قعدت على الأرض تعيط بهستريا وأنا مبقتش عارفة أعمل إيه.
“اهدي بس يا أسماء اهدي وفهميني في إيه وإيه اللي خلاك تقولي إن مصطفى معدش بيحبك هو قالك كده”؟!
-لأ بس هو اتغير معايا خالص يا إيمان اتغير كتير عن الأول.. العيد الصغير لما نزلنا البلد وطلبني من بابا وقتها كنت أسعد شخص في الدنيا كنت فرحانة لدرجة لو وزعت من فرحتي على كل الناس اللي أعرفها واللي معرفهاش هتكفي وتفيض بس معاملته متدلش خالص على إنه بيحبني.. طلع طالبني من بابا عشان خاطر وصية مامته الله يرحمها
وكمان عمي واللي هو باباه قاله يعمل كده.. آه قبل ما نسافر ونيجي نسكن هنا كان في تعامل بينا كان قريب مني أووي كان بيهتم بكل حاجة تخصني عارف بحب إيه، بكره إيه عارف تفاصيل عني أنا نفسي مبخدش بالي منها بس لما اتخطبنا اتغير خالص معدش بيتكلم معايا غير بحدود وكمان لو بابا أو عمي موجودين حتى يوم الخطوبة خلى مريم أخته هي اللي تلبسني الدبلة كان مقروف مني لدرجة إنه مش عايز حتى يلمس إيدي وقال إيه خايف عليا.
“بس يا أسماء هو فعلًا خايف عليكِ”.
-يا إيمان افهميني مصطفى مكنش كده مكنش النوع اللي في دماغك وبتاع الحرام والحلال مكنش في حدود بينا في التعامل لما كنا ولاد عم بس دلوقت الحدود اتحطت لما بقينا مخطوبين ولا هي حجج وخلاص عشان هو مش متقبلني وآنا تقيلة عليه.
يتبببببببببببببببببع