عيونه كانت بتتكلم بصدق كبير… مش قادرة ابعد من جمبه… بس خايفة اثق فيه تاني… الثقة لما بتختفي صعب ترجع… خايفة يبقى كل اللي بيقوله ده مجرد كلام مرتب وخلاص عشان اصدقه… قرب وشه من وشي ولسه هااا… بعدت عنه وحطيت مخدة في نص السرير واديته ضهري…
عيطت وقولت
‘ أنا قلبي لسه مك*سور… صعب يحصل ده… صعب اخليك تقرب مني… أنا كنت واثقة فيك بس أنت موثقتش فيا من الأول… اتهامك ليا بأني على علاقة مع حد مش قادرة انساه… كل ما بتقرب مني كلامك بيتردد في ودني… صدقني حاولت كتير اسامحك من غير ما تطلب كده بس مش قادرة… مش قادرة انسى يا سليم !!
اتنهد وقال
” عندك حق… مقدرش ألومك… أنا سبب اللي وصلناله ده… بس أنا مش هيأس وهفضل احاول حتى لو ل عشر سنين قدام… المهم في النهاية تسامحيني…
سكت وهو كذلك… سكتنا لغاية ما نمنا…
تاني يوم……
سليم صحي لقي أيلين لسه نايمة… فضل يبصلها ويتأمل في ملامحها… مد ايده يلمس على وشها… بس اتراجع في آخر لحظة لما افتكر كلامها امبارح وافتكر اد ايه كانت خايفة منه ومش عيزاه يقربلها… قام سليم دخل الحمام…
اخد دُش سريع وخرج… عمل شوية رياضة ولما خلص دخل المطبخ يعمل الفطار… فجأة جرس الشقة رن… راح يشوف مين… فتح الباب ولقي رغد… لسه هيتكلم قربت منه حضنته وايديها حوالين رقبته وقالت
* سليم وحشتني أوي !!
سليم اتصدم انها حضنته بالملزق ده… بَعَدها عنه بسرعة وقال بصوت واطي
” بتعملي ايه هنا ؟!
* وحشتني قولت اعدي عليك اشوفك…