غالب: ( بنرفزه ) ايه نورت الشركه دي محسسني اني بقالي سنين ماجيتش الشركه بتاعتي
محمود: انا اسف ماقصدش ياغالب بيه اناااا..
غالب: انت ايه.. انت ماتنطقش تاني
محمود: ( اتكسف وبص في الارض مره واحده الباب اتفتح وعاصي دخل عليهم )
عاصي: ( طبطب بأيديه علي كتف محمود ) اطلع انت دلوقتي يامحمود
محمود: حاضر يااستاذ عاصي
عاصي: ( بهدوء ) اي اللي مغيرك كده ؟
غالب: بعد كل اللي بيحصل ده.. وانت لسه بتسأل ايه اللي مغيرني.. انت مش حاسس بنفسك ياعاصي بيه
عمال تخبي عني كل حاجه بتحصل معاك واقول مش مشكله بكره ييجي يحكيلي.. اسيبه براحته خليه هو اللي يحكي.. وفجأه الاقيك اختفيت واتجوزت احسان وانت اصلا مابتحبهاش وكل ما حد يقرب منك مابتقولش غير انا حر.. لاء انت مش حر انا من حقي اعرف ايه اللي بيحصل معاك
عاصي: طيب ما انت عارف اتجوزت احسان ليه ؟
غالب: ماتحاولش تقنعني ابدا عشان نمت معاها.. ما انت عملتها قبل كده كتيييير قبل فيروزه وعادي ومكنتش بتحط في بالك.. ايه الجديد اللي اتغير المره دي
عاصي: طيب مافكرتش لحظه انا ليه بقيت مع فيروزه وتوبت ومابقيتش اعرف حد غيرها في يوم طول السنين اللي كانت معايا فيها ومابصيتش لحد غيرها
غالب: ( ضم حواجبه ) مش فاهم تقصد ايه ؟
عاصي: ( بندم ) اقصد ان قبل ما اعرف فيروزه.. عرفت بنت ووثقت فيا.. حبتني من قلبها بجد وانا شغلت عقلها وقلبها كانت بنت بسيطه معايا في الكليه كانت سنه اولي وانا كنت سنه تالته وفضلت وراها لحد ما خليتها تجيلي وعملت معاها زي ما بعمل مع اي حد بس البنت دي كانت غيرهم.. وطلعت حامل طبعا وقتها كنت لسه صغير ومش عايز اشيل اي مسؤوليه البنت حاكتلي انها حامل وانا بكل نداله سيبتها ورميتلها شويه فلوس وقولتلها تنزله عمرى ما هنسى نظراتها ليا وقد ايه هي ندمانه انها عرفتني.. بعدها بأسبوعين اكتشفت انها انتحرت ورمت نفسها من فوق عمارتهم وقتها اهلها مكانوش عارفين السبب ولحد دلوقتي محدش يعرف هي انتحرت ليه ؟ انا دخلت في حاله اكتئاب واحساس بالذنب فظيييع ان انا السبب في موتها وبقيت اشوفها واشوف خيالها قصاد عيني في كل مكان وبعدها شوفت فيروزه واختارت فيروزه