“ضحكت لخوفها وتجميع السيناريو الغريب دا فى دماغها”
=اهدى يافريدة نور بس مش حابب يعرف اى حد حوالينا هو بيحب الخصوصية جدا، لحد بس ما اكون متأهله للفكرة دى هنعلنها فى اقرب وقت.
“اتنهدت، وحسيت بملامح وشها هديت”
_يعنى هو قالك كدا؟
=ايوة يابنتى مالك!
_بصراحة اترعبت طريقته كأنه مكلمكيش قبل كدا دا ممثل شاطر قوى، وحسيت بغموض اصل انا مش هخلص من وسيم يطلعلى نور.
=مش فاهمه تخلصى من وسيم ليه كدا كدا هرب متتعبيش
_بصراحة ياغرام انا…
=فريدة انتِ ليكِ علاقة بهروبه؟
_غرام بهدوء انا هفهمك …
=انطقِ يافريدة ليكِ علاقة بهروبه..ردى ساكته ليه؟!
_غرام، وسيم مينفعكيش انا روحت سألت دكتور قاسم وقالى ان شخصيته ومرضه خطر جدا على اللى حواليه يعنى ممكن يعاملك احسن معاملة وفجأه يتحول لشخص تانى خالص يتقلب وحش يفترسك انتِ وبنتك.
=عملتِ كدا ليه يافريدة دا الوحيد اللى خلانى احس انى ست، دا الوحيد اللى خلانى اعدى مرحلة صعبة او حتى مش أعديها خلانى اتخطى الكتير منها ليه كدا؟
_مينفعكيش، متعيطش مشفش دموعك، نور ينفعك ياغرام، دكتور وله مستقبل هيعلم بنتك أحسن تعليم وكان بيحبك زمان ورجع اعترفلك وحكتيلى، خليكى مع نور، نور دا هيعيشك ملكه ومش مريض.
=انتِ قررتيلى صح؟ انتِ خلاص بقيتِ المسئولة عنى! دى اختياراتى انا وحياتى انا يافريدة
“كانت بتبرر اللى عملته وبتشرحلى، قد ايه هى جرحته وفهمته على حكاية نور من البداية، مكنتش عارفة اتعصب عليها!.هخسرها؟ مش هيبقى ليا حد خالص لحد ما قالت الجملة اللى تستحق أثور ”
_ اختياراتك!! هه سلامات على اختياراتك، مش اختياراتك اللى خلتنا نحارب مع يوسف ووقفتى قدام أهلك عشان تتجوزيه
وأهو النتيجة رماكى انتِ وبنتك..حتى حتى اهلك رموكى، انتِ ملكيش غيرى أسمعى كلامى
=فريددده، اطلعِ بره بس مش من حمام القاعه، اطلعى بره حياتى نهائى من النهاردة انتِ ملكيش أخوات خالص تمام.
_دا بجد عشان بحب لك الخير واحميكِ تعملى كدا، ليه ياغرام عشان واحد متخلف ومريض وهارب بمجرد ماقولتله ملكش دعوه بيها محاولش عشانك وقرر يسمع الكلام، متزعليش اوى كدا منى، لو الانسان عايز واحده بيحارب عشانها، لكن دا حتى محاولش يناقشنى سمع منى ونفذ وكأنها جاتله نجده م السما، ما هو الرجاله مبترتبطش بالمطلقة ياغرام بيكونوا شايفينها
آله مستعمله زى م الكون كله شايفاك كدا.
=آله مستعملة! اومال نور عايزينى ليه بقا.
_مراية الحب عميه.
=برافو يافريدة، بتقفى جمب أختك وبتساعديها انها تتدبح من كلامك ومن كلام المجتمع، انا..مش عايزة اشوف وشك تانى
يافريدة.فرصة سعيدة ..
________________________________________
_ بس انا مش هسيبك فى الحالة دى ياغرام
=نادية انا مممتنة ليكِ إنك وقفتى جمبى النهاردة مكنتش متخيلة إنك بالجدعنه دى كلها. انتِ سهرتِ واتأخرتِ جدا الساعة
تسعة يلا روحى هطلبلك اوبر.
_لا ياستى انا معايا عربيتى.
=ايه دا بجد معاكِ عربية؟
_لا لا متتخميش فيا، انا اصلا على باب الله اوى انا بصرف على مشروعى مش هو اللى بيصرف عليا، دى أخويا سبهالى
ملهوش فى السواقه وبيكرهها.
=نادية ينفع اطلب منك طلب؟
_اهو الطمع ابتدى من وقت ماعرفتى العربية بتاعتى
“ضحكت، لقيتها بتضمنى ليها وبتلمس شعرى”
_انتِ تطلبى عنيا والله هدهوملك، انتِ متعرفيش انا حبيتك قد ايه ياغرام.
=نادية ممكن تخليكِ معايا الفتره دى انا محتاجة لحد جمبى، مش عايزة احس إن وحدى.
_انا معاكِ ياغرام والله هنبقى أكتر من اخوات مش بس اصحاب المهم كمليلى بقا وبعد ما وسيم دا ظهرلك وكشف انه بنى آدم عملتِ ايه.
=لا انا حكيت كتير اوى المرة الجاية احكيلك انا دلوقت محتاجة اروح انام.