=قصدي هتعقدي عليه عقد،، وهتعقديه بنفسك لا هتروحي لسحرة ولا هتيجي من عند سحرة،، عقد متجرب كتير ومايعرفوش أي حد
_لا لا يا طنط انا ماليش في الكلام دا
=خلاص براحتك يابنتي
ساعتها غيّرت الموضوع وبدأت تحكي عن مسلسل ساحرة الجنوب وأد إيه البطلة كانت بتفكرها بقصة حياة واحده كانت تعرفها لكن انا دماغي ماكانتش معاها في حكاية المسلسل وكل اللي بفكر فيه كان حكاية إن جوزي مايشوفش غيري دي فروحت مقاطعاها
_بس ممكن تقوليلي على الطريقة للعلم بالشيء؟؟
ساعتها كانت ماما جايه علينا فلقيت طنط سعيدة بتغير الكلام فعرفت إنها مش عايزه تتكلم قدام ماما لغاية ما بعد شوية ماما دخلت المطبخ تبص على الأكل فلقيتها بتديني رقمها وبتقولي أبقى أرن عليها لو حبيت أعرف سر العقد وإني ماجيبش سيرة لماما عشان ماما مابتحبش الحاجات دي
وفضلت قاعدة معانا واتغدت كالعادة لغاية ما جات ماشية فلقيت ماما بتحطلها فلوس في إيدها وبتديها كيس كبير فيه سكـr وزيت ورز وشعرية ومكرونة كالعادة لما كانت تجيلنا كل شهر
لكن دي أول مره أحس باستغراب من تصرفات ماما،، الاول كنت بشوف وبطنش لكن دلوقتي حسيت إن في حاجة غلط خاصة لما عرفت إن طانط سعيدة ليها في الحاجات دي وبدأت أسأل نفسي
لما ماما مابترتاحلهاش كده،، ليه كل مره بتجاهد عشان تبان إنها كويسه معاها؟؟
بس اللي كان شاغل تفكيري أكتر هو حكاية العقد اللي بتحكي عنه..
ويومها روحت شقتي بالليل وبعد تلات أيام لقيت جوزي في ليلة جاي يجيبهالي على بلاطة وبيفاتحني في قصة إنه عايز يتجوز،، مع الاسطوانة بتاعت إنه بيدور على بنت تكون غلبانة وعايزه تعيش وانها هتبقى في الشقة اللي قصادي
وانا اللي هفضل ست البيت ولو أنا عايزة أختارلو بنفسي فهو مش ممانع ولو مش هختار فهياخد رأيي في العروسة واللي هوافق عليها هي اللي هيتجوزها..
وعلى الرغم من كل تمهيده الطويل الا إني أول ما سمعت كلامه لقيتني مش متمالكة د. موعي فقعد يهدي فيا وسابني بعد ماهديت وماتكلمناش ولا كلمة تانية في الموضوع دا ليلتها
لكن طول الليل اللي مانمتش فيه ولا دقيقه واحده وانا مافيش في بالي غير طانط سعيدة وكلامها ،، لغاية ما جوزي خرج لشغله الصبح وساعتها قررت أكلمها
قصة خاتم في صباعي. الجزء الثالث هناااااااااااا