انا عاوزه تفسير الحلم
الشيخه : احكيه وعاوزاه بتفاصيله
شوق : انا بشوف انى لابسه فستان فرح ابيض وعروسه بس الفرح ساكت والغريب فالحلم ان الناس بترقص من غير صوت انا مش سامعه موسيقى خالص بس كل اللى بيضايقنى انى قاعده عالكوشه لوحدى وبقول انا عروسه ومن غير عريس ومحدش سامعنى مع انى صوتى عالى وبقوم مفزوعه من النوم مع انى متجوزه
الشيخه : انا مش هفسر علشان لسه فى باقيه للحلم
شوق : ازاى ده الحلم كله
الشيخه : يعنى اقولك انك هتموتى
شوق : اموووت
فاطمه : تموووت؟! بعد الشر
الشيخه : الله اعلم بس خلى بالك من نفسك كويس. ايه يا شوق اتخضيتى ولا عاوزه اقولك كلام حلو انك هتخلفى مثلا ورزقك هيوسع
شوق : ياريت اخلف
الشيخه : ربك كبير
فاطمه : وانا
الشيخه : عندك حلم
فاطمه : لأ بس عاوزه اشوف الفنجان
الشيخه : انتى هتجيلى بيتى ولوحدك يا فاطمه علشان فى كلام كتير
فاطمه : كلام ايه الحقى يا شوق هى بتبرق كده ليه
شوق : فين ده دى شكلها عادى
فاطمه : انا عاوزه اتجوز ويتقدملى عرسان
الشيخه : قولتلك انتى هتجيلى بيتى
فاطمه : مينفعش هنا
الشيخه : لا وقبل ما تيجى تكونى صايمه انتى فاهمه
فاطمه : حاضر بس امتى
الشيخه : خودى تليفونى وهتفق معاكى ع ميعاد وهتصل بيكى قبلها يلا قومى قومى
فاطمه : شوق هى بتزعقلى ليه
شوق : يا ست الشيخه انا مش مرتاحه عاوزه اعرف تفسير حلمى انا تعبانه
الشيخه : قولتلك لما يكمل تعالى وانا هفسرلك الحلم قومى يا بنتى
والشيخه حطت ايدها ع بطن شوق وقالت انتى مخلفتيش ليه يا شوق لحد دلوقتى علشان امك زعلانه عليكى اوى
شوق : نصيبى كده انا مبخلفش بس انا عارفه ده ذنب مين وبتعذب بيه لحد دلوقتى
الشيخه : قومى يا بنتى روحى بيتك وخودى صاحبتك معاكى وخلى بالك ع نفسك
شوق : مع السلامه يا ست الشيخه ماما انا همشى علشان متأخرش يلا يا فاطمه
وفاطمه قالت بصوت عالى هبقى اكلمك يا ست الشيخه وقالت طيب لما اتصل بحضرتك هو انتى اسمك ايه
الشيخه : هههههههههه أسمى عاوزه تعرفى أسمى
فاطمه : لو مش عاوزه خلاص
الشيخه : ليه هو سر انا أسمى صافيه
فاطمه : خلاص انا هسجله فى تليفونى الشيخه صافيه
وشوق خدت فاطمه ومشيوا وروحوا عالبيت وشوق قالت لفاطمه فالطريق كان نفسى اعرف تفسير الحلم
فاطمه : الشيخه دى شكلها بتفهم اصبرى ع رزقك ده وهى بتبرقلى خوفت منها لا تعرف ب المصيبه اللى بنعملها
قصة انا ياسلفتي الجزء السادس
.
.
.
.
.
.
