انا متجوزه من ١٨سنه ،كان عمري وقتها ٢٠سنه زوجي كان راجل على قد حاله بس الحمد لله بيكسب رزقه بالحلال
وامه ست طيبه وعنده ٥ اخوات بنات كانو ورا بعض
.
.
.
.
مطلوب منه يجهزهم ويجوزهم هو قالى كل دا من قبل ما نتجوز وانا وافقت وقولت له بالحرف هعيش معاكم والرزق على ربنا ونجهزهم سوا وعيشت معاهم ف بيتهم مبنيناش شقه عشان نوفر ل اخواته البنات اتجوزنا ف أوضته ويشهد ربنا كانو ونعم العيله والله حبوني اكتر من أهلى نفسهم وكرموني اكتر منهم ومش مبالغه حتى ابويا نفسه قالى كده وكان روحه فيهم
المهم. عدت سنتين ومفيش خلفه وهو بيجهز اخته والمصاريف ع الاد مقدرتش اقوله نكشف ، وتعدي السنين لحد ما كملنا ٦ سنين وكنا جوزنا ٣ بنات وباقى بنتين وهو خدني كشفنا والدكتور قالى انى عندي مشكله ومشي معايا بالعلاج ٤ سنين ما بين علاج واشاعات وكل دا عشان منلجأش للحقن وفلوسه الكتير عشان معناش
وجوزنا البنتين التانين بقا عمري ٢٨ سنه روحنا لدكاتره تاني وكله قال لازم العمليه. جوزي كان خلص من المصاريف بتاعه جواز اخواته وابويا عطاني ٢٠ ألف ربنا يباركلى فيه عشان اكمل واعمل العمليه وأخواته البنات الله يسعدهم كل واحده ساعدت باللى تقدر عليه يترد ليهم فى الفرح والهنا
ودخلنا جمعيه قبضناها الاول واتكلنا ع الله روحنا مركز عملنا العمليه وربنا كرمنا وحملت ف توام والفرحه كانت واصله حدود المنطقه
القريب والغريب كان فرحان لينا اوى اوى وبيدعيلنا وجت ساعه الولاده الاطفال نزلو تعبانين ودخلو حضانه ١٠ ايام بالضبط
وتو فاهم الله والحمد لله ، جوزي جالى عشان يوصلى الخبر فبيقولى ماظنك بارب العالمين؟ قولت له رب كريم وظن به خير قالى وطبعا رب الخير لا يأتى إلا بالخير حتى لو آ!لمنا صح ؟ قولت صح قالى استودعيه اطفالنا ولعله خير يا حبيبتى
لاقيت نفسي ببكى من غير صوت وبقوله طيب ممكن احضنهم خدنى وروحت ليهم حضنتهم وقولت ليهم انا صابره على البعد بس وانتو ف الجنه خدوني معاكم قولو ل ربنا عاوزين ماما كانت ريحتهم حلوه اوى اوى ربنا يهدى قلبي على فراقهم
.
روحنا وكل تفكيري ان خلاص مفيش تاني لان مبقاش معانا وفوضت امري لله وبقيت كل صلاتى ادعى لولادى بالرحمه وزوجى وان ربنا يسعده لحد ما جه يوم قولت لزوجى يتجوز والشقه اللى فوق نبنيها براحه كده واتجوز فيها ، رفض وزعل منى وقالى انتى عندى بالدنيا وربنا يقدرنا وهعملك العمليه تانى بس اصبري عليا وادعى ربنا يرزقنا فرحت من جوايا لانى فكره انه بتجوز بنت غيري مميته
.
.
عدى سنه كلها تعبد وعيشه هاديه وزوجى سبحان الله كان عليه هدوء ورضا بقضاء الله ربنا يسعده دنيا واخره ويراضيه.
المهم بقا عدت السنه دى وكنت قاعده مع حماتي بمشط لحماتي شعرها وقاعدين نهزر وبقولها ياماما انا
حلمت انى شايله ٣ قراميط سمك بس شكلهم حلو اوى اوى مش زي اللى بنشوفهم وعمالين نتخانق عليهم انا وانتى ومحمد وفالاخر هر بو من ايدي ودخلو ف بطنى وفضلو يلفو ف بطنى كده وانا اضحك متقومى يا ماما تشتريلنا يمكن نفسى فيه اصلى ببطن شويه بحب الاكل
وهى تضحك وتبصلى كده وتقولى انتى محلوه النهارده
بقولها الله يخليكى. يا ماما عاوزه ايه يعني
لاقيتها قامت لبست ونزلت جابت سمك عادي وجابت اختبار حمل بقولها ايه دا بتقولى جربيه. فضلت اضحك وركنته بتاع اسبوع كده ولاقيت نفسي عاوزه اجرب من باب الامل والفضول وفجأ لاقيت ف الاختبار انى حامل!!!
خرجت جري من الحمام اعيط شويه واضحك شويه وقعدت ف الارض اسجد لربنا وابكي وحماتي وجوزي يعيطو على عياطى وحماتي من غير ما انطق تقول لجوزي حامل
كنت بعيط عياط وضحك مع بعض ومش عارفه اتكلم وفين وفين لما هديت وجوزي واخدي ف حضنه ويقولى شوفتي عوض ربنا؟ يلا البسى نروح نكشف كنت خارجه معاه
وخايفه خايفه اكون بحلم ! الدكتوره هناك قالت في حمل ف شهرين ونص وفي ٣ اكياس يعنى حامل ف ٣
جوزي فضل يضحك عليا ويقولى مش زعلتي على ٢ راحو ربنا بيقولك خدي بقا
ويقول للدكتوره مضيها معلش هى اللى هتربي لوحدها والدكتوره تضحك
.
.
وبحمد لله ربنا كرمني بيهم (يوسف ، ياسين ،ياسمين)
عندهم ٤ سنين دلوقتي
عوض ربنا يفوق كل تخيلاتك ، عوض ربنا ينسيك ما قد فقدت
فاللهم العوض الجميل لكل من فقد.. ?♥️
