-مفيش حاجة نتكلم عنها يا جورج بعد ما شوفتها معاك في العيادة …خليني ساكتة احسن …
-ماريانا محصلش حاجة وأنتِ شوفتي بعينك.و …
قاطعته بإنفعال وقد ترطبت عينيها بفعل الدموع
-لا حصل وحصل كتير …اقولك ايه حصل ؟!حصل اني شوفت في عينيك ليها حب أنا كان نفسي اشوفه ليا …فيه أنها لما كانت قدامك أنا كنت عاملة زي الهوا …بتبص عليها زي ما تكون حلمك …انت فاكر أن الخيانة جسدية وبس …انت خونتني يا جورج
بروحك وبقلبك …خونتني …
فشل في الرد عليها …كانت كل ما تقوله صحيح …طفرت الدموع من عينيها :
-مش قادرة انسى الطريقة اللي كنت بتبصلها بيها …والله حسيت انك ضربت سكينة في قلبي وانت بتبصلها كده …أنا اكتر حاجة ندمانة عليها اني اتجوزتك يا جورج…لو رجع بيا الزمن لورا مكنتش قبلت بيك …
ثم مسحت دموعها وحملت الأطباق وغادرت تاركة إياه يشعر بألم يعتصر قلبه !!
♡♡♡♡♡♡♡♡♡♡♡♡♡♡
-بس يا ابني كفاية فرك ..
قالتها ورد وهي تحاول تهدئه ابنها الذي يتحرك كثيرا ويبكي ….لقد اضطرت أن تأتي وتحضر فرح عمار صديق زوجها …
-ماما ورد هاتي اشيل مراد ..
قالتها ياسمين بإبتسامة …ابتسمت ورد لها وقالت:
-خدي شيليه ..أنا عارفة أنه مش هيهدي الا معاكي انتِ …
وبالفعل أعطت ورد لياسمين مراد وما أن أتى بين ذراعيها حتى هدأ قليلا ….
ابتسمت ورد بسعادة وقالت:
-حبايبي ربنا يخليكم لبعض …
قبلت ياسمين وجنة شقيقها وهي تلاعبه بسعادة بينما هو يبتسم لها وعينيه الخضراء كعيني والده تبرق بسعادة
…..