” صدقيني هطلعه أحلى من اللي في بالك ”
عروسة كـانت جيالي مـع خطيبها وأخته عشان تفصَّل عندي فستان فرحها وده لإن ناس كتير قالتلها عليا إن تفصيلي حلو جدًا ورخيص.
وبعد مناقشة حادة بينها وبين خطيبها ردت عليه بكل عصبية وقالت:
” بس أنا مش هفصَّل عندها وكفاية إنك مجبتليش الفستان اللي كنت عاوزاه ”
شدَّها من إيديها بتعب وحاول يفهمها بهدوء وقال:
” مش حابة تفصيلها نروح لحد تاني بس متكليمهاش بطريقة وح-شة لإنها مش شغالة تحت أمرنا وكمان الفستان اللي إنتي كنتي عاوزاه تمنه لوحده قد تشطيب شقتي كلها ”
لفت نظري أخت العريس لما بصيت عليها لاقيتها قاعدة تبص على الفساتين اللي كانت على المانيكان وبعدين وقفت عند فستان ” أوف وايت ” ولمعة الفرحة بدأت تنساب برُواء في عيونها فقومت من على مكنة الخياطة ووقفت جنبها وقولت:
” عاجبك صح؟ ”
لفت وشها ليا ببهجة وقالت ” عاجبني بس؟ ده يجنن ”
عيوني خدت نظرة على العريس البائس وعروسته اللي الطمع مستوطن قلبها وبعدين قولت:
” تعرفي إن دي تفاصيل قديمة جدًا فقولت أحطها استعراض عشان الجديد ميتبهدلش وأبعته في الأرورد نضيف؟ لو كانت خطيبة أخوكي سابتني عملتلها فستانها كنت بذلت كل جهدي والله عشان يعجبها ” •
– دي كانت عاوزة فستان بـ ٤٠ ألف.
نعم!
– بكلمك بجد والله.
أنا كنت هعملهولها بـ ١٠٠٠ جنيه بس والقماش عليها.
– يلا ربنا يهديها ويفرحهم ببعض.
” شوية ولاقيت أخوها نادى عليها بضيق ومشوا حسيت قلبي مليان وجع من كل حاجة، يعني هو بيتمنى رضاها وهي مش مقدَّرة مجهوده وتعبه، وأنا اتمنيت بس من ربنا راجل محترم يحميني ويقف جنبي بعد مoت والدي ومرض أمي قد إيه حسيت إن ضهري متعري لكل الناس بس مكنش ينفع أقول غير الحمد لله ”
بعد سنتين لاقيت نفس العريس جاي ومعاه شاب كمان أول مرة أشوفه وأخته فقومت وقفت وقولت:
” إنتي معقولة؟ ”
فردت بسعادة وقالت:
” لسه فاكراني؟ ”
قولتلها ” ايوه طبعًا “.
فضحكت بصوت رقيق وقالت:
” المرة دي أنا مش جاية مُرافق، أنا جاية عروسة وعاوزاكي تعملي ليا فستان فرحي، برغم إن زوجي كان عاوز يجيب ليا فستان غالي بس أنا واثقة إني مش هلاقي زي شغلك ”
حسيتها حطت جوايا قنبلة بهجة ونثرتها في خلايا جسمي.
بدأت أبص للتصميم بدِّقة عالية وأخد مقاسها وفجأة لاقيت أخوها بص على المكنة وقالي:
” إيه ده؟ ”