لما خالد ابني كان عنده تلت سنين ونص كنت بوديه نادي يلعب سباحه ..
كان اصغر طفل هناك والكباتن كانو بيحبوه اوي ومهتميين بيه لانه اصغر طفل كمان ..
قاعده علي الكراسي وبتفرج عليه وبشجعه وفرحانه وهو ياحبيبي كان شطور ومُستجيب مع الكباتن ومش قلقان من الميا
واحده قاعده جنبي ام لطفلين كبار لقيتها بتقولي انتي ام الولد الصغنن ده قلتلها اه .. قالتلي غريبه مش خايف من الميا وبيلعب ومبسوط ده انا عيالي كبار ومغلبني مع الكباتن
ولسه هرد عليها .. اسمع صوت خالد بيصرخ حرفياً وعمّال يناديني وعايز يطلع روحت له وحاولت اهديه وانه ينزل تاني ابدا اكن الميا بتلسعه والكباتن بقوا مستغربين وانا مستغربه
وده كان اخر يوم لخالد ف لعبة السباحه الي الان واهو عنده ٦ سنوات ونص وكل ما افتح الامر معاه انه يروح يقولي لا
لما روحت البيت وبحكي لزوجي وبراجع الاحداث قلنا بس!
هي الست دي السبب
ياجماعه والله مش هتغلبوا لو بركتوا
مالها كلمة اللهم بارك؟ الواحد والله بقي يخاف اوي وحريص اوي انه يقول اللهم بارك علي اي شئ يعجبني
اتعلمت من يومها ان لو حد اعجب بحاجه عندي او عيالي ومقالش اللهم بارك .. انا بقوله قول اللهم بارك
الكلمه متزعلش ابدا
الله المستعان