أوليان ابتسمت بخجل وهي بتقول : بتثبتني وبتحاول تنسيني عشان تروح الشغل بكره؟
ضحك بصوت عالي وقال بتحدي : ما انا هروح يعني هروح..
هزت كتفها وهي بتاخد الطبق والعصير لبره المطبخ : هنشوف ، حط الفشار وتعالى يلا هنحضر فيلم..
اتنهد بسعاده ونسي كل اللي حصله في الشغل.. وعمل اللي قالتله عليه وخرج وراها..
اتلقاها قاعده قدام التلفزيون وهي بتقلب فيه بملل ومتغطيه بالبطانيه وطافيه الانوار كلها..
قاسم قعد جنبها على الكنبه بعد ما حط طبق الفشار على الطاوله قدامهم ودخل تحت البطانية وهو بيقول بخفوت : هاتي ر’عب..
أوليان اتوترت وهي بتقول : لا لا.. اقصد ه.. هشوف..
قاسم ابتسم بخبث وهو بيحط الطبق في حجره وبياكل : هاتي انا اجيب طيب..!
أوليان بسرعه وهي بتاكل من الفشار : مفيش..
قاسم ضحك وهو بيمسكها من خدها : يعني جبانه وكذابه..
بصتله بضيق وهي بتحط الريموت في ايده جامد : هات انت ، انا مش بخاف..
قاسم رفع حواجبه بتحدي وهو بيقول بعد ما ولى تركيزه التليفزيون : هنشوف..
أوليان ارتبكت وهي بتدعي انه ميلاقيش.. كانت بتاكل فشار وباصه للتليفزيون بترقب..
قاسم ابتسم بإنتصار وهو بيحط الريموت على الطاوله : كده تمام..
أوليان زفرت بيأس وهي بتهمس بكلمات مش مفهومه..
كان بيحاول يكتم ضحكته على منظرها..
بدأ الفيلم وقاسم بس اللي كان بيحضره وهو بيشوفها بتعمل ايه..
كانت مغمضه عيونها وهي بتقبض على كفها جامد..
قاسم بهدوء وهو بيحاول يخفي ابتسامته : مالك يا أوليان؟
فتحت عيونها بسرعه وهي عامله نفسها بتحضر : لا مفيش..
مدت ايدها تاخد من الفشار وهي مركزه مع التليفزيون ، بس صرخت مره واحده لما ظهر مشهد مرعب وهي بتد’فن وشها في كتفه وبتتنفس بسرعه وخوف وقلبها بيدق جامد ..