الصبح..
قاسم صحي على حركة أوليان وهي بتقعد جنبه تاني ، بعد ما نزلت لتالت مره تعمل حاجه تشربها عشان تفوق..
همسلها بصوت ضعيف : مصحتنيش ليه عشان اصلي الفجر؟
طبطبت على صدره وهي بتقيس حرارته بالجهاز : معلش انت كنت تعبان ، حرارتك مقلتش غير درجه ليه؟
همستها بصوت واطي وهي هتبكي..
طبطب على كفها اللي حطته على خده ،. واتكلم بصوت ضعيف وهو بيحاول يتعدل : منمتيش ليه؟ عيونك حمراء اوي متكذبيش وتقولي نمت..
عيونها دمعت وهي بتبصله : هنام ازاي وانت تعبان؟
قاسم ابتسم بتعب، وقرب باس راسها : انا كويس يا عيوني ، شوية حراره بس.. نفت براسها وهي بتقول : متقومش خليك مرتاح.. عايز ايه وانا اجبهولك..
كح جامد وهو بيقول : مايه.. ريقي ناشف
جابتله كوبايه من جنبها وملتها مايه.. سندت راسه وهي بتشربه شويه شويه..
بعد ما خلص شرب حمد ربنا وهو بيكح..
رجعت الكوبايه مكانها ومسكت دواء تقرأ مكتوب عليه ايه وهي بتقول : خليك صاحي ثواني وراجعه..