_يعني تحطيه في مكان منه للنجوم كل ليلة في التلات ليالي من بعد الغروب بساعة لبعد الشروق ووانتي بتحطيه هترددي المكتوب تلات مرات يعني بالنهار هترددي عليه،، على قد ما تقدري وفي الليل هتنجميه
وفي فجر اليوم الرابع هيكون العقد جاهز والخادم إنعقد على مربع السكر فهتحطيه لجوزك في أي مشروب سخن قبل ما يحل يوم الحد الجديد ومجرد ما هيشربه ويدخل حشاه هيبقى زي الخاتم في صباعك بس حاذري من حاجتين ممكن يبوظوا العهد أنه يكون متوضي أو إنه يسمي قبل ما يشرب
=ماظنش أنه يبقى متوضي لانه يدوب بيصلي الجمعة،، وماظنش أنه بيسمي قبل ما يشرب
_خلاص يبقى عملك هيتم وبشرياته واضحه ..
وساعتها بصت تاني ناحية ركن الأنترية وبعدها رجعت بنظرها ليا وقالت_ولما يتم المراد هيبقالي الحلاوة..
وساعتها قامت وقفت فطلعت من جيبي ميتين جنيه وعطيتهملها وانا مش عارفه كده كويس ولا إيه فمسكتها وبصت فيها
وقالت_مش هدقق معاكي المرة دي لكن بعد مايتم المراد هتراضيني
=حاضر من عينيا
ولما كانت ماشية ناحية الباب مسكت ايدها فاتدورت ناحيتي فسألتها=طب مفيش حاجه تخليني أحمل
_العلم دا مش عندي يابنتي لكن أنتي أملكي قلب جوزك وبعدها ممكن يبان لنا في يوم من الأيام..
بعدها سابتني وخرجت وانا بقيت مش عارفه هل هنفذ فعلا ولا لا لكن اللي خطر على بالي ليه ماما بتتعامل بالاسلوب دا معاها وبقيت متأكدة إن في بينهم حاجه زي اللي هتكون بيني وبينها فاتصلت بماما وانا مش عارفه هفاتحها في الموضوع ازاي وبعد ما حكينا في كام موضوع سألتها_
هو إيه حكاية طنط سعيدة صاحبتك دي يا ماما،، وليه بحس إنك مش طايقاها وفي نفس الوقت بتبيني قدامها إنك مبسوطة أو على الأقل عادي
=وانتي بتسألي ليه عنها،، دي أول مره تعمليها،، أوعي تكوني كلمتيها في أي حاجة لما كانت عندنا
_هكلمها في حاجة زي إيه يعني؟؟
=أي حاجة خاصة بيكي أو بحكايتك،، أو تشكيلها او تطلبي منها تساعدك
_ليه يعني يا ماما ؟؟
=انتي هتتعبي قلبي معاكي ليه يابنتي،، انتي كلمتيها في حاجة ولا لا؟؟
وقتها كنت مترددة بين كوني أحكي لماما ولا لا،، خاصة إني بقيت حاسه إن في بينهم سر كبير نفسي أعرفه،،وفي نفس الوقت ماما لو عرفت هتحلف عليا بالأيمانات ما أنفذ اللي قالت لي عليه سعيدة
فرديت_ماحكيتش معاها في حاجه يا ماما لكن انا مستغربة من الحكاية الغريبة دي
=بصي يابنتي،، الست دي مابيجيش من وراها الا الشر،، وانا لولا مجبورة على معاملتها دي ماكنتش دخلتها من باب بيتي،، الست دي لا كانت زميلتي زمان ولا جارتي ولا نيلة،، دي واحدة بتاعت أعمال وبلاوي لجأتلها من أكتر من كام وعشرين سنة وانا هبلة وطايشة،، ومن بعدها مابقتش قادرة أخلص منها،،
_لجأتي لها عشان إيه يا ماما وهل نولتي غرضك من وراها؟؟
=مش مهم تعرفي،، دي حاجه اند*فنت من عشرين سنة،، لكن المهم إن تعرفي إن البلاوي دي بتضر أكتر ما بتنفع،،
ومن وقتها زي ما انتي شايفه تيجي كل شهر تخد اللي فيه النصيب وتمشي زي ما تكون ماسكة عليا ذلة
_خلاص يا ماما مش مهم،، انتي طابخة إيه النهاردة
=أوعي يا فاطمة يكون بينك وبينها كلام
_كلام إيه بس يا ماما..
وساعتها غيرت الموضوع وفضلنا نتكلم شوية وبعدها روحت طبخت وروقت وانا كلام ماما ك*سر عزيمتي شوية لغاية ما جا بدر وبعد الغدا والشاي على بعد المغرب لقيته بيقولي إن في عروسه عايز يخد رأيي بخصوصها وكإني خلاص وافقت على المبدأ……… يتبع
قصة خاتم في صباعي. الجزء الخامس هناااااااااااا