السلام عليكم .. انا مشكلتي صعبه جدا انا متجوزه بقالي ٣ سنين و جوزي الحمد لله ميسور الحال كنا متجوزين جوازه صالونات و الحمدلله معايا بنتي عندها سنه المهم ف يوم قلت ل جوزي انا نفسي نخرج بقالنا فتره مخرجناش و كان يوم جمعه واحنا من اسكندريه ف في عندنا كافيهات بتكون ع الشط مباشره ف رحنا كافيه كدا ف ابو قير ع الشط و كنا الساعه ٧ بلليل وايام امتحانات اخر السنه زي
دلوقتي ف الناس بلليل بتبدي تروح بيوتها المهم قعدنا و لسه بنطلب الاوردر خالته اتصلت بيه و قالتله محتجاه يوديها تشتري حاجات ب العربيه بتاعته هي و بنتها و ابنها ف طبعا مش هيعرف ياخدني معاه ف قلتله مش مشكله روح بس متتاخرش لأن خالته قريبه م المكان اللي احنا فيه قالي ماشي مش هتاخر .. المهم عدت ساعه مجاش ساعتين مجاش لحد م الساعه وصلت ١٢ بلليل و للأسف انا موبايلي
بايظ بقاله فتره ف انا نازله م البيت اصلا معتمده اني معاه .. بقيت قاعده مرعوبه و المكان كله العائلات روحت منه و ابتدو الشباب و الرجاله الكبار يجو و الشط كان ضلمه جدا .. بقيت قاعده مرعوبه لحد م ببص يميني لقيت راجل م التربيزه اللي ورايا ماسك سيجاره و شكله مش طبيعي جاي بيقرب عليا انا و بنتي و …
بيقولي انتي ي مدام ازاي تقعدي هنا ف وقت زي ده انتي ملكيش حد ولا ايه و طريقته فالكلام مرعبه و لجل حظي الحلو جوزي وصل وقتها و انا بكلم الراجل بقوله أنا مستنيه ناس .. راح جوزي جه و اتخانق مع الراجل و الحمد لله الخناقه اتفضت و قام جوزي واخدني و واحنا
مروحين هراني شتيمه و بهدله اني ازاي ف وقت زي ده و بكلم رجاله و عاوز يقلب التربيزه عليا ..
انا بقا بحاول أفهمه أنه هو اللي سابني وهو عارف اني مش من هنا و معرفش اروح من مكان زي ده بليل لوحدي و الفلوس اللي كانت معايا
مكنتش تكفي اني اركب تاكسي مثلا و خفت اركب مواصلات ف الوقت ده و منطقه ابو قير دي اساسا فيها حتت مقطوعه .. و ده يبهدلني و يقولي خالتي كانت مخنوقه و مشيتها بالعربيه بعد م اشترينا الحاجات خليته يروحني عند امي و حاليا انا غضبانه بقالي اسبوع و هو مسألش فيا اعمل ايه ؟