جاد بهدوء:ماليش نفس يا ملاك وحقيقي عايز انام دلوقتي…
ملاك:لا طبعًا مش هنام من غير ما تاكل وبعدين أنا كمان ماكلتش خلينا نتغدا سوا…
جاد:ماشي يا ستي…..
ملاك ابتسمت ومسكت ايده قعدته على الانترية وقربت التربيزة منهم… قعد جانبه وهم بيتغدوا بيتكلموا عن دراستها وعلاقتها مع چنا في الفترة الأخيرة وأنهم هاديين مع بعض… رغم ان ملاك كانت متضايقه أنه بيبات معها يوم ويوم مع چنا
لكن حست أنها أنانية لو اعترضت او حسسته أنها مش قابله الفكرة علشان كدا كانت بتتجنب چنا اللي دايما تغيظها في اليوم اللي يكون جاد معها فيه.
__________________
في اوضة چنا كانت واقفه بتتكلم مع الخدامة وهي مندهشة ومبسوطة من اللي سمعته
چنا:أنتِ متأكدة يا بت يا نرجس يعني شوفتي حبوب منع الحمل في دولابها
نرجس بابتسامة:
اه والله يا هانم ومتاخد منها كمان وبعدين هو انا هتوه عن حاجة زي دي….
هناء:دا لو جاد أو الحج محمد عرفوا أنها بتاخد الحبوب دي يااه
نرجس بطمع:أنا قلت لازم اجي أبلغ حضرتك يا هناء هانم هو انا ليا بركة غيرك
هناء بابتسامة وهي بتديها فلوس:
شاطرة يا بت…. روحي دلوقتي على المطبخ ومش عايزاه حد يعرف حاجة عن حكاية الحبوب دي فاهمة
نرجس بطمع:من عنيا يا ست الكل
نرجس خرجت من الاوضة چنا بصت لوالدتها بمعنى ناوية على ايه
هناء بابتسامة: حلو اوي اللي بيحصل دا حلو اوي…. ملاك خدمتنا بجد… بقولك لازم تعملي اللي قولتلك عليه لازم تاخدي موبيله وتطلعي صورهم في اسكندرية من عليه
ابقى تبعتيه لنفسك على الوتس واسمحيهم من عنده وبعدها أنا هقولك تعملي ايه وساعتها هنقلب الدنيا فوق دماغ جاد وهو مستحيل يتخلى عن منصبه علشان واحدة بتضحك عليه ومش عايزاه تخلف منه…..
چنا:و لو جاد عرف
هناء:لا متقلقيش أنتِ بالنسبه له ارحم بكتير منها وهو دايب في حبها ومع ذلك يكتشف انها مخبيه عليه وبعدين الشوشرة اللي هنعملها عليه هتخليه ميفكرش كتير وهو يطلقها واحتمال يكره صنف الحريم كله
چنا:ماشي يا ماما همشي وراكي لما اشوف اخرتها اي هو النهاردة عندها بس بكرة هيكون معايا وبعدين انا ماصدقت انه خلاص هدي شوية من ناحيتي….
هناء:اوعي بقا تعملي اي مصيبة تخليه يتعصب منك وبطلي غيرتك بدل ما تودينا في داهية ابوكي يكلمني من القاهرة وهو متضايق وخايف يحصل لي حاجة تبوظ شغله مع جاد…
چنا:متقلقيش انا سايبه الفترة دي خالص خليه يعمل اللي هو عايزه لحد ما نخلص من الحية دي ولما يبقى معايا هفتح موبيله واعمل اللي اتفاقنا عليه…..
هناء:ياريت…..
بليل
ملاك كانت بتذاكر وهي متضايقة لإنها حاسة انها مش فاهمة حاجة بصت لجاد اللي لسه نايم وابتسمت بخبث وهي بتقعد على السرير بسرعة
و بصوت عالي:دكتور جاد يا دكتور…. دكتور
جاد فتح عنيه بازعاج وبصلها باستغراب
:في ايه يا ملاك حد يصحى حد كدا
ملاك بابتسامة:اصلك وحشتني
جاد ابتسم واتعدل بص في الساعة لقاها 11 قبل نص الليل
:يااه أنا نمت كل دا لسه مصحتنيش
ملاك:كنت هصحيك بس ماما قالتلي اسيبك نايم وأنا بصراحة لقيتك تعبان صعب عليا اصحيك…..