والدى جاب بنت عمتى واختها تعيش معانا عشان والدتها اتوفت من فترة قصيرة و والدهم متوفى من 8 سنين وكانوا ساكنين ف شقة وهو حب يخفف عنهم مصاريف الشقة وان مش ليهم حد تاني غيرنا ويقعدوا معانا ويصرف عليهم
وفى يوم كنت عاين فلوس فى مكان معين ووالدتي عارفاه ..وبنت عمتي كانت محتاجة فلوس زيادة على اللي والدي بيديها ليها تروح الجامعة بتاعتها فى محافظة تانية ف والدتي ادتها الفلوس دي وقالت هتبقى تعرفني لما ارجع، ف يومها روحت البيت متاخر خالص ونمت
ومحدش قالي حاجة وتاني يوم كان عليا امتحان وصاحي متاخر ورايح اخد الفلوس عشان انزل الجامعة ملقتش الفلوس ومكنش حد موجود غير اختها الصغيرة ف قالتلي ان ماما ادت اختها الفلوس ونسيت تقولك ف اتعصبت جامد وفضلت ارزع ف الحاجة وقولت مش عارف ايه القرف ده !…وبعدين اتصرفت فى فلوس من واحد صاحبي
ولما رجعت بالليل سمعت اختها وهى بتقول لاختها الكبيرة اللي حصل ف اختها قالت لها انها هتحاول تتصرف فى فلوس من حد على اخر الاسبوع ويشوفوا شقة يسكنوا فيها وهتقول لوالدي انهم هيقعدوا لوحدهم عشان يسيبونا نركز فى المذاكرة وناخد راحتنا .. تاني يوم اعتذرت ليهم وان مكنش قصدي حاجة وكنت متعصب بس عشان متأخر..بس من يومها وحسيتهم خايفين مني ومش عاوزين ياكلوا
وتقريبا بياكلوا مرة ف اليوم ف كنت بتعمد امشي وقت الاكل عشان ياخدوا راحتهم وبعدها بكام يوم قبضت مرتبي واديته لماما وخليتها هى اللي تديهم الفلوس زيادة معاهم عشان مش يتكسفوا بس باين عليهم الزعل جامد ومش واخدين راحتهم ومش عارف اعمل ايه وانا معتبرهم اخواتي وبخاف عليهم وخايف عليهم يعيشوا لوحدهم عشان محدش يأذيهم او مين هيصرف عليهم ومش ليهم حد بس مش عارف اعمل ايه؟