” طب هو أنا صح ولا غلط… أنا قولتله عشان أنا زهقت من التمثيل اللي بنعمله دايما قدامه ومن حقه يعرف ليه اخته حزينة… لكن هو اخدك مني ؟! كنت هصلح غلطي والله !
قاعدين في التاكسي أنا ومحمد… ساكتين خالص… هو بيبص من الشباك وكل كام دقيقة ينفخ بضيق… مضايق مني… بس اعمل ايه… أنا كنت خايفة عليه وكنت عارفة أنه هينفعل بالطريقة دي عشان كده سكِت…
‘ محمد… ممكن تهدى ؟
بصلي بعصبية ولسه هيزعق فيا بس سكت في آخر لحظة لما أخد باله إن السواق معانا… قرب من ودني وقال
* حسابك لما نوصل !!
رجع يبص من الشباك وساكت… أنا كمان هتعا*قب منه… لو هعرف أنه هيضايق مني كده كنت قولتله من بدري وخلاص…
وقف التاكسي قدام ڤيلا كبيرة وفخمة… استغربت انه وقف هنا… بصيت لمحمد اللي كان بيبعد عيونه عني وقال بجمود
* يلا هاتي شنطتك وانزلي…
‘ بس ده مش بيتنا !
* بقولك انزلي…
نزل هو وأنا استغربت طريقته دي… اضطريت انزل زي نا هو عايز… التاكسي مشي ووقفت جمب محمد
‘ مش هتقولي احنا بنعمل هنا ايه ؟
* استني لما يجي…
‘ مين ؟
* إلهان…
‘ إلهان مين ؟
فجأة ظهر قدامنا شاب ثلاثيني وسيم ورياضي… قرب من محمد وحضنه
– عامل ايه وحشتني يا كابتن
* أنت أكتر والله…
بصلي وابتسم ومَد ايده يسلم عليا بس محمد قاله
* احنا في مصر ولا نسيت ؟
– مش فاهم ؟