سليم:على بركة الله يا حج
جاد:خالص يا حج انتم ممكن تسبقوني على هناك وانا هخلص شغل المصنع واحصلكم
مصطفى:انا ممكن أفضل معاك ونروح سوا
جاد:مينفعش لازم تكونوا موجودين مع زين وانا مش هتاخر بإذن الله
مصطفى:وهو كذلك
چنا بتعالي وفخ
:بس أنا مش هقدر احضر انت عارف يا جاد أنا مبحبش جو الزحمة والهيصه دي وكمان سندس صاحبتي جايه النهاردة مخصوص علشان نفضل سوا ودي لسه واصله من ألمانيا من يومين فلازم لما تيجي اكون في استقبالها.
جاد:تمام يا چنا يبقى هحضر انا وملاك
ملاك بسرعة:بجد؟ مش هتتكسف تاخدني معاك
سكتت فجأة وهي بتبص لهم بحرج، چنا ابتسمت بسخرية وغرور:
معلش يا جم١عة اعذروها اصل اللي من مستواها مش متعودين على المستوى دا ولا يعرفوا حاجة في الاتيكيت وكلامهم بيئة زي تربيتهم واطية
جاد بغضب وهو يمسك دراعها بقوة
:اخرسي خالص كلمة زيادة عنها وهتكوني طالق بالتلاتة…. انتي سامعه
چنا بصدمة وذهول:جاد أنت بتكلمني أنا كدا علشانها
جاد بحدة:دا اللي عندي يا چنا… اظن الكلام واضح ولو مش عجبك قومي وساعتها اعتبري نفسك طالق والسواق هيوصلك لحد بيت والدك…. ومتنسيش نفسك
زي ما أنتي مراتي ملاك كمان تبقى مراتي وليها حقوق عليا ومش أنا اللي اسمح ان حد يهين كرامة مراتي يا چنا
چنا بصتله بصدمة بصت لملاك بكره وشر وفضلت قاعدة وعقلها بيفكر في طريقه تخلص بيها من ملاك لانها اتأكد أن وجودها خطر عليها…..
جاد:و أنتي يا ملاك بليل تكوني جاهزه هنروح سوا كتب الكتاب
ملاك مكنتش عارفة ترد ومش عارفة تفرح ان ردلها اعتبرها او تزعل انها سبب في كل الفوضى دي والغريب هي الفوضى اللي بتحصل جواها
شوية تبقى مطمنه من وجوده جانبها وشوية مرتبكة….
جاد قام من على السفرة وراح المكتب:
خلصي أكل يا ملاك واعملي لي فنجان قهوة
ملاك:حاضر…
چنا قامت بسرعة وهي بتبص لها بكره وطلعت الجنينة….
ملاك رغم ارتباكها لكن وجود سما والحجه فاطمة كان مطمنها
قامت دخلت تعمل القهوة وراحت المكتب بعد دقايق
خبطت وهو سمح لها بالدخول، كان قاعد على مكتبه بيشتغل.
ملاك حطت القهوة وكانت ماشية لكن وقفت لما ندى عليها
:استنى يا ملاك….
ملاك بارتباك:نعم
جاد قام وحط ايده في جيبه بهدوء وقف قصادها، مد ايده تحت دقنها رفع وشها له كان باين عليها التوتر
جاد بجدية:ممكن متزعليش من الكلام البايخ اللي چنا قالته يا ملاك…. بصي أنا عارف ان فيه أسئلة كتير جواكي عن علاقتنا وطبيعتها ولازم نتكلم بس مهما ان حصل لازم تعرفي ان مش هسمح لحد يقلل منك أبدا طول ما انا على وش الدنيا
ملاك بحزن وصراحة:بس أنت نفسك قللت مني…انت اللي كسرتني واذتني مش حد تاني، چنا لو اذتني بكلامها فدا عمره ما جيه حاجة جنب اللي أنت عملته واللي أنا عمري ما هنساه، أنت خلتني اشوف نفسي رخيصة اوي، كرهتني فيك من قبل حتى ما عرفك، اذيتني في كبريائي…. أنت عملت حاجات كتير وحشة ليا وانا المفروض اعدي عادي كدا واكمل من غير مشاكل واقول اني كويسة لا يا دكتور جاد
جاد بمقاطعة:اسمي جاد يا ملاك… جاد بدون القاب
ملاك بتعب:أنت اللي حطيت الالقاب… أنت بنفسك اللي بنيت بينا سور…