معتز:بقولك يا قاسم انا عايز اشوف طه… عايز اطمن على اخويا… اظن كفاية اوي كدا وشهاب علمه الأدب بس كدا كتير خليني اخده يا قاسم… انا آخر مرة جيت اشوفه صعب عليا حاله قسما بالله كنت هعيط
انا عارف انه غلط… وغلطه كبير بس علشان خاطري انا سيبني اخده معايا وأنا هعلمه الأدب بس كفاية كدا
قاسم:و الله مش عارف اقولك ايه يا معتز انا لو عليا كنت سيبته من بدري بس شهاب!
على العموم هو كلمني وقالي اسيبه يمشي وعلى فكره
طه كان بيتعاطى حاجة وشهاب لما عرف سابه محبوس علشان يخليه يبطل الزفت دا
هو قالي اسيبه بس صدقني انا دكتور وعارف طه لو خرج في الحالة دي مش هيتردد لحظة انه ياخد جرعة
و في الحالة دي المريض بياخد جرعة كبيرة وحالات كتير بتمو”ت في الحالة دي
معتز سكت بحزن وربت على كتف قاسم
-أنت شايف ايه دلوقتي يا قاسم؟
قاسم:محتاج يروح مصحة لعلاج الاد”مان
معتز:اعمل اللي مفروض يحصل يا قاسم أنا عايز طه يرجع زي زمان صدقني هو مكنش كدا
قاسم:متقلقش يا معتز… انا هعمل الازم وبعدين متوصنيش عليه دا اخويا
معتز ابتسم بحزن ودخل معه البيت
الصبح بدري في بيت الحسيني
حليمة كانت بتسمع هند بدهشة وغضب من بنتها
اللي قاعدة تتكلم معاهم وبتشاور الحج محمود عن رغبتها في الشغل مع معتز وأنها هتكون فكرة كويسة ليها
قاسم بحماس:
انا شايف انها فكرة جامدة بجد حقيقي خطوة حلوة جدا يا هند ولا أنت ايه رأيك يا جدي؟
الحج محمود بابتسامة:
-انا بشجعك بقوة وحماس لو عليا اتصل بالوادى معتز دا واقوله كنت فين من بدري
هند ابتسمت بحماس بصت لوالدتها وهي شايفه نظرات الغضب في عيونها
-و أنتي يا ماما رأيك اي؟
حليمة بحدة واستغراب:
-رأي؟! أنتم بتهزروا صح!
يعني بنت الحسيني تشتغل على اخر الزمن وكمان ايه حتة مدرسة في سنتر
ليه من قلة الشغل وبعدين هو انتي فقيرة علشان تروحي تشتغلي
قاسم كان هيتكلم لكن هند بصت لوالدتها بحزن
-ماما لو سمحتي ممكن تبطلي تقللي من اي حاجة بعملها
حضرتك فاكرة اننا في عصر البشوات… ايه يعني بنت الحسيني ولا هو علشان ربنا كرمنا نقلل من الشغل
الشغل لا هو عيب ولا حرام