انا هقولكم علي موقف واحكموا انتوا شوفو انا فعلا غلطانه ولا لا، انا ليا أخت وحده انا الاكبر هي اتجوزت عند عمي ابن عمها يعني ، فضلت ٤ سنين وطبعا كانوا كلهم مشاكل جامده اوي ، هي طيبه اوي اوي غيري انا خااالص، مبتعرفش تاخد موقف ومبتعرفش تاخد حقها ولا ترد علي حد، كانت بتضرب وتتشتم من جوزها وحماتها وعمها نفسه الي المفروض يكون مكان بابا، المهم هي مخلفتش وكان العيب منه بس هما مقتنعوش ، جه عمي في يوم وهي كانت عندنا جرح ابويا اوي وقاله احنا مش عايزين بنتك احنا هنطلقها، ابويا قالوا ليه ، قالوا عشان هي عقيمه ومبتخلفش وكفايه اني صرفت عليها ٤ سنين علاج وهي اصلا كانت بتاخد منشطات عشان جوزها بس، هي فضلت تعيط وقالتله انا مش هطلق ، مش عايزه اكون وحده مطلقه، وابويا قالوا خلاص انت جوز ابنك فوقها وسبها علي ذمته ، قد ايه ابويا ده طيب جدا ومش عايزين موضوع الطلاق عشان ميبقاش فيه زعل بين عمها وابوها ، المهم عمي مرديش وقال لا احنا مش عايزين الكلام ده كان يوم خميس تاني يوم الجمعه روحنا جبنا عزالها هي بس وسبناله عزاله الخشب ، رغم انه من حقها لانهم هما الي طلبو الطلاق،
وخلصت الحكايه وكل واحد راح لحاله،، بس انا منسيتش كثرة نفس اختي وابويا الي دمعته منشفتش وقولت لنفسي في اقرب فرصه لازم اوجع قلبهم، هو كل الي يقابل عمي او يروح يتقدم لعروسه يقول انا طلقت بنت اخويا من ابني عشان عقيمه وانتشر الموضوع لدرجة ان فيه ناس خافت تيجي تتقدملها لتكون مبتخلفش فعلا، واتجوزت واحد من بلد تانيه معاه طفلين وهي وفقت وقالت يمكن ربنا يعوضني بيهم وابقي زي امهم لو مخلفتش فعلا ، واتجوزت وهو اتجوز قبلهاىب٣ شهور بردوا، بعد جوازها بشهر اكتشفنا انها حامل ودي كانت اكبر فرحه لينا طبعا ،،
وهو مكنش خلف طبعا، انتهزت الفرصه وخدت اخويا وروحت جبنا حاجه سقعه كتييير اوي وفرقنا علي البلد كلها ، وبعد مخلصنا توزيع والناس مكنتش مصدقه ، جه في بالي عمي ده، روحت اخدت بكتة حاجه سقعه واخدت فرد من اخويا زي المسدس كده، وروحت علي بيت عمي هما من عادتهم انهم ديما بيقعدوا امام البيت بعد العشا، روحت في الوقت ده لقتهم كلهم قاعدين ووقفت قدامهم وروحت مطلعه الفرد هما طبعا اتخضوا وروحت مطلعه ٥ طلقات في الهوا ، والناس كلها أتلمت وفضلت أزغرط وروحت علي عمي وقولتلوا اختي حامل ودي الحاجه السقعه خد اشرب، وفرقت علي الشارع كله وقولت بصوت عالي اختي حامل اختي الي كان عمي بيقول عنها عقيمه مبتخلفش ،
أدينا عرفنا دلوقتي مين العقيم فيهم اختي ولا ابنه، ورجعت البيت أبويا زعقلي وقالي مكنش ينفع الي عملتيه كده انتي جرحتيه ، المشكله بقي عماتي لحد دلوقتي زعلانين مني وبيقولولي انتي جرحتيه اوي وفضل عمك يعيط وتعب وكده وجايبين الذنب عندي ، رغم اني مش حاسه اني غلطت في حاج. واسفه اني طولت عليكم