قصة وعد عمرو. الجزء الأول
يعني إيه عاوزنّي أتجوز أخو جوزي إللِ لسه مَيّـ.ت من 6 شهور؟
– أهل جوزك همّا إللِ طلبوا دا يا وعد
_ يا ماما دا أصغر مني ب سنتين، يعني عيل صغير بالنسبالي!!
– عمرو زينة الشباب، وإنتِ عارفة كويس إنه راجل وقد المسؤولية ويُعتمد عليه
_ وهوٰ ذنبه إيه يتجوز أرملة أخوه وهوٰ لسه شَبّ مدخلش دُنيا حتىٰ!
من حقه يتجوز إللِ قلبه يحبها، مش يتدبس في جوازة زي دي!!
– أنا شايفة إنك توافقي وأنتِ ساكتة وتحمدي ربنا، إللِ زيك المفروض ترضىٰ بأي حد يخبط علىٰ بابها،
مش تتكبر علىٰ شب في أخلاق عمرو!!
_ ” كلامها صدمني، كإني اتدلق عليا جردل مايه ساقعة، أمي بتعايرني!” إيه إللِ إنتِ بتقوليه دا يا ماما؟
, من إمتىٰ وأنتِ بتفكري بالطريقة دي أصلًا، ما في الأول والآخر دا نصيب!!
– ‘ قالت بحنية ‘ يا حبيبتي أنا عاوزة اتطمن عليكِ، أنا مش هعيشلِك العُمر كُله،
عاوزة اتطمن إنك في بيت راجل يرعاكِ وياخد باله منك قبل ما أموت
_ ” رُحت قعدت جنبها وبُست أيدها” ربنا يباركلي في عُمرك يا حبيبتي متقوليش كدا،
عالعموم إللِ فيه الخير يقدمه ربنا، أنا هقوم ألبس كدا وأروح عندهم أشوف الموضوع دا
” تاني!! هعدي بنفس التجربة تاني؟ وجع وقهر وإهمال تاني!! طيب أول مرة كنت مغ*صوبة عليه
وكنت عيّلة مش فاهمة حاجة ومش عارفة أقول لأ، دلوقتي حجتي هتبقى إيه لو رُحت للعذاب تاني بإرادتي!
آه حزينة علىٰ موته رغم كل شيء وحش شوفته منه، بس أروح أتجوز أخوه! أكرر نفس الغلطة ونفس الشخص تاني؟
أنا مستحيل أوافق علىٰ الجوازة دي، مش بعد ما ربنا ما نجدني من العذاب إللِ كُنت عايشاه أروحله أنا تاني برجلي”
_ السلام عليكُم يا ماما
• وعليكُم السلام يا بنتي، عاملة إيه يا حبيبتي؟
_ الحمدُ لله في زِحام من النِعم وبقيت أحسن بعد ما شُفتك يا ماما كوثر يا سُكر
• يا بكّاشة!! مامتك بلغتك باللِ قولتهولها؟
_ بصراحة آه، بس…
• مبسش يا وعد، دي سُنة الحياة يا بنتي
_ وهوٰ ذنبه إيه بس يا ماما؟ ليه تجبروه علىٰ شيء زيّ دا
32– ومين قالك بس إنهم جبروني؟
” قلبي ارتعش لما سمعت صوته، أنا أي نعم مكانش ليا كلام معاه، ولا حتىٰ تعامُل،
بس ديمًا كُنت بحس إنه شخصيته صعبة،
رغم إنه أصغر مني بس رُكبي بتخبط في بعضها كل ما أشوفه آه والله”
_ عمرو!!
– سيبينا لوحدنا شوية يا ماما بعد إذنك
” لأ تسيبنا فين!! بقولك بترعب منك يا جدع قوم عاوز تتجوزني!!
والله دي مش أخلاق إخوات أزواج خالص يعني بكلمك بالأمانة”
– وعد!!
_ ” يا مصيبتي هوٰ بيزعق ليه؟” ن..نع..نعم؟
– مالك مخضوضة كدا ليه؟ مش بعُض أنا والله
_ لأ مخضوضة إيه أنا زيّ الفُل أهو
” قرب مني شوية وأنا شوية وهصوت وأقول إلحقووووني يا ناس أنا مخطوفاااااة”
يتبع