– من فضلك وصليني بدكتور يونس
– للأسف يا فندم دكتور يونس في اجتماع دلوقتي
– قوليله مكالمه مهمه جدا
– اقوله مين يا فندم
– قوليله زينه بنتك
– حضرتك زينه هانم؟
– ايوه انا
– اهلا بحضرتك يا فندم، ثواني وهرجع لحضرتك
– بالله عليكِ بسرعه
– مش هتأخر على حضرتك
_______
– معلش هستأذن حضراتكم جالي تليفون مهم
– اتفضل
– السلام عليكم ورحمة الله
– وعليكم السلام يا ماما، عامله ايه يا حبيبتي، انتِ كويسه
– لأ مش كويسه يا وسيم
– خير يا ماما فيكِ ايه
– صحتي كويسه، لكن زعلانه منك اوي
– طيب يا ماما ممكن استأذنك نص ساعة وارجعلك
– ليه النص ساعه دي يا وسيم
– في شغل مهم لازم اخلصه
– شغل ايه
– يعني انتِ هتفهمي في شغلي يا ماما
– بعت شركات يونس ولا لسه يا وسيم
– نعم!
– زي ما انت سامع
– مش فاهم قصدك يا ماما
– عذبت بنت يونس ولا لسه يا ابني يا اللي ربيتك وعلمتك عشان توقف مع الناس وتساعدهم
-……..
– انت مفكر إنك كدا بتجيب حق ابوك واختك، بالعكس يا وسيم انت بتخلي ابوك زعلان منك، وبتغضب قلبي عليك، يا ابني اللي حصل مع ابوك واختك دا نصيبهم
– انتِ جبتي الكلام دا منين يا ماما
– ربنا عايز يعطيك فرصه تفوق يا وسيم
– جبتي الكلام دا منين يا ماما، هي زينه كلمتِك
– لأ، بس ربنا أراد اني اعرف، عشان ألحق ابني قبل ما يضيع
– ماما انا مشغول دلوقتي
– بس انا مش هسيب بلدي يا وسيم
– مش فاهم
– مش فاهم! ، هي مش دي خططك يا ابني، مش عايز تسرق فلوس الراجل وتخون ثقته، وتسفرني ليك وتهرب بالفلوس بعيد، هل انت كدا انتقمت وارتاحت يعني، ايه كنت عايز تسفرني وتعيشني معاك في بلاد غريبه وبفلوس حرام، مش من حقك، طب هو وحش، انت تبقى وحش زيه ليه يا ابني، وبنته ذنبها ايه، ذنبها انها وثقت فيك وحبيتك
– ماما انتِ فتحتي مذكراتي؟
– دا اللي فارق معاك، عموما اه وقعت قدامي غصب عني وانا بروق اوضتك
– مش انا قايلك متدخليش اوضتي يا ماما
– سميه بحزن (والدة وسيم) : هو دا اللي يهمك، مش فارق معاك الناس اللي هتضيع بسببك، الشيطان ضاحك عليك والسكينه سرقاك، مش هتفوق الا وانت مضيع نفسك، وخسران كل اللي بتحبهم، انت بتعمل ايه عندك؟! ،
بتخون الامانه، بتبيع أملاك غيرك، وتقول انتقام، انتقام من ايه ومن مين يا ابن بطني، الراجل دا وثق فيك، فاهم يعني ايه وثق فيك، انت كدا بتسرق، دينك علمك كدا، انا علمتك كدا، يا خسارة تربيتي فيك، يا ألف خساره، من اللحظه دي وانا ابني مات، انا خلاص ماليش حد، جوزي مات لكن مات شريف، وبنتي سبقتني على الجنه، لكن ابني انا بريئه منه ومن تصرفاته، كنت مفكره اني جايبه للدنيا دكتور يرفع راسي ويخلد اسمه واسم ابوه بسيرته الطيبه بين الناس، كنت مفكره انه هيساعد الغلابه والمحتاجين، كنت بقول ابني هيكون سبب في دخولي الجنه، لكن للأسف يا وسيم كنت غلطانه ومخدوعه فيك، انت خسرتني وللأبد، اعتبر أمك ماتت، خليك عندك ومترجعش عشان مش هتلاقي حد مرحب بوجودك، وابعت البنت الغلبانه ل ابوها ملهاش ذنب في انتقامك.