شفته… الرؤية مشوشة من الازاز المشغول لكن شفته… طويل جدا واصل للسقف.. علي هيئة ضوء مجوف شفاف.. .. .. ليه وراه جناحين… … المشرحة عموما اضاءتها قوية جدا و مطلية أرض و سقف و جدران باللون الأزرق و سقفها عالي جدا و مفيش فيها أى مخلوق غيري انا و هشام بيتحرك لكن هو كان واضح ليا جدا.. رجليه بتتحرك ببطء و ثقة و جسم واصل للسقف و بيتحرك في هدوء غريب… تجاه غرفة الاشعة…
اقسم بالله العظيم وقتها انا ما كان في تفكيري غير محمود و الخيال بتاعه… رميت المشرط… قلعت الجوانتى بسرعة البرق… هشام بيقول فيه ايه… زقيت الباب برجلي و اتحركت بسرعة لغرفة الآشعة…
وانا في الطريق… . اقسم بالله لن انسي المنظر ما حييت…
شفته بعينى خارج من الاوضة بنفس الهدوء و الثقة…. ضوء مجوف شفاف علي هيئة بشر بجناحين جاى عليا…. وقفت… عدى من جنبي… لمسنى…. حسيت برعشة عمري ما حسيتها في حياتى… اتكهربت قبل كده مرتين تلاتة … لكن ده احساس لا يمكن وصفه… كل خليه في جسمك بتتنفض.. كل خلية حاسة ببرودة لدرجة التجمد.. كهربا رهيبة ماشية في الأعصاب… تشنج رهيب في العضلات… و كأن كل أجهزة جسمى وقفت عن العمل فجأة… مع احساس مهول بالبرد.. فضلت لمدة تلات ثوانى في نفس الوضع.. في حالة بين الوعي و اللا وعي.. . بعدها انتبهت… حسيت كأنى كنت بجري بقالي عشرة كيلو متواصل.. ارهاق رهيب..رهيب…. كملت بهدوء و رجل تقيلة تجاه غرفة الأشعة
و دخلت… هدوووووووء رهيب….
الست فاطمة ساجدة علي الأرض… مفيش صوت ولا حركة….
ناديت عليها مرديتش… رحت أحركها مالت علي جنبها… مفيش نبض ولا دقة قلب…
لا اله الا الله…
نقلتها بهدوء لكنبة الأنترية… و ببص علي وشها…. لااااا إله الا الله
نفس الملاك المطمئن… نفس الابتسامة الهادئة الرزينة.. ابتسامة حتى بدت ثناياها … ابتسامة حاولت اوصفها علي مدى تلات سنين.. ملقيتش غير وصف واحد… ابتسامة رضا… ابتسامة من رأى الراحة و النعيم آخيرا…
قعدت جنبها علي كرسي… سندت راسي لورا… غمضت عينى…. يا الله… ماذا بينهم و بين الله؟!
أين نحن من هؤلاء؟
لا شئ يرعب هاتيك النوارس البيضاء عند موتها؟
و هل كان هو حقا؟
هل وصلت كراماتهم لدرجة أن يظهر إليهم كطيف واثق هادئ لا يخيف..؟
ياا الله….
هل تعلم هذه الجدران الآن أن جوارها يرقد جثمان أم في مرتبة شهيدة و ابنة علي درجة قديسة ؟
يا الله… هي و ابنتها؟
ذات الملاك المطمئن….
تماسكت… قمت… قبلت يدها و جبينها….و ” طبتى حية و ميتة يا حبيبتى….انا لله و انا اليه راجعون… لا إله إلا الله”
بدات استوعب اللي بيحصل… هو انا هاقول ايه للناس اللي بره… المفروض ادي للام جثة بنتها…. فهخرج اقوللهم تعالوا خدوا جثة الام؟!!
يااااا رب….
رجعت القاعة…هشام واقف مستنى… بصيت علي وفاء و الذى نفسي بيده لقد زادت ابتسامتها اتساعا للضعف تقريبا… الضعف بلا مبالغة… و ازدادت عيناها انغلاقا… و كأنها طفل تداعبه أمه…
هشام : فيه ايه يا ريس.. فيه حاجة ولا ايه… الست ماتت… قولتله بهدوء
الولد اتنفض… سابنى وراح بص عليها و انا عينى منزلتش من علي ابتسامة وفاء… رجع هشام و كأنه اصابته صاعقة… افتكر انه منطقش كلمة لآخر الاحداث…
بصيتله و قلت… ضهشام…. بص…. اطلع من غير متقول شئ اعرفلي مين اقرب حد للست دى…. بص ليا و فضل واقف…
خرجت انا عند الشباك… غير متزن و غير ثابت النظرات… ناديت محمود… احكيلي
فين اهل حماتك… يا بيه ملهاش اهل…جوزها ميت و اهله مقاطعينها . هيا و بنتها و ابنها الصغير… فقط لا غير… و فين ابنها ؟
من ساعة ما جه قاعد في الميكروباص اللي هناك ده… طيب… ادخل… فتحت الباب و دخلته… اخدته بهدوء لغرفة الأشعة..
شاف حماته… انهار
فضل يبوس ايديها… هديته.. قعد يتكلم معايا
قاللي دى اطيب ست عرفتها في حياتى… دى كانت تدينى فلوس تقوللي روح هات شبكة لخطيبتك بعد ما تحلفنى علي المصحف انى مجيبش سيرة لمخلوق ولا لبنتها… تدينى فلوس تقوللي هات هدايا لخطيبتك و تحلفنى… حتى فلوس الفرح هيا اللي مدياهالي… و انهار في البكاء…
حاولت استغل الموقف…
بص يا محمود… يبقي من واجبنا عليها اننا نخلص كل الاجراءات في هدوء و من غير اي شوشرة… انا هجيب دكتور الصحة هنا و هخلص الاجراءات كلها… انتا معاك ما يثبت انك جوز بنتها… رد قال لا.. انا لسه ما اخدتش القسيمة… طيب فين ابنها… بره في الميكروباص… طيب انا هطلعله و انتا خليك هنا هجيبه بهدوء عشان نعمل الاجراءات
طيب..
.
طلعت.. الناس حاسة ان فيه شئ غريب بيحصل… رحت بكل هدوء للميكروباص احمد قاعد في آخر كرسي و ساند راسه علي الشباك.. كنت خايف عليه من الصدمة… فتحت الباب… طلعت اقعد جنبه… ملتفتش ليا اساسا…
قولتله انتا مؤمن ؟
مردش عليا… حركت ايده… وقعت
احمد مات
انا عاوز حد بس يحط نفسه مكانى… الناس واقفة بعيد و بتبص… و طالع اقول لإبن انه أمه اللي كانت جاية تاخد جثمان اخته ماتت… فالاقيه مات…
ياااااااا الله..
بدأت أسنده و أنيمه علي الكرسي… الناس بدات تيجى… كلام كتير حواليا مش سامعه ولا عاوز اسمعه… احمد مات
و بنفس الابتسامة…. نفس الابتسامة…
.. الناس بتصرخ و تعيط و انا راجع المشرحة مش عارف فعليا ايه ده.. هل حلم…
طلعت مكتبي من غير اي كلمة…
قفلت الباب من الداخل
و لم أنهار في حياتى زى اللحظة دى….
ياا الله… ايه بين التلاتة دول و بين ربنا… ايه العهد اللي أخدوه انهم يعيشوا مع بعض و يرحلوا مع بعض… ايه البنت اللي ماتت اول يوم تبعد فيه عن امها… و امها و اخوها يموتو في اول يوم تبعد فيه اختهم عنهم… ايه الابتسامات التلاتة الهادية دى…. و ايه اللي شوفته تحت ده.؟ .. معقول… و هل لما كان خارج من الأوضة و كهرب جسمى كله كان رايح لاحمد؟.. و ليه بيظهرلي انا… و ليه في المشرحة.. أسئلة اسئلة اسئلة .. .
ايه الرضا اللي باين علي وشهم ده… ايه الملايكة التلاتة اللي نايمين دول… وهل موت السجود ده سهل كده؟… احنا فين من الناس دى… ايه الهدوء و السكينة اللي ختموا بيه حياتهم ده…
كل الأحداث دى مأخدتش نص ساعة تقريبا…
نص ساعة اتغير فيها بالنسبة لي الكون كله….
غسلت وشي… قرآن الفجر في مسجد السيدة زينب القريب يبدأ…. و اقسم بالله العظيم كانت هذه هي التلاوة…
إن الذين قالوا ربنا الله ثم استقاموا تتنزل عليهم الملائكة ألا تخافوا ولا تحزنوا وأبشروا بالجنة التي كنتم توعدون * نحن أولياؤكم في الحياة الدنيا وفي الآخرة ولكم فيها ما تشتهي أنفسكم ولكم فيها ما تدعون * نزلا من غفور رحيم *
و ختم التلاوة ب ” وما يلقاها إلا الذين صبروا، وما يلقاها إلا ذو حظ عظيم”
.
.
لا اله الا الله
نزلت… التلاتة جنب بعض علي ترابيزات… في قداسة رهيبة… كأنى واقف قدام ناس من زمن الصحابة.. ناس لا ده زمانهم و لا ده مكانهم
حاولت ادفع رسوم الغسل و الاكفان للتلاتة… محمود رفض… قاللي وفاء مديانى فلوس لكده و قالتلي هتحتاجهم..
اخدت العنوان… حضرت صلاة الجنازة و الدفن.. ظهر فيهم لي كرامات مهولة.. .. قعدت مع محمود… حكالي كل اللي حكيته فوق بالتفصيل… محمود النهردة من أعز اصدقائي… عشان حاجة واحدة بس… يحكيلي عن الحاجة فاطمة…..
صلحوا اللي بينكوا و بين ربنا… كل اللي فوق التراب تراب… مفيش حاجة مستاهلة
.
.
.
.
