اشتعل بنيران الغيرة وهو يسمعها تنطق بإسمه ولكنه قال وهو يحاول تهدئة أعصابه …لا يريد أن يخسرها …سيتنازل قليلا…
– أنا بحبك يا نسرين …بحبك أو ي وأنتِ بتبعديني عنك !!
هزت نسرين رأسها وقالت الدموع تطفر من عينيها:
-مظنش ..مظنش انك حبتني خالص …انت زيه …زي بابا …كلكم بس بتقولوا بتحبوني…بس تصرفاتكم غير كده خالص …
بتتفننوني تعذبوني وتقهروني …قولي حب ايه ده يا يوسف اللي بتتكلموا عليه …انتوا دمرتوا حياتي!!!أنا مش محتاجاكم من النهاردة…
ثم كادت أن تذهب ليقول يوسف فجأة:
-ابوكي عرف انك.مرتبطة ….بس ميعرفش مين اللي أنتِ مرتبطة بيه !!!!
………………
-ماجدة كلمتني عليكي وقالت شغلك حلو …بس اعرفي انك هتشتغلي هنا مؤقتا يعني حسبة تلات اسابيع كده عقبال ما ناريمان تقوم بالسلامة وترجع الشغل …
قالتها السيدة المسنة والتي تكون رئيسة الخدم لي قصر رشيد
ابتسمت رانيا وقالت:
-قالتلي أبلة ماجدة الكلام ده يا ست هانم صدقيني بس تقوم ناريمان بالسلامة أنا همشي من هنا
ابتسمت السيدة اخيرا وقالت :
-متقوليليش يا ست هانم قوليلي يا أم رأفت أو يا أبلة لطيفة …
هزت رانيا رأسها بطاعة لتقول لطيفة :
-يالا دلوقتي نبدأ شغل عشان النهاردة خطوبة الهانم الصغيرة وقدامنا حاجات كتير نعملها …
-ماشي يا أبلة ..
قالتها رانيا ثم بدأت العمل بهمة ….كانت تريد إثبات ذاتها …لا بأس سوف تعمل مؤقتا وفي تلك الأثناء سوف تبحث عن عمل آخر …بالإضافة إلى أن قررت أن تُكمل تعليمها…قررت أن تكون شخص تفتخر هي به …قررت أن تُرضي ذاتها …ستظل دائما مشغولة كي تنساه …تلك هي الطريقة الوحيدة لكي تخرجه من عقلها!!
……….
-ازاي يعني يا نسرين مش هتيجي دلوقتي …النهاردة خطوبتي وانتِ البيست بتاعتي لازم تبقي معايا من أول اليوم …
قالتها ليان بتذمر وهي تدور بصالة القصر …كان الجميع يعمل بهمة لجعل هذا اليوم يوما لا يُنسي
تنهدت ليان وهي تستمع لمبررات صديقتها …لقد كانت تشع من السعادة عندما كانت هنا ولكن منذ أن أخذها والدها أول أمس وهي بهذا الحُزن …