يا حبيبتي استهدي بالله واستعيذي من الشيطان.. مش موضوع الخلفه اللي هيوقف حياتك! احنا متجوزين فعلياً من 3 شهور مش من 3 سنين ، ايه اللي عاملك قلق بس؟ خلي عندك ثقه في ربنا اكبر من كده! الخلفه بتاخد وقت ومجهود ، خلصي سنة الامتياز دي على خير وبإذن الله ربنا يحلها من عنده..
أوليان بصتله بنظرة إمتنان وفي عيونها دموع وهمست بأنفاس مختنقه : انا بحبك اوي..
قاسم ضحك بصوت عالي وهو بيأكلها : عارف يا عيوني..
أوليان كانت باصه عليه وهي متابعه كل حركاته.. وصعبان عليها انه بيعمل المستحيل عشان يرضيها.. وهي مش في ايدها تعمل حاجه تفرحه..
اتكلمت بحيره وهي صوتها لسه متردد : طيب ليه معملش فحص……
قاسم بصلها بضيق وهو بيحاول يسيطر على عصبيته : أوليان.. الموضوع انتهى خلاص!
هزت راسها بهدوء وسكتت..
بعد ثواني بصتله بتذكر : انت كنت متضايق ليه لما دخلت؟
قاسم اتنهد وهو بيهمس بإقتضاب : مفيش حاجه..
أوليان اتكلمت وهي بتزم شفايفها بضيق : شوفت! انا غلطانه اني بقولك كل حاجه..
قاسم بصلها وابتسم على منظرها اللطيف غصب عنه : لا مش غلطانه ولا حاجه.. بس انتي متضايقه لوحدك.. مش هزود الموضوع عليك!
أوليان رفعت حواجبها وهي بتقول : ما انت متضايق وبتسمعلي.! قول يا قاسم في ايه؟
اتنهد بهدوء وهي بيقوم عشان يحط الصينيه على الطاوله.. وطفى النور ورجع على السرير تاني.. طفى الأباجوره اللي جنبه ونلم على السرير وهو بيفتح دراعه.. دخلت في حضنه بدون تردد وهي بتغمض عيونها بتعب..
اتكلمت بهدوء : قولي بقى..
قاسم اتنهد بقوه : انا قابلت شهيره..