– اقوم ليه
– نروح مشوار هيعجبك اوي
– مشوار ايه، انا قاعده قلقانه على ابني، ويونس بيه خرج وسابنا هنا
– متخافيش هو لازم يجي ورانا، المهم وسيم في خطر، وانتِ في إيدك تنقذيه
– يا حبيبي يا ابني، دا انا افديه بروحي
– متخافيش هتفديه بيها قريب
– مش فاهمه
– اقصد يعني.. المهم هو خطر تحبي نروح نطمن عليه
– طبعا انا قلقانه عليه اوي، يا رب احفظلي ابني
– يلا بينا يا طنط
– يلا يا هند، واضح انك بنت حلال وأنا حبيتك أوي
– هو لو وسيم كان مش متجوز كان ممكن تجوزيه واحده زيي مثلا
– مش فاهمه قصدك
– اقصد يعني لو حد زي وسيم ابنك عايز يتجوز، وقالك انا عايز واحده زي هند هتوافقي
– بصراحه دا اختياره هو، بس هو ياخد واحده شبهه، وبتلبس لبس محتشم ومحترم، لكن انتِ جذورك هنا ولبسك شكلهم وليكِ اللي شبهك
– يعني انا في نظرك مش كويسه
– لأ طبعا انتِ ست البنات، بس وسيم ذوقه مش كدا
– هند بصوت يشبح فحيح الأفعى: صدقيني هيبقى كدا
– بتقولي حاجه يا هند
– لأ يا طنط، بقولك يلا هنتأخر
________
– فهمت هتعمل ايه
– فهمتك يا باشا
– ركز كويس مش عايز غلطه واحده
– حاضر يا فندم
– الناس دول مش سهلين واكيد عاملين حسابهم، روح انت عند المصنع القديم، وتابع معايا وقولي في ايه هناك، وانت زي ما فهمتك بالظبط
– حاضر
– انا بلغت الشرطه يا يونس بيه
– كويس، وسلمت التسجيلات
– ايوه، وقدمت بلاغ بإختطاف دكتور وسيم ودكتوره زينه
– انا مش عايز انسان يعرف ان انا موجود في إيطاليا
– حاضر يا فندم، بس انا عرفت حاجه
– وحيد كمان مش باين
– انا شاكك فيه من زمان اصلا، حاسس انه ليه يد في اللي بيحصل، ربنا يسترها، يلا نفذوا التعليمات
– حاضر يا باشا
_________
– فهمت هتعمل ايه يا وحيد
– هعمل نفسي تعبان وأفضل اصرخ وانادي عليهم
– بالظبط وأول ما يدخل هضربه بالكرسي دا على راسه، اكيد زينه هنا، انا لازم الاقيها
– هما هيفرق معاهم تعبي اصلا، دول ضربوني وعذبوني
– هيستفذهم صراخك، وكمان هعمل نفسي بضربك
– ربنا يستر
– يا رب، يلا إبدأ
– وحيد بصراخ وظل يكرر: بليييييز هيلب مي – Please help me -، حد يساعدني، بتضربني يا وسيم ، صدقني يا وسيم انا مش خا.ين، ارجوك يا وسيم سيبني اعيش
– الحيوان اللي جوا دا بيزعق كدا ليه، انا هدخل أأدبه، روح انت خليك عند اوضة البت التانيه
– طيب
– بتزعق كدا ليه يا.. اااااااااااااااااااه
– شاطر يا وسيم، لسه فاضل واحد انا كنت شايفه واكيد في ناس برا
– طيب كتف الواد دا، وانا هروح ادور على زينه
– ماشي
________
– هتعملي ايه يا هند
– معلش يا طنط لازم اغمي عيونك
– ليه يا بنتي
– عشان متعرفيش احنا رايحين فين بالظبط
– هو انا اعرف اي حاجه هنا
– اسمعي الكلام يا طنط لو عايزه تشوفي ابنك
– حاضر يا هند، بس انا بدأت احس انك ورا اللي بيحصل