-أزيك يا تحية.
قالها أمير مبتسما بحرج عبر الهاتف وهو يسمع صوتها الناعس…
-أمير أنت عارف الساعة كام دلوقتي….مفروض متتصلش في الوقت ده اصلا الا لو كنت لا قدر الله هتمو ت …فياريت يكون اتصالك ده مش من فراغ بدل ما أجيلك وأنط في كرشك !!!
ابتلع أمير ريقه وقال بتوتر :
-اتصلت اطمن على عبير هي كويسة؟!
-متصل بيا الساعة اتنين بعد نص الليل عشان تتطمن على عبير !!!
صرخت بها وهي تنهض من فراشها …
شعر أمير بالتوتر اكثر وقال:
-أسف…أنا بس …
-أمير حبيبي ده أنا أختك مش بتطمن عليا بالشكل ده…انت متصل بيا النهاردة تلات مرات تتطمن عليها !!…
-أنا آسف ..
قالها بهدوء ثم أكمل :
-أنا بس حبيت اطمن عليها منك أنا اسف يا تحية اني ضايقتك حقك على رأسي مش هعمل كده تاني …حقك عليا .
نهضت تحية جالسة وقالت :
-بس يا واد يا عبيـ ط أنت …مين قالك اني زعلانة …أنا بهزر معاك …بس واضح ان البنت دي أثرت فيك جامد …ده أنت مش قادر تصبر على بعدها يا عم فيه أيه ؟!!…عموما يا قلب أختك هي زي الفل ومرتاحة عندي متقلقش وشايلاها فوق راسي والله المهم أنت ترتاح …
-انا مرتاح …
قالها بتوتر لتضحك.هي برقة وتقول :